ވެލާނާ އިންޓަރނޭޝަނަލް އެއަރޕޯޓުން ކޫއްޑޫއަށް ފުރަން ދަނިކޮށް، ގިނަ އަދަދެއްގެ މަސްތުވާތަކެއްޗާއެކު އަތުލައިގަތް މީހެއްގެ މައްޗަށް އުމުރު ދުވަހުގެ ދެ ޖަލު ހުކުމް ކްރިމިނަލް ކޯޓުން އިއްވައިފިއެވެ.
މި މައްސަލައިގައި ކްރިމިނަލް ކޯޓުން ހުކުމް އިއްވާފައިވަނީ ށ. ނޫމަރާއަށް ނިސްބަތްވާ ޢަބްދުﷲ ފަޞީހުގެ މައްޗަށެވެ. އޭނާގެ މައްޗަށް ދައުލަތުން އުފުލި ކެނެބިސް ޓްރެފިކް ކުރުމުގެ ކުށުގެ ދައުވާއާއި، ޑައިފޯމިން (ހެރޮއިން) ޓްރެފިކް ކުރުމުގެ ދެ ދައުވާ ވެސް ޝަރީއަތަށް ވަނީ ސާބިތުވެފައެވެ.
ފުލުހުންގެ ބެލުމުގެ ދަށަށް އޭނާ ގެނެސް ބަލައިފާސްކުރިއިރު، މި މަސްތުވާތަކެތި ފެނިފައިވަނީ އޭނާގެ ދެ ފައިގެ ފަލަމަސްގަނޑުގައި ޑަކްޓްޓޭޕް އަޅައިގެން ތަތްކޮށް، ފޮރުވާފައި ހުއްޓައެވެ.
ކްރިމިނަލް ކޯޓުން އިއްވި ހުކުމުގައިވާ ގޮތުން، މި ދެ ދައުވާއާ ގުޅިގެން ކޮންމެ މައްސަލައަކަށް އުމުރު ދުވަހުގެ ޖަލު ހުކުމެއް ކަނޑައަޅައި، 100,000 (އެއްލައްކަ) ރުފިޔާއިން ވަނީ ޖޫރިމަނާކޮށްފައެވެ. އަދި މި ޖޫރިމަނާގެ ފައިސާ ކުރިއަށް އޮތް 12 މަސް ދުވަހުގެ ތެރޭގައި ދައްކައި ޚަލާޞްކުރުމަށްވެސް ކޯޓުން ވަނީ އަމުރުކޮށްފައެވެ.
މީގެއިތުރުން، ޝަރީއަތް ނިމެންދެން ބަންދުގައި ހޭދަކުރި މުއްދަތު އުނިކުރުމަށްފަހު، ޑައިފޯމިން ޓްރެފިކް ކުރުމުގެ މައްސަލައިގައި އޭނާ ދެން ޖަލުގައި ހޭދަކުރަންޖެހޭނީ 24 އަހަރާއި 4 މަސް ދުވަސް ކަމަށް ކޯޓުގެ ހުކުމުގައި ބަޔާންކޮށްފައިވެއެވެ.
