އަޅުގަނޑުގެ
އެކުވެރިންގެ ތެރެއިން މީހަކެވެ. އޭނާވެސް ނަމާދުކުރެއެވެ. ނަމަވެސް ފާފަކުރަން ޖެހިލުމެއް ނުވެއެވެ. ކުރަން ބޭނުންވާ ކަމެއް ކުރެއެވެ. އެކަމަކު އަޅުގަނޑު އަހަނީ ނަމާދުކުރާނަމަ ފާފަކުރަން ބިރުވެތިވެ ޖެހިލުންވާނެކަމަށެވެ. އެކުވެރިޔާއަށް އެހެން އެވަނީ ކީއްވެގެންތޯ؟
ޖަވާބަކީ ސީދާ ސަބަބު ދެނެވޮޑިގެންވަނީ ﷲ ތަޢާލާއެވެ. ތިރީގައިވާ ލިޔުމުން އިތުރު މަޢުލޫމާތު ލިބިލައްވާނެއެވެ. އިން ޝާ ﷲ
ﷲ ތަޢާލާގެ ވަޙީބަސްފުޅުގައި އޮތީ މިފަދައިންނެވެ!
"ފޮތުގެ ތެރެއިން ކަލޭގެފާނަށް ވަޙީ ކުރެއްވި ތަކެތި ކިޔަވައި ވިދާޅުވާށެވެ! އަދި ކަލޭގެފާނު ނަމާދު ޤާއިމް ކުރައްވާށެވެ! ހަމަކަށަވަރުން، ނަމާދަކީ ހުތުރުކަންބޮޑު ފާފަތަކާއި، މުންކަރާތްތައް ނަހީކުރާ ކަމެކެވެ. އަދި ހަމަކަށަވަރުން، ﷲ ހަނދުމަ ކުޅައުމަކީ، އެންމެ ބޮޑު ކަންތަކެވެ. އަދި ތިއަބައިމީހުން ކުރާ ކަންތައް ﷲ ދެނެވޮޑިގެންވެތެވެ." (އަލް ޢަންކަބޫތު: 45)
ބައެއް މީހުން ބުނެއެވެ. ތިމަންމެން ނަމާދުކުރަމެވެ. ނަމަވެސް ފާފަތަކަށް އަރައިގަނެވެނީއެވެ. އެހެންކަމަށްވާނަ އެއީ ވަރަށް ނުރައްކައުތެރި މައްސަލައެކެވެ. ކުރެވޭ ނަމާދާއިމެދު އަވަހަށް ފުންކޮށް ވިސްނަން ފަށާށެވެ! ނަމާދުގައި ޚުޝޫޢަތްތެރިވެވޭ މިންވަރާއިމެދު ވިސްނަން ފަށާށެވެ!
ﷲ ތަޢާލާ "ހަމަކަށަވަރުން، ނަމާދަކީ ހުތުރުކަންބޮޑު ފާފަތަކާއި، މުންކަރާތްތައް ނަހީކުރާ ކަމެއް" ކަމަށް ވަޙީކުރައްވަވާފައި އޮތުމުން ނަމާދަކީ މުންކަރާތްތަކާއި ދުރުކޮށްދޭނެ ވަސީލަތެއްކަން މިއޮތީ އެނގޭށެވެ! ފަހަތުން މިއަންނަނީ ދުރު ނުވެވޭ ސަބަބެވެ. "އަދި ހަމަކަށަވަރުން، ﷲ ހަނދުމަ ކުޅައުމަކީ، އެންމެ ބޮޑު ކަންތަކެވެ."
ވީމާ ނަމާދުކުރި ނަމަވެސް މުންކަރާތްތަކާއި ދުރު ނުވެވިގެން ތިއައުޅެނީ އެންމެ ބޮޑު ކަންތައް ނުކުރެވޭތީއެވެ އެއީ ﷲ ތަޢާލާ ހަނދުމަކުރުމެވެ! ނަމާދަށް އަރައި ޙަރަކާތްތަކެއް ކުރިނަމަވެސް ﷲ ތަޢާލާގެ މަތިން ހަނދުމަކުރަން ޖެހޭ މިންވަރަށް ހަނދުމަ ނުކޮށް ކުރާ ނަމާދު ނަމާދަކަށް ނުވާނެއެވެ. ނަމާދު އެކުރެވެނީ ޚުޝޫޢަތްތެރިކަމާއި ނުލައިކަމަށްވާތީއެވެ!
--އިސްލާމީ ތިލަފަތުގެ ދަރުސަކުން
