ކުރީގެ ސަރުކާރުން ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތައް ބެލުމަށް އެކުލަވައިލި "މަރު ކޮމިޝަނު"ގެ ރިޕޯޓުތައް ދިރާސާކުރުމުގެ މަސައްކަތް ކުރިއަށް އޮތް މަހެއްހާ ދުވަހުގެ ތެރޭގައި ނިމޭނެ ކަމަށް ބަންޑާރަނައިބު އަލްއުސްތާޛް އަޙްމަދު އުޝާމް ވިދާޅުވެއްޖެއެވެ.
މަރު ކޮމިޝަނަކީ 1 ޖަނަވަރީ 2012 އިން ފެށިގެން 17 ނޮވެންބަރު 2018 ގެ ނިޔަލަށް ހިނގާފައިވާ، މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތަކުގެ ތެރެއިން އެކަށީގެންވާ މިންވަރަށް ތަޙުޤީޤު ނުކުރެވި ހުރި މައްސަލަތަކުގެ ޙަޤީޤަތް ހޯދުމަށް 2018 ވަނަ އަހަރު ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން އުފެއްދެވި ކޮމިޝަނެކެވެ.
ދައުލަތުގެ އެކި ވުޒާރާތަކުގެ މަސައްކަތްތަކާ ގުޅޭ މައުލޫމާތު ރައްޔިތުންނަށް ފޯރުކޮށްދިނުމަށް ކުރިއަށްގެންދާ "އަހާ" ފޯރަމުގައި އާންމު ރައްޔިތަކު ކުރި ސުވާލަކަށް ޖަވާބުދެއްވަމުން ބަންޑާރަނައިބު އަޙްމަދު އުޝާމް ވިދާޅުވީ، ކުރީ ސަރުކާރުން އެ ކޮމިޝަން އުފެއްދި ނަމަވެސް ވެރިކަން ބަދަލުވިިއިރުވެސް މައްސަލަތައް ނުނިމި ހުރި ކަމަށެވެ. ނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން، 2024 ވަނަ އަހަރުގެ ޖޫން މަހުގެ ނިޔަލަށް ފުރުސަތު ދީގެން އެ ކޮމިޝަނުގެ ބައެއް މައްސަލަތައް ނިންމައި ރިޕޯޓުތައް ރައީސަށް ހުށަހަޅުއްވާފައިވާ ކަމަށް އެމަނިކުފާނު ވިދާޅުވިއެވެ.
ބަންޑާރަނައިބު ވިދާޅުވި ގޮތުގައި މިހާރު ކުރިއަށްދަނީ އެ ރިޕޯޓުތައް ދިރާސާކުރުމުގެ މަސައްކަތެވެ. އަދި ކުރިއަށް އޮތް މަހެއްހާ ދުވަހުގެ ތެރޭގައި އެ މަސައްކަތް ނިންމައި ރައީސުލްޖުމްހޫރިއްޔާއަށް ލަފާ އަރުވާނެ ކަމަށާއި، އެ ދިރާސާގެ ތެރެއިން އާންމު ކުރެވޭނެ ފަދަ މައުލޫމާތު ހުރި ރިޕޯޓުތައް ދެނެގަނެވޭނެ ކަމަށްވެސް ވިދާޅުވިއެވެ.
"އެ ރިޕޯޓުތަކުގެ ތެރެއިން އަޅުގަނޑުމެންނަށް އާންމު ކުރެވޭނީ ކޮން ރިޕޯޓުތަކެއްތޯވެސް ބެލުމުގެ މަސައްކަތް އަޅުގަނޑުމެން އެބަކުރަން. މީގަ ދިމާވާ މައްސަލައަކީ އެ ރިޕޯޓުތައް އެކުލަވާލާފައި ހުރި ގޮތުން، އެ ރިޕޯޓުތަކަށް މައުލޫމާތު ދީފައި ހުރި ގޮތުން އޭގަ އެބަހުރި ފުލުހުންގެ އިންޓަލިޖެންސް ބައެއް ސިއްރު މައުލޫމާތު ހިމެނޭކަންކަން. އެއީ ކިހާވަރަކަށް ހާމަކުރެވޭނެ އެއްޗެއްތޯ އެކަން ބަލަމުން އަޅުގަނޑުމެން މިހާރު މިދަނީ،" ބަންޑާރަނައިބު ވިދާޅުވިއެވެ.
