ބޮޑުތަކުރުފާނުމަގު މަރާމާތު ކުރުމުގެ މަސައްކަތުގެ ތެރެއިން އައިޖީއެމްއެޗް އަދި ދަރުމަވަންތަ ހޮސްޕިޓަލް ހިމެނޭ ސަރަހައްދުގެ މަސައްކަތް ފެށުމަށްޓަކައި، އެ ސަރަހައްދު އާންމު ދަތުރުފަތުރަށް ބަންދުކޮށް ޓްރެފިކް ފްލޯއަށް ބަދަލު ގެނެސްފިއެވެ.
ފުލުހުން ވިދާޅުވީ ބޮޑުތަކުރުފާނުމަގު މަރާމާތު ކުރުމުގެ ތެރެއިން މި ސަރަހައްދުގެ މަސައްކަތް ފެށުމަށް ހަމަޖެހިފައިވަނީ 2026 އޮކްޓޫބަރު 5 ވަނަ ދުވަހު ކަމަށެވެ. އެހެންކަމުން، 2026 އޮކްޓޫބަރު 4 ވަނަ ދުވަހުގެ ރޭ 00:00 އިން ފެށިގެން އެ ސަރަހައްދުގެ ޓްރެފިކް ފްލޯއަށް ބަދަލު ގެނެވި، އާންމު ދަތުރުފަތުރަށް އެ ސަރަހައްދު ބަންދުކުރެވޭނެ ކަމަށް ފުލުހުން ވަނީ ހާމަކޮށްފައެވެ.
މީގެއިތުރުން، އެ ސަރަހައްދުގައި ޕާކުކޮށްފައިވާ އުޅަނދުތައް ކަނޑައެޅިފައިވާ ވަގުތުގެ ކުރިން ނެގުމަށްވެސް ފުލުހުން ވަނީ އުޅަނދުތަކުގެ ވެރިފަރާތްތަކަށް އިލްތިމާސްކޮށްފައެވެ.
މިފަދަ ކަންކަމުގައި އާންމު ރައްޔިތުންގެ ފަރާތުން ލިބެމުންދާ އެއްބާރުލުމަށް ފުލުހުން ވަނީ ޝުކުރު އަދާކޮށްފައެވެ. އަދި މި ބަދަލުގެ ސަބަބުން އާންމު ރައްޔިތުންނަށް ދިމާވެދާނެ ދަތިތަކަށްޓަކައި ފުލުހުންގެ ފަރާތުން ވަނީ މައާފަށް އެދިފައެވެ.
