މުސްލިމަކަށްވުމުގެ ބޭނުމަކަށްވާންޖެހޭނީ ﷲ ތަޢާލާގެ ރުހިވޮޑިގަތުމާ ލޯބިވެވޮޑިގަތުން ލިބުމެވެ. ސުވަރުގެ ވަދެވޭނީ އެއިރުންނެވެ. އެމީހަކަށް ﷲ ތަޢާލާގެ ރުހިވޮޑިގަތުމާ ލޯބިވެވޮޑިގަތުން ލިބިގެންނެވެ.
ކޮންމެ މީހަކަށްވެސް ލިބޭނެ އެންމެ ބޮޑު ނިޢްމަތަކީ އެމީހަކަށް ﷲ ތަޢާލާ ލޯބިވެވޮޑިގަތުން ލިބުމެވެ. ﷲ ތަޢާލާ އެބައަކު ދެކެ ލޯބިވެވޮޑިގަންނަވާނެ މީހުންގެ ކިބައިގައި ހުންނާނެ 7 ސިފައެއް މިބަޔާންކުރަނީ ކީރިތި ޤުރްއާނުންނެވެ.
1، 2 "--- 1. ހަމަކަށަވަރުން، ގިނަގިނައިން ތައުބާ ވާ މީހުންދެކެ ﷲ ލޯބިވެ ވޮޑިގެންވެއެވެ. 2. އަދި ޠޯހިރުވާ މީހުން ދެކެވެސް އެކަލާނގެ ލޯބިވެވޮޑިގެންވެއެވެ." (ބަޤަރާ: 222)
3. " ---ހަމަކަށަވަރުން، ތަޤްވާވެރިންދެކެ، ﷲ ލޯބިވެވޮޑިގެންވެއެވެ." (ތައުބާ: 4)
4. "--- އިޙްސާން ތެރިންދެކެ ﷲ ލޯބިވެވޮޑިގެންވެއެވެ." (އާލް ޢީމްރާން: 134)
5 " ---ކެތްތެރިންދެކެ ﷲ ލޯބިވެވޮޑިގެންވެތެވެ." (އާލް ޢިމްރާން: 146)
6. "--- ފަހެ، (ކަމަކާމެދު) ކަލޭގެފާނު ޢަޒުމްކަނޑައަޅުއްވައިފިނަމަ، ފަހެ، ކަލޭގެފާނު ﷲ އަށް ވަކީލް ކުރައްވާށެވެ! ހަމަކަށަވަރުން، ވަކީލްކުރާ މީހުންދެކެ ﷲ ލޯބިވެވޮޑިގެންވެތެވެ." (އާލް ޢިމްރާން: 159)
7 "--ހަމަކަށަވަރުން، ޢަދުލަށް ޙުކުމްކުރާ މީހުންދެކެ ﷲ ލޯބިވެވޮޑިގެންވެތެވެ." (އަލް މާއިދާ: 42)
ﷲ ތަޢާލާގެ ލޯބިވެވޮޑިގަތުން އެދޭ މީހާ، އެމީހަކީ މި ސިފަތައް އެމީހެއްގެ ކިބައިގައި ބެހެއްޓުމަށް ގަދައަޅައި މަސައްކަތްކުރާ މީހަކަށްވާށެވެ! އިންސާނަކަށް ލިބޭނެ އެންމެ މަތިވެރި ނިޢްމަތަކީ އެއީ އެވެ.
- އިސްލާމީ ތިލަފަތުގެ ދަރުސަކުން
