ކުށެއް ނުކުރެވޭނެ ހަމަ އެކަކުވެސް ނުހުންނާނެ ވާހަކަ އަބަދުވެސް ބުނަމެވެ. ހަމައެއާއިއެކު ކުށެއްކުރެވޭ ކޮންމެ މީހަކީ ކުށްވެރިއެއް ނޫނެވެ. ﷲ ތަޢާލާގެ ޙަޟްރަތަށް ބަލާނަމަ ކުރެވުނު ކުށަށް އިޢްތިރާފްވެ ތައުބާވުމުން އެކަން އެއޮތީ ނިމިފައެވެ.
ދިރިއުޅުމުގައި ނަމަ ކުރެވުނު ކުށަށް އިޢްތިރާފްވެ އަނެކާގެ ކިބައިން މާފަށް އެދުމުން އެއޮތީ އެކަން ނިމިފައެވެ. އެހިސާބުން އޭނާއަކީ ކުށްވެރިއަކަށް ނުވާނެއެވެ. ވާނީ ކުށެއް ކުރެވުނު މީހަކަށެވެ. އެއީއަކީ އެއްވެސް މައްސަލައެއް ނޫނެވެ.
މިއަދު އެންމެ ގިނައިން އިވޭއަޑަކީ ކައިވެންޏަށްފަހު މައްސަލަތައްޖެހި ލޯބިގެއްލި ކަންކަން ގޯހުން ގޯހަށް ބަދަލުވަމުންދާ ވާހަކައެވެ. އއެގޮތަށް އެކަންކަން މެދުވެރިވާ ސަބަބުތަކާއިމެދު ވިސްނައިލެވެނީ ވަރަށް މަދުންނެވެ. ވަރަށް މަދު މީހަކަށެވެ.
ދެމަފިރިންގެ ލޯބި އިތުރުކުރަން އެންމެ ފަސޭހަ އެއް މަގަކީ އެކަކަށް އަނެކަކު އިޙްތިރާމްކުރުމެވެ. ދިރިއުޅުމުގެ ކަންކަމުގައި ދެމީހުންނަކީވެސް ހަމަހަމަ ދެ މީހުންނެވެ. ޢާއިލާގެ އިސް މީހެއް ކަމުގައި ފިރިމީހާވުމަކީ އަނބިމީހާ ނުރުހޭ ކަންކަން ކުރަން ހުއްދަ ލިބޭ ސަބަބެއް ނޫނެވެ. "އިސް މީހާ" އެއީ ފިރިމީހާގެ ކިބައިގައި އޮންނަ މަސްއޫލިއްޔަތަށް ކިޔާނަމެކެވެ. އެ މަސްއޫލިއްޔަތު އަދާކުރުމުގައި ނަމޫނާ ދައްކާށެވެ! އެއިރުން އަނބިމީހާގެ ކިބައިން ވެސް ދާނީ އެކަން ފެންނަމުންނެވެ!
އެންމެ ބޮޑު އެއްމަސައްލައަކީ ކުށެއް ކުރެވުމުން އެކަން ޤަބޫލުނުކުރެވުމެވެ. ކުރެވޭ ކުށްތަކަށް އިޢްތިރާފް ނުވުމެވެ. ފުރަތަމަ ކަމަކީ ކުރެވޭ ކުށްތަކަށް އިޢްތިރާފް ނުވާނަމަ އެ ބަންދުކުރެވެނީ ސުވަރުގެ ދެވެން އޮތް މަގެވެ. ދެވަނަކަމަކަށް ކުރެވޭ ކުށް ނުވަތަ ފާފަ ނުކުރާ ކަމަށް ބުނުމުން އެހެދެނީ ދޮގެކެވެ. އެއީ ކުރެވޭ އިތުރު ފާފައެކެވެ. ވީމާ ފާފައެއް ކުރެވުނު ނަމަވެސް ޢާއިލާއަށް ކުށެއް ކުރެވުނު ނަމަވެސް އަދި އިޢްތިރާފްވެ އަވަހަށް މާފަށް އެދޭށެވެ! އެކަމުގައި ދެމަފިރިންވެސް އެކަކު އަނެކަކަށް ވާދަކުރަމުން ގެންދާށެވެ. އެފަދަ ދެމަފިރިއަކަށްވުރެ އުފަލުގައި ތިބެވޭނެ ބައަކު ނެތެވެ.
ފާފައެއް ކުރެވިއްޖެ ނަމަ އޮތީ ވީހައި އަވަހަކަށް ތައުބާވެ ހެޔޮ އަމަލުކުރުން ގިނަކުރުމެވެ. ޢާއިލާއަށް ކުށެއް ކުރެވިއްޖެ ނަމަ ވެސް އަވަހަށް އިޢްތިރާފްވާށެވެ! އަދި ކުރެވުނު ކުށުގެ ބަދަލުގައި ހެޔޮކަމެއް ކޮށްދޭށެވެ! އެއިރުން ދާނީ ލޯބި އިތުރުވަމުންނެވެ. އިތުބާރުވެސް ބޮޑުވަމުންނެވެ.
ދެމަފިރިންނަށް ކުރެވޭ ކުށުގެ ތެރޭގައި އަނބިމީހާ ނުވަތަ ފިރިމީހާ ނުރުހޭ ކަންކަން ކުރެވުން ހިމެނެއެވެ. މަނާކޮށްފައިވާ ކަންކަން ހިމެނެއެވެ. ދެމަފިރިންނަށް އެކުގައި ލޯބިން ދިރިއުޅެވޭނީ އެކަކު މަނާކުރާ، ނުރުހޭ ކަންކަމަށް އަނެކަކުވެސް އިޙްތިރާމްކުރުމުންނެވެ. އެކަންކަން ނުކުރުމުންނެވެ.
- އިސްލާމީ ތިލަފަތުގެ ދަރުސަކުން
