ރާއްޖޭގެ އިގްތިޞާދު ކުރިއެރުވުމަށް އެކި ދާއިރާތައް ފުޅާކުރަންޖެހޭ ކަމަށާއި، އަލަށް ތަޢާރަފުކުރުމަށް ނިންމާފައިވާ ރިއަލްއެސްޓޭޓުގެ ޤާނޫނަކީ ވަކި މަޝްރޫޢަކަށް ޚާއްސަކޮށްގެން އެކުލަވާލާ ޤާނޫނެއް ނޫން ކަމަށް ބަންޑާރަނައިބު އަލްއުސްތާޛް އަޙްމަދު އުޝާމް ވިދާޅުވެއްޖެއެވެ.
ބަންޑާރަނައިބު މިހެން ވިދާޅުވީ "އަހާ" ފޯރަމުގައި، ރަސްމާލޭގައި އީގަލް ހިލްސްއިން ކުރިއަށްގެންދަން ނިންމާފައިވާ މަޝްރޫޢާ ގުޅޭގޮތުން އާންމު ރައްޔިތަކު ކުރި ސުވާލަކަށް ޖަވާބު ދެއްވަމުންނެވެ. އެ ފޯރަމުގައި އާންމުންގެ ފަރާތުން ސުވާލުކޮށްފައިވަނީ މި މަޝްރޫއުގައި ޤާނޫނާއި ގަވާދުތަކާ ޚިލާފު އެއްވެސް ކަމެއް ހިމެނޭތޯއެވެ.
އެ ސުވާލަށް ޖަވާބު ދެއްވަމުން ބަންޑާރަނައިބު އުޝާމް ވިދާޅުވީ، ސަރުކާރުން އީގަލް ހިލްސްއާއެކު މިހާތަނަށް ސޮއިކޮށްފައިވަނީ ހަމައެކަނި "ކޮމާޝަލް ޓަރމް" އެގްރީމަންޓެއްގައި ކަމަށެވެ. އަދި އެ މަޝްރޫޢުގެ ފުރިހަމަ އެއްބަސްވުމެއް ޤާއިމުކުރާނީ އަލަށް އެކުލަވާލާ ރިއަލް އެސްޓޭޓް ޤާނޫނާއި، މިހާރު އަމަލުކުރަމުންދާ އެހެނިހެން ޤާނޫނުތަކުގެ ތެރެއިން އިތުރަށް މަޝްވަރާތައް ކުރުމަށްފަހު ކަމަށް ވިދާޅުވިއެވެ.
މީގެއިތުރުން، ރާއްޖޭގެ އިގްތިސާދުގައި އައު ސިނާއަތްތައް އުފެއްދުމަށްޓަކައި ރިއަލްއެސްޓޭޓް ޤާނޫނުގެ އިތުރުން މިހާރު އަމަލުކުރަމުންދާ ބައެއް ޤާނޫނުތަކަށްވެސް އިސްލާހު ގެނައުމަށް ސަރުކާރުން ނިންމަވާފައިވާކަން އޭނާ ފާހަގަކުރެއްވިއެވެ. އަދި މި ޤާނޫނާއެކު ރާއްޖޭގައި އައު ސިނާޢަތެއް އުފެދި، މުޅި ރާއްޖޭގައި އެފަދަ މަޝްރޫއުތައް ހިންގުމުގެ ފުރުސަތު ހުޅުވިގެންދާނެ ކަމަށްވެސް ވިދާޅުވިއެވެ.
"ރިއަލްއެސްޓޭޓް ޤާނޫނަކީ ވަކި ޕްރޮޖެކްޓަކަށް އަމާޒުކޮށްގެން އެކުލަވާލާނެ ޤާނޫނެއް ނޫން. މި ޤާނޫނުގެ ދަށުން ރާއްޖޭގެ ހުރިހާ ސަރަަހައްދެއްގައިވެސް މިފަދަ ޕްރޮޖެކްޓު ހިންގުމުގެ ފުރުޞަތު ބޭރުކުންފުނިތަކަށްވެސް އަދި ރާއްޖޭގެ ކުންފުނިތަކަށްވެސް އޮންނާނެ. އެގޮތަށް އަޅުގަނޑުމެން މި ޤާނޫނު އެކުލަވާލަނީ. މި ޤާނޫނު އެކުލަވާލެވުނީމަ މި ޤާނޫނާ އެއްގޮތްވާގޮތުގެމަތިން ސޮއިކުރެވޭ އެއްބަސްވުމެއްގެ ދަށުން ރަސްމާލެ ބަޔަކާ ހަވާލުކުރަނީނަމަ އެކަން ކުރިއަށްގެންދާނީ،" ބަންޑާރަނައިބު ވިދާޅުވިއެވެ.
