އަޅުގަނޑުމެންގެ ކައިވެންޏަށްފަހު ދިރިއުޅެމުން ދިއައީ ފިރިމީހާގެ ގޭގައެވެ. އެއީވެސް ޖާގައިގެ ގޮތުން ވަރަށް ދަތި ގެއެކެވެ. އެހެންކަމުން ފިރިމީހާ މަސައްކަތްކުރަމުން ދިއައީ ކޮންމެ ގޮތަކުން ނަމަވެސް އަމިއްލަ ގެއެއް ހޯދުމަށެވެ. ނަމަވެސް އަތުގައި އެވަރަށް ފައިސާ ހަމަނުވާތީ ނުގަނެވި ލަސްވަނީއެވެ.
އެހެން އުޅެނިކޮށް އަޅުގަނޑުގެ ބޮޑު ދައިތަ ކުއްލިއަކަށް އަޅުގަނޑުމެން ދެމަފިރިންނާއި ވަރަށް ބޮޑަށް ގުޅުނެވެ. އޭނާއަކީ އެކަނި ހުންނަ އަންހެނެކެވެ. ދަރިއަކުވެސް ނުހުރެއެވެ. އޭނާ ދިރިއުޅޭ ގޭގެ އިތުރުން ކުޑަ ދެގެ ހުރެއެވެ. އެއް ދުވަހަކު ބުނީ އަގުގެ ދެބައިކުޅަ ދިނުމުން އިތުރަށް ދައްކަންޖެހޭ ފައިސާ މަހުން މަހަށް ދައްކާ ގޮތަށް އެއްގެ ވިއްކައިފާނެ ކަމަށެވެ. އަދި ހެޔޮ އަގެއްގައިވެސް ވިއްކައިފާނެ ކަމަށެވެ.
އެއީ ރަނގަޅު ފުރުޞަތެއް ކަމަށް ބަލައި ފިރިމީހާ ބޮޑުދައިތަގެ ހުށަހެޅުން ޤަބޫލުކޮށް އަގުގެ އެއްބައަށްވާ ފައިސާ ދެއްކިއެވެ. އަދި އެއްބަސްވެފައިވާ ގޮތަށް ފައިސާ ދައްކަމުންދިއައެވެ. އެގޮތަށް ކުރިއަށް ގޮސް އަގުއަދާކޮށް ނިމެން ކައިރިވެފައިވަނިކޮށް ފިރިމީހާގެ ވިޔަފާރި ހީނަރުވާން ފަށައިފިއެވެ. އެހެންވެ ބޮޑުދައިތައަށް ފައިސާ ދައްކަން އުނދަގޫވާން ފަށައިފިއެވެ.
އެޙާލަތު މެދުވެރިވާއިރަށް ބޮޑުދައިތަ ވަރަށް ވަރުގަދަ ޝަރުޠެއް ހުށަހެޅިއެވެ. އެއީ ފިރިމީހާ ދެއަންތބަށް ބޮޑުދައިތައާއި ކައިވެނިކުރުމެވެ. އެކަން އަހަރެމެން ދެމީހުންކުރެ އެކަކަށްވެސް ޤަބޫލެއް ނުކުރެވުނެވެ. ޤަބޫލުނުކުރުމުން ބުނީ ޤަބޫލުނުކުރާނަމަ މިހައިތަނަށް ދެއްކި ފައިސާވެސް އަނބުރައި ނުލިބޭނެ ކަމަށާއި ޖެހޭނީ ގެއިން ނުކުންނަން ކަމަށެވެ.
ފިރިމީހާއަކީ ރިބާ ހިމެނޭ ލޯނު ނަގަން ބޭނުންވާ މީހެއް ނޫނެވެ. އެހެންވެ ބުނީ ގެއްލޭނީ އިރާދައިގައި ގެއްލެންހުރި އެއްޗެއް ކަމަށާއި ކިތަންމެ ބޮޑު ގެއްލުމެއް ލިބުނަސް ރިބާގެ މުޢާމަލާތެއް ނުކުރާނެ ކަމަށެވެ. ދެން ހަދާނެ ގޮތަކާއިމެދު ވިސްނަމުން ދިއައިމެވެ. އާދައިގެމަތިން ދެމަފިރިން އެކުގައި ދަމުނަމާދުކޮށް ދުޢާކުރަމުއެވެ.
އެހެން ތިއްބައި އެއްރޭ އަޅުގަނޑަށް ފެނުނު ހުވަފެނަކާއި ގުޅިގެން ރުޤްޔާކުރާ މީހެއްގެ ގާތަށް ގޮސް މަޝްވަރާކުރުމުން ސެޝަނެއް ނަގާފައި ބުނީ ވިޔަފާރި ހީނަރުވާންފެށީވެސް ދެމަފިރިން ދުރުކުރުވަން މީހަކު ހަދައިގެން އުޅޭ ޞިޙުރެއްގެ ސަބަބުން ކަމަށާއި ރުޤްޔާކޮށް ދުޢާކުރުމުން އެކަމުން ސަލާމަތްވެވިދާނެ ކަމަށެވެ. އިން ޝާ ﷲ
ކޮންމެއަކަސް އޭނާ ކިޔައިދިން ގޮތަށް ކަންކަންކުރަން ފެށިތާ 10 ވަރަކަށް ދުވަސްވީތަނާ ފިރިމީހާއަށް ބެންކޮކުން މުދައު ފޮނުވައިދޭ މީހާ މާލެ އައެވެ. އޭނާ އާއި ދެކެވުނު ވާހަކައެއްގައި މުދައު އެތެރެކުރާވަރު މިހާރު މަދުވަނީ ކީއްވެގެންތޯ ސުވާލުކުރިއެވެ. ފިރިމީހާއަކީ އެއްވެސް ކަމެއްގައި ދޮގުބުނާ މީހެއް ނޫނެވެ. އެހެންވެ އެއްވެސް ކަމެއް ނުފޮރުވައި ކަންކަން މެދުވެރިވެގެން އުޅޭ ގޮތް ފިރިމީހާ އޭނާއަށް ކިޔައިދިނެވެ.
