އެއްގަމު ދަތުރުފަތުރުގެ އައު ޤާނޫނާއެކު އުޅަނދުތަކުން ނަގާ ފީ، މާލޭގެ ޓްރެފިކް މައްސަލަ ހައްލުކުރުމަށް ޚަރަދުކުރެވޭނެކަން ކަށަވަރުވެގެންދާނެ ކަމަށް ބަންޑާރަނައިބު އަލްއުސްތާޛް އަޙްމަދު އުޝާމް ވިދާޅުވެއްޖެއެވެ.
ބަންޑާރަނައިބު މިހެން ވިދާޅުވީ ދައުލަތުގެ އެކި ވުޒާރާތަކުގެ މަސައްކަތްތަކާ ގުޅިގެން ރައްޔިތުންގެ ހުރި ސުވާލުތަކަށް ޖަވާބު ދިނުމަށް ކުރިއަށްގެންދާ "އަހާ" ފޯރަމްގެ 8 ވަނަ ޕްރޮގްރާމުގައި އާންމު ރައްޔިތަކު ކުރި ސުވާލަކަށް ޖަވާބުދެއްވަމުންނެވެ.
އެއްގަމު ދަތުރުފަތުރުގެ އައު ޤާނޫނަށް މިދިޔަ ބުރާސްފަތި ދުވަހު އަމަލުކުރަން ފަށާފައިވާއިރު، މާލެ ސަރަހައްދުގެ ދަތުރުފަތުރާ ގުޅޭ ވަކި މާއްދާއެއް ސަރުކާރުން ހިމަނާފައިވަނީ މާލެ ސިޓީ ކައުންސިލުގެ ބާރުތައް ސަރުކާރަށް ނެގުމަށް ކަމަށް މާލެ ސިޓީގެ މޭޔަރު އާދަމް އާޒިމް ވަނީ ތުހުމަތު ކުރައްވާފައެވެ. އެގޮތުން، މާލެ ސަރަހައްދުގައި ރަޖިސްޓްރީ ކުރާ އުޅަނދުތަކުން ނަގާ ފީތައް މާލެ ސިޓީ ކައުންސިލަށް ދޭން ނުޖެހޭގޮތަށް ޤާނޫނަށް ގެނައި އިސްލާހުތައް މޭޔަރު ފާހަގަކުރެއްވިއެވެ.
މި ތުހުމަތުތަކާ ގުޅިގެން ބަންޑާރަނައިބު އުޝާމް ވިދާޅުވީ، އެއްގަމު ދަތުރުފަތުރާ ގުޅިގެން މީގެ ކުރިން އަމަލުކުރަމުން އައި ޤާނޫނަކީ 15 އަހަރު ދުވަސްވެފައިވާ ޤާނޫނެއް ކަމަށާއި އެ ޤާނޫނު އިސްލާހު ކުރުމުގައި ގިނަ ގޮންޖެހުންތަކެއް ހުރި ކަމަށެވެ. އަދި އައު ޤާނޫނުގެ ދަށުން ރައްޔިތުންނަށް ޓްރެފިކާ ގުޅިގެން ހުރި ގިނަ މައްސަލަތަކަަށް އެދެވޭ ހައްލެއް ލިބިގެންދާނެ ކަމަށްވެސް އެނާ ވިދާޅުވިއެވެ.
އުޝާމް އިތުރަށް ވިދާޅުވީ އުޅަނދުތަކުން ފީ ނެގުމުގެ އެންމެ ބޮޑު މަޤުޞަދަކީ އެ އުޅަނދެއް ރަޖިސްޓްރީކޮށްފައިވާ ރަށެއްގެ ޓްރެފިކް މައްސަލަތައް ހައްލުކުރުމަށް ޚަރަދު ކުރުން ކަމަށެވެ. މާލެ ސަރަހައްދަކީ ޓްރެފިކްގެ މައްސަލަ އެންމެ ބޮޑަށް ދިމާވެފައިވާ ސަރަހައްދަށްވާއިރު، މިހާތަނަށް މާލޭގައި ރަޖިސްޓްރީކޮށްފައިވާ އުޅަނދުތަކުން ނަގާ ފީ ކައުންސިލަށް ޖަމާވި ނަމަވެސް، ކައުންސިލުން އެ ފައިސާ ޓްރެފިކް މައްސަލަ ހައްލުކުރަން ޚަރަދުނުކުރާކަން އޭނާ ފާހަގަކުރެއްވިއެވެ.
"އެ ފައިސާ މާލެ ސިޓީ ކައުންސިލުން މިއޮތް ހުރިހާ ދުވަހު ބޭނުންކުރަމުންދިޔައީ އެކަމަކަށް (ޓްރެފިކް މައްސަލަތައް ހައްލުކުރަން) ނޫން. އަޅުގަނޑުމެންނަށް މަގުމަތި ބަލާލީމަ ވަރަށް ސާފުކޮށް ފެންނަން އޮތް ކަމެއް، ރަޖިސްޓްރޭޝަން ފީން އެ ލިބުނު ފައިސާއިން ހަގީގަތުގައި މަގުތަކުގެ މަރާމާތުކޮށް، މަގުތަކުގެ ކަންކަން ބެލެހެއްޓުމަށް ނޫންކަން އޭގެ ބޮޑު ބައެއް ބޭނުންކުރަމުން އައިސްފައި އޮތީކީ،" ބަންޑާރަނައިބު ވިދާޅުވިއެވެ.
