ހުކުރު ދުވަހަކީ ސަރުކާރު ބަންދުދުވަހަކަށްވެފައި ގިނަ އޮފީސްތައްވެސް ބަންދުދުވަހަކަށްވުމުން ގިނަ ބައަކަށް ޤަބޫލުކުރެވެނީ އެއީ ޗުއްޓީ ދުވަހެއްގެ ގޮތުގައެވެ. އާނއެކެވެ! އެއީ ޗުއްޓީ ދުވަހެކެވެ. ނަމަވެސް މަސައްކަތަށް އެކަންޏެވެ. އަޅުކަމާއި ޢާއިލީ ޒިންމާ އުފުލުމުގައި އޮތީ ހީވާގިވެ ބާރަށް ކުރިއަށް ދިއުމެވެ.
ހުކުރު ދުވަހަކީ އަޅުކަމުގެ ދުވަހެއް-
އިބްނުލް ޤައްޔިމު رحمه الله ވިދާޅުވިއެވެ.
"ފަހެ ހުކުރު ދުވަހަކީ އަޅުކަމުގެ ދުވަހެކެވެ. ދުވަސްތަކުގެ ތެރޭގައި އެދުވަސްވަނީ މަސްތަކުގެ ތެރޭގައި ރަމަޟާން މަސް ވާ ފަދައިންނެވެ. އަދި ރަމަޟާން މަހުގައި ލައިލަތުލް ޤަދްރި ވާ ފަދައިން ހުކުރުދުވަހުގައިވެސް ދުޢާ އިޖާބަކުރެއްވޭ ވަގުތެއް ވެއެވެ. އެހެންކަމުން އެމީހެއްގެ ހުކުރުދުވަހުގެ ކަންތައްތައް ރަނގަޅު ވެއްޖެއްޔާ މުޅި ހަފްތާ ރަނގަޅުވެގެން ދެއެވެ. އަދި އެމީހެއްގެ ރަމަޟާން މަހުގެ ކަންތައްތައް ރަނގަޅު ވެއްޖެއްޔާ މުޅި އަހަރު ރަނގަޅުވެގެން ދެއެވެ. އަދި އެމީހެއްގެ ޙައްޖު ރަނގަޅު ވެއްޖެއްޔާ އެމީހެއްގެ މުޅި ޢުމުރު ރަނގަޅުވެގެން ދެއެވެ. ހުކުރުދުވަހަކީ ހަފްތާގެ މީޒާނެވެ. ރަމަޟާން މަހަކީ އަހަރުގެ މީޒާނެވެ. އަދި ޙައްޖަކީ ޢުމުރުގެ މީޒާނެވެ."
[زاد المعاد لابن القيم (1 / 386)]
- ޝައިޚް އިމްރާން މުޙައްމަދު ޢަލީ