އެރެއަކު އެއްވެސް އެއްވެއް ނުބުނެއެވެ. އަނެއް ދުވަހު މެންދުރު ނަސަންދުރަ ޕެލަސް ހޮޓަލުގައި ކާން އިނދެގެން ބުންޏެވެ. "ގޭގެ ވެރިފަރާތަށް ނުދެއްކި އޮތީ 2 މިލިއަން ރުފިޔާ ނޫންހެއްޔެވެ؟ 2.5 މިލިއަން ރުފިޔާގެ ޑޮލަރު މިހާރު ކަލޭގެ އެކައުންޓުގައި ހުންނާނެއެވެ. އަވަހަށް 2 މިލިއަން ރުފިޔާ ދައްކާލައި ގެ މިލްކުކުރާށެވެ! އަދި ވިޔަފާރިއާއިގެން ކުރިއަށްދާށެވެ. މުދައު ބަލައި އަންނާށެވެ. އެހީތެރިވާނަމެވެ. މިދިން ފައިސާއަކީ ދަރަންޏެއްވެސް ނޫނެވެ. އެއަށްވުރެ މާގިނަ ފައިސާ ކަލޭގެ އަތުން އަހަރެންނަށްވަނީ ފައިދާވެފައެވެ. އަދި ރާއްޖޭގެ ބާޒާރަށް އަހަރެން ނެރެދިން މީހަކީ ކަލޭކަން އަބަދުވެސް ހަނދާނުގައި ހުރެއެވެ."
ދެމަފިރިންނަށް ލިބުނު އުފާވެރިކަމުގެ ބޮޑުކަމުން ދެމަފިރިން އެކުގައިހެން ﷲ އަށް ހަމްދުކޮށް ޝުކުރުވެރިވީމެވެ. ފިރިމީހާ ބުންޏެވެ. "މީހަކަށް ދިމާވެފައިވާ ދަތި އުނދަގޫ ކަމަކުން ސަލާމަތްކޮށްދީފި މީހަކަށް ﷲ ރަޙުމްކުރައްވަވާނެއެވެ. އިން ޝާ ﷲ. (އޭނާއަކީ މުސްލިމެކެވެ.) މިފެނުނީވެސް އެކަމުގެ ހެއްކެވެ. މި ދަތިޙާލުގަ ހުރެގެންވެސް ވެވުނު ވަރަކުން މީހުންނަށް ކަންކަން ކޮށްދޭން މަސައްކަތްކުރަމެވެ. އިރާދަކުރެއްވިއްޔާ ތަނަވަސްކަމެއް ލިބުނު ދުވަހަކުން ރަނގަލު ބަދަލެއްވެސް ދޭނަމެވެ." އެހެން ބުނުމުން ޢޭނާ ބުނީ އެއްވެސް ބަދަލަކަށް ބޭނުން ނޫން ކަމަށެވެ.
މިކިޔައިދިނީ މާކުރީ ޒަމާނުގެ ވާހަކައެއް ނޫނެވެ. މީގެ 15 ވަރަކަށް އަހަރު ކުރީގެ ވާހަކައެކެވެ. މިހާރު ފިރިމީހާއަކީ އަމިއްލަ 3 ކުންފުނި ހިންގާ ތަނަވަސް މީހެއް ކަމަށް މިބުނަނީ ފަޚުރުވެރިވާކަށް ނޫނެވެ. ﷲ ގެ މަގުގައި ޘާބިތުވުމުގެ ފޮނި ނަތީޖާ ބުނެލުމަށެވެ.
އަދި އެއްވާހަކަ ބުނެލާނަމެވެ. އަހަރެމެން ދެމަފިރިން ދުރުކުރުވަން ސިޙުރު ހެދީ ބޮޑުދައިތަކަމަށް އޭނާގެ 2 އެކުވެރިން ގާތުގައި އިޢްތިރާފްވީ އަމިއްލައަށެވެ. ފަހުން އަޅުގަނޑުމެންގެ ކިބައިން މާފަށްވެސް އެދުނެވެ. ބުންޏެވެ. "ކަލޭމެންނަށް ފައިސާ ލިބުނު ގޮތް އެނގިއްޖެއެވެ. ތިއަވަރުގެ ބޮޑު ރަހްމަތެއް ލައްވަވާނީ ﷲ ވަރަށް ބޮޑަށް ރުއްސަވާ އަޅުންނަށެވެ. އެހެންވެ މާފަށް ނުއެދި ހުންނަން ބިރުގަތީއެވެ." އަޅުގަނޑުމެން މާފުކުރީމެވެ. ހިތްވެސް ހެޔޮކުރީމެވެ. ބޮޑުދައިތަ ހިތްކިޔަނީ ޒުވާނުންނަށް ކަމަށްވާތީ ބޮޑުދައިތަ ކައިވެނިކުރާނެ ރަނގަޅު ޒުވާނަކުވެސް ފިރިމީހާ ހޯދައިދިނެވެ.
އަޅުގަނޑުމެންގެ ޙަޔާތުގެ މިވާހަކައިން މިއަދުނޫހުގެ ކިޔުންތެރިންނަށް ވަރަށް ފައިދާކުރާނެ ފިލާވަޅުތަކެއް ލިބިގެންދާނެ ކަމަށް އުންމީދުކުރަމެވެ.
- މަރްޔަމް / މިއަދުނޫހުގެ ކިޔުންތެރިއެއް
