އަޅުގަނޑުވެސް ކައިވެނިކުރީ ލޯބިވެގެން 3 އަހަރު އެކުގައި އުޅެފައެވެ. އެއިރު އޭނާގެ ކިބައިން ފެނުނު ރަނގަޅު ސިފަތަކަށް އިތުބާރުކޮށްފައެވެ. ކައިވެނިކުރުމަށްފަހު އޭނާގެ އެދުމަށް ވިޔަފާރިއެއް ފަށަން އަޅުގަނޑުގެ އަތުގައި ހުރިހާ ސޭވިންގސް އެއް އެއްވެސް ޝަރުޠަކާއި ނުލައި ދިނީމެވެ.
ވިޔަފާރި ފަށައި ތަނަވަސްކަން ލިބުމުން އަޅުގަނޑު ވަރިކޮށް އެއްލައިލީއެވެ. ކުޑަކުޑަ ދެ ދަރިންގެ ޚަރަދުވެސް ނުދެއެވެ. އަޅުގަނޑަށް މިޖެހުނީ އަނެއްކާވެސް ވަޒީފާއަދާކޮށްގެން ލިބޭ މުސާރައިން ދަރިންވެސް ބަލާށެވެ!
އަޅުގަނޑުގެ ސުވާލަކީ ފިރިމީހާގެ ތަނަވަސްކަމަކީ އޭނާގެ އެކަނި ތަނަވަސްކަމަށްވާނެތޯއެވެ؟ އޭނާއަށް ހަމަ ޙަލާލުވާނެތޯއެވެ؟"
ސުވާލުކުރެއްވި ކިޔުންތެރިޔާއަށް ބުނެލަން އޮތީ ތިބާއަށް ލިބެންޖެހޭ ޙައްޤު މިދުނިޔޭގައި ނުލިބިގެން ކަންބޮޑުނުވާށެވެ! ލިޔެކިޔުމާއި ނުލައި އަދި އެއްވެސް ޝަރުޠެއް ނުކޮށް ތިބާ ދިން އެއްޗެއް ބޭނުންކުރުމަށްފަހު އެކަމަށް އިޚްލާޞްތެރި ނުވިނަމަ އެކަމަށް ޙައްޤު ބަދަލު މާތް ﷲ ތިބާއަށް ދެއްވަވާނެތެވެ.
އަނިޔާވެރިން ޙަރާމް ޙަލާލަކަށް ނުބަލައެވެ. އެއްބަސްވުމެއް އޮތަސް އިޙްތިރާމެއްވެސް ނުކުރެއެވެ. ވީމާ އަލުން ހިތްވަރުކޮށްލާށެވެ. މާ ބޮޑު އުފާވެރިކަން ދެއްވަވާނެތެވެ. އިން ޝާ ﷲ
ތުރިގައިވާ ވާހަކައަކީވެސް ހަމަ ތިއަ ފަދަ ޙާލަތެއް ކުރިމަތިވި އަނހެނެއްގެ އިޙްޞާޞްތަކެވެ. ޢިބްރަތް ޙާޞިލުކޮށް ދުޢާކުރުން ގިނަކުރާށެވެ!
އަހަރެން ނިޞްބަތްވަނީ ރ އަތޮޅު ރަށަކަށެވެ. ކައިވެނިކުރީ އުމުރުން 28 އަހަރުގައެވެ. ކައިވެނިކުރި ފިރިހެން ކުއްޖާއަކީ އެހެން މީހުންގެ ކުށް ހޯދައި އިޞްލާޙްކުރުމުގެ މަސްއޫލިއްޔަތު އަދާ މުއައްސަސާއެއްގެ ޒިންމާދާރު ވަޒީފާއެއް އަދާކުރާ ޒުވާނެކެވެ.
ލޯބިވާކަމަށް ބުނެ ދެއްކި ވާހަކަތަކަށް އިތުބާރުކުރެވުނު އެންމެ ބޮޑު އެއް ސަބަބަކީވެސް އެއީއެވެ. ނަމަވެސް ޙަޤީޤަތް އެނގުނުއިރު އޭނާވެގެންދިއައީ އަނިޔާވެރިކަމުގައި އަރާހުރި މީހަކަށެވެ. މަކަރުވެރިކަމުގައި ވެސް އެންމެ ކުރީސަފުގައި ހުރި މީހަކަށެވެ.
