އޮޑިޓަރ ޖެނެރަލްގެ އޮފީހުގެ އަންނަ އަހަރުގެ ބަޖެޓުގެ ގޮތުގައި 133.5 މިލިއަން ރުފިޔާ (133,590,266 ރުފިޔާ) ހަމަޖެއްސުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.
މި ބަޖެޓު ފާސްކޮށްފައިވަނީ ރައްޔިތުންގެ މަޖިލީހުގެ މާލިއްޔަތު ކޮމިޓީން އެ ބަޖެޓު ދިރާސާކޮށް ނިންމިގޮތުގެ ރިޕޯޓާ އެއްގޮތަށެވެ. ކޮމިޓީ މަރުހަލާގައި މި ބަޖެޓަށް އެއްވެސް އުނިއިތުރެއް ގެނެސްފައެއް ނުވެއެވެ. މާލިއްޔަތު ކޮމިޓީގެ ރިޕޯޓު ފާސްކުރުމަށް ނެގުނު ވޯޓުގައި ބައިވެރިވެވަޑައިގެންނެވި 46 މެންބަރުންގެ އިއްތިފާޤުން ވަނީ އެ ރިޕޯޓު ފާސްކުރުމަށް ވޯޓު ދެއްވާފައެވެ.
ފާސްކުރެވުނު ބަޖެޓުގެ ބޮޑު ބައެއް ހިއްސާކުރަނީ ރިކަރަންޓު ޚަރަދެވެ. އެގޮތުން ރިކަރަންޓު ޚަރަދަށް 85.8 މިލިއަން ރުފިޔާ ކަނޑައަޅާފައިވާއިރު، އިދާރީ ޚަރަދުގެ ގޮތުގައި 19.8 މިލިއަން ރުފިޔާ އަދި މުވައްޒަފުން ތަމްރީނުކުރުމަށް 10.6 މިލިއަން ރުފިޔާ ވަނީ ހިމަނާފައެވެ. މީގެއިތުރުން އޮޑިޓަރ ޖެނެރަލްގެ މުސާރައާއި އިނާޔަތްތަކަށް ކަނޑައަޅާފައިވަނީ 981,000 ރުފިޔާއެވެ. އެއީ ޖުމްލަ ބަޖެޓުގެ ގާތްގަނޑަކަށް އެއް އިންސައްތައެވެ.
ޕީއެސްއައިޕީގެ ދަށުން އޮޑިޓަރ ޖެނެރަލްގެ އޮފީހަށް ކަނޑައަޅާފައިވަނީ 43.5 މިލިއަން ރުފިޔާއެވެ. މި ފައިސާ މައިގަނޑު ގޮތެއްގައި ޚަރަދުކުރުމަށް ހަމަޖެހިފައިވަނީ ހުޅުމާލޭގައި އަޅަމުންދާ އެ އޮފީހުގެ އައު ޢިމާރާތުގެ މަޝްރޫޢަށެވެ.
ކޮމިޓީގެ ނިންމުމާ އެއްގޮތަށް ބަޖެޓު ފާސްވުމާ ގުޅިގެން، އޮޑިޓަރ ޖެނެރަލްގެ އޮފީހުގެ މަސައްކަތްތައް އިތުރަށް ފުޅާކުރުމަށާއި، ޢުމްރާނީ ތަރައްޤީގެ މަޝްރޫޢުތައް ކުރިއަށް ގެންދިއުމަށް މަގުފަހިވެގެންދާނެއެވެ.
