އަޅުގަނޑު މިކިޔައިދޭ ވާހަކަ ކުޑަކޮށް ތަފާތުވެދާނެއެވެ. ނަމަވެސް މިއީ މިއަދު ހުރިހާ އަނހެނުންވެސް އަދި ފިރިހެނުންވެސް، ޚާއްޞަކޮށް ހުރިހާ ދެމަފިރިން ވަރަށް ބޮޑަށް ވިސްނައި ހޭލުންތެރިވާންޖެހިފައިވާ ކަމެއްގެ ޥާހަކައެކެވެ.
ދާދިފަހުން ޒުވާނަކު ޖަލުގެ ކުޑަގޮޅީގައި އިނދެގެން ފޯނުކުރިއެވެ. އޭނާ ރޮމުން އޭނާ ވަރަށް ލޯބިވާ އަންހެން ކުއްޖަކަށް ކިޔައިދިނެވެ.
"އަހަރެން މިގޮޅީގައި މިއިނީ އަހަރެން ކުރި ކުށަކާއި ގުޅިގެނެއް ނޫނެވެ. ބައަކު މިވަނީ އަހަރެން ފްރޭމްކޮށްފައެވެ. އެހެންވެ ވަރަށް ބޮޑަށް ވިސްނައިފީމެވެ. ވިސްނުމުން ނުކުތް ނަތީޖާ މިކިޔައިދެނީއެވެ.
އަހަރެންނަކީ އެކުގައި އުޅުނު ވަރަށް ގިނަ އެކުވެރިންނަށް ވަރަށް ބޮޑެތި ލަނޑުތައް ދިން މީހަކީމެވެ. އެމީހުންގެ ސިއްރުތައް ހޯދައި ބްލެކްމޭލްކުރަމުން އައި މީހަކީމެވެ. އެކަމުން ފައިސާ ހޯދުމުގެ އިތުރުން އެބީހުންގެ އަނބިންނަށް ފިރިންގެ ސިއްރުތައް އަނަގައިދީ އެކަމުގެ ނާޖާއިޒުފައިދާ ނަގަމުން އައިމީހަކީމެވެ. އަހަރެންގެ ސަބަބުން ބައެއް ކައިވެނިތައްވެސް ވަނީ ރޫޅިފައެވެ.
އަހަރެން ދުވަހަކުވެސް ބްލެކްމޭލްކޮށް އެއްވެސް މީހެއްގެ އަތުން ފައިސާއެއް ނުހޯދަމެވެ. އަހަރެން އެމީހުން ލައްވައި ކުރުވަމުން އައީ އަހަރެން ޙާޞިލުކުރަން ބޭނުންވާ ކަންކަމެވެ. ނަމަވެސް އަހަރެންގެ ބޮލުގައި އެޅިފައި މިވަނީ ބޮޑުވައްކަމެކެވެ. އެއިގެ އިތުރުން ކުޑަކުއްޖަކާއި ބެހުމުގެ ކުށްވެސް މިވަނީ ބޮލުގައި އެޅިފައެވެ. މިދެކަމަކީވެސް ދުވަހަކުވެސް ކުރިކަމެއް ނޫނެވެ.
އަހަރެން ތައުބާ ވެއްޖައީމެވެ. އަހަރެންނަށް ޢުމުރުގައި އެންމެ ދުވަހެއް ބާކީ އޮއްވައި މިގޮޅިން ސަލާމަތްވެ މިނިވަންވެވުނު ނަމަވެސް އަހަރެންގެ ކިބައިން އަނިޔާ ލިބުނު އެންމެންގެ ގާތަށް ހިނގައި މާފަށް އެދޭނަމެވެ."
އަޅުގަނޑު ބުނެލަން ބޭނުންވަނީ އެހެންމީހުންނަށް ދެރަދީ ދެމަފިރިންގެ ދޭތެރެޖައްސުވައި ޢާއިލާތައް ރޫޅުވަމުން ހިނގާ މީހުން ވަރަށް ގިނަވެއްޖެއެވެ. އެކަމުން މާލީ ގޮތުން ތަނަވަސްކަން ހޯދާ މީހުންނާއި އެހެން ގޮތްގޮތުން ފައިދާ ހޯދަމުން ގެންދާއިރު ތިމާއަށް ލިބިދާނެ ހިތްދަތިކަމަކަށް ބަލައިވެސް ނުލައެވެ. އެކަންކަމަށް ވިސްނައިވެސް ނުލައެވެ.
އަޅުގަނޑުގެ ފުރަތަމަ ކައިވެނި ރޫޅުނީވެސް ހަމަ މިފަދަ މީހެއްގެ ސަބަބުންނެވެ. ކައިވެނި ރޫޅުމުން ދެދަރިން ގޮވައިގެން މަގުމަތީގައި ސަލާންޖަހަން އުޅެންޖެހުނުކަމަށް ބުނަން ލަދެއްވެސް ނުގަންނަމެވެ. އެޙާލަތުން ސަލާމަތްވެވުނީ އިންސާނުންނަށް ރަޙުމްކުރާ ފިރިހެނަކާއި ބައްދަލުވެ އޭނާ އަޅުގަނޑު ބަލައިގަތީތީއެވެ.
އަޅުގަނޑުގެ ބޮލުގައި ފިރިމީހާ އެޅުވި ތުހުމަތަކީ ދޮގު ތުހުމަތެއްކަން އޭނާއަށް އެނގުނީ އޭނާވެސް އަޅުގަނޑުވެސް ދެވަނަ ކައިވެނިކުރި ފަހުންނެވެ. މިފަދަ ނިކަމެތި ޙާލަތު ދިމާވުން މިވަނީ މިހާރު ޢާންމުކަމަކަށްވެފައެވެ.
މިއަދުނޫހުގެ ކިޔުންތެރިންނަށް މިކަމުގެ ޙައްލަކީ ސީދާ ކޮބައިކަން ބުނެދޭކަށް އަޅުގަނޑަކަށް ނުއެނގެއެވެ. ސަބަބަކީ އަޅުގަނޑަށް ކަންކަން ދިމާވީ އަޅުގަނޑުގެ ކުށެއް އެއްވެސް މިންވަރަކަށް އޮވެގެން ކަމަށްނުވާތީއެވެ. ފަހަރެއްގައި ޙައްލަކީ މީހުން ކިތަންމެ ވާހަކައެއް ދެއްކިނަމަވެސް، ފޮޓޯއާއި ވީޑިއޯ ދެއްކިނަމަވެސް ފެންނަ މަންޒަރަށް ބަލައި ގޮތް ނިންމުމުގެ ކުރިން ޙަޤީޤަތް ބަލައިލުން ކަމަށްވެސް ވެދާނެއެވެ. ނަމަވެސް އެފަދަ ކެތްތެރިކަމާއި ވިސްނުން ހުންނަ މީހުން ހާދަމަދެވެ.
- ޝަމްސިއްޔާ / މިއަދުނޫހުގެ ކިޔުންތެރިއެއް