އަހަރެންގެ ބައްޕައަކީ ތަނަވަސް ބައްޕައެކެވެ. ނިޔާވިއިރު ބައްޕަގެ އަތުގައިހުރި ފައިސާއިން ގިނަ އަދަދެއްގެ ފައިސާ އަހަރެންނަށް ލިބުނެވެ. އެފައިސާތަކުން އޭނާ ފުރަތަމަ ކުރިކަމަކީ ދެމީހުން ދިރިއުޅޭނެ ރަނގަޅު ފެންވަރުގެ ތަނެއް އޭނާގެ ގޭގައި ހެދުމެވެ.
އޭނާ ވަޒީފާ އަދާކުރަނީ މާލޭގައެވެ. ކައިވެނިކޮށްގެން އުޅުނު 3 އަހަރު ދުވަހު ވެސް ޗުއްޓީގައި އަންނައިރު ކޮންމެވެސް އެކުވެރިއަކު ގެންނާނެއެވެ. އަހަރެންނާއިއެކުގއި ހޭދަކުރާ ވަގުތަށްވުރެ ގިނ ވަގުތު ހޭދަކުރާނީ އެމީހަކާއިއެކުގައެވެ.
ދެން އޮތީ އެންމެ ލަދުވެތި ވާހަކައެވެ. ދެމަފިރިކަމުގެ ގުޅުންވެސް ހިންގަން ބޭނުންވަނީ ފައިގެ އިނގިލިތަކުންނެވެ. ނުވަތަ މަސްނޫޢީތަކެތި ބޭނުންކޮށްގެންނެވެ. މިކަންކަމަކީ އަހަރެން ކިތަންމެ ނިކަމެތި ނަމަވެސް ޤަބޫލުކުރެވޭ ކަންކަމަކަށް ނުވިއެވެ.
ބައްޕަގެ ކިބައިން ވާރުތަވި ފައިސާތައް އޭނާގެ ބޭނުންތަކަށް ޚަރަދުކޮށް ހުސްވުމާއިއެކު މިހާރު މިވަނީ ވަރިކޮށްލައިފައެވެ. އެކަނިވެރިކޮށްލައިފައެވެ. ފަޤީރުކޮށް ނިކަމެތިވެސްކޮށްލައިފައެވެ.
އަހަރެންގެ ކުށަކީ އޭނާ ދެއްކި ދޮގު ވާހަކަތަކަށް އޭނާއަށް އިތުބާރުކޮށް ލިބުނުހައި ފައިސާ އޭނާގެ އަތްމައްޗަށް ދޫކޮށްލެވުނުކަމެވެ. ތެދުވެރި ލޯތްބެއް ލިބިދާނެ ކަމަށް އުންމީދުކުރެވުނު ކަމެވެ. ﷲ ގަންދީ ހުވާކޮށްގެން ތިބޭ މީހުން ހުވައަށް ޙުރުމަތްތެރިކޮށް ހިތާނެ ކަމަށް ޤަބޫލުކުރެވުނު ކަމެވެ.
އެމީހަކު ކުރިކަމެއް އެމީހަކަށެވެ. މަކަރުވެރިން އެކަމުގެ ރަހަ މިދުނިޔޭގައިވެސް އަދި ޤިޔާމަތްދުވަހުވެސް ދެކޭނެއެވެ. އަހަރެންގެ އިލްތިމާސަކީ އަޅާ ޔުނިފޯމަށާއި ކޮށްގެން ތިބޭ ހުވައަށް ހަމަ އެއްވެސް އަންހެނަކު އިތުބާރު ނުކުރުމެވެ. އަމިއްލަ ތަނަވަސްކަން ފިރިމީހާ ޢާއި ހަވާލުނުކުރުމެވެ. ކޮންމެފަދަ ލަނޑެއް ވެސް ދީފާނެ ކަމަށް އަބަދުވެސް ވިސްނައިގެން ތިބުމެވެ.
އަހަރެންނަށް މިޖެހުނު ޙާލު އެހެން އެއްވެސް އަންހެނަކަށް ޖެހޭކަށް އަހަރެން ނޭދެމެވެ. އެހެންވެ ކިޔުންތެރިންނާއި ހިއްޞާކޮށްލީއެވެ.
- ޝަލޫ- މިއަދުނޫހުގެ ކިޔުންތެރިއެއް
