ވެރިރަށް މާލޭގެ މަގުތަކުގައި އޮތް ޓްރެފިކް ބާރުބޮޑުވުމުގެ މައްސަލައަށް ހައްލެއް ގެނައުމުގެ ގޮތުން، ސްކޫލް ދަރިވަރުންނަށާއި އޮފީސް ގަޑިތަކަށް އަމާޒުކޮށް ޚާއްސަ ބަސްތަކެއް ދަތުރުކުރަން ފެށުމަށް ސަރުކާރުން ނިންމައިފިއެވެ.
މިކަމާ ގުޅޭ ތަފްސީލު ހާމަކުރައްވަމުން އިޤްތިސާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުހައްމަދު ސައީދު، "އަހާ" ފޯރަމުގައި ވިދާޅުވީ، މާލެ ސަރަހައްދުގައި ރަޖިސްޓްރީކޮށްފައިވާ އުޅަނދުފަހަރުގެ އަދަދު 130،000 އިން މައްޗަށް އަރާފައިވުމަކީ މަގުތައް ތޮއްޖެހޭ މައިގަނޑު ސަބަބު ކަމަށެވެ. އެހެންކަމުން މާލޭގައި ވެހިކަލް އިތުރުވުން ކޮންޓްރޯލްކޮށް، އާންމު ދަތުރުފަތުރު (މާސް ޓްރާންސްޕޯޓް) ބޭނުންކުރާ މިންވަރު އިތުރުކުރުމަށް ސަރުކާރުން އިސްކަންދޭ ކަމަށް ވަޒީރު ފާހަގަކުރެއްވިއެވެ.
އައު ޕްލޭނުގެ ދަށުން، ކާރޫބާރޫ ބޮޑުވާ ވަގުތުތަކުގައި ހުޅުމާލޭގެ ދެ ފިޔަވަހިން މާލެއަށް ދަތުރުކުރާނެ ބަސްތަކުގެ އިތުރުން، ކިޔަވާ ކުދިންނަށް ޚާއްސަ ރައްކާތެރި އަދި ފަސޭހަ ބަސްތަކެއް ޚިދުމަތަށް ނެރުމަށް ދަނީ ތައްޔާރުވަމުންނެވެ. މި މަޝްރޫޢުތައް ވިލަރެސްކުރުމަށް ވަކި ޚާއްސަ އޮފީހެއް މިހާރު ޤާއިމުކޮށްފައިވާ ކަމަށްވެސް ވަޒީރު ހާމަކުރެއްވިއެވެ.
"ފޭސް 2 އަދި ފޭސް 1އިން އެކި ބޭނުންތަކަށް މާލެއަށް ވަޑައިގަންނަވާ ބޭފުޅުންނާއި، އަދި މާލެއިން އެކި ބޭނުންތަކަށް ރަޝް އަވާސްތަކުގައި ހުޅުމާލެއަށް ވަޑައިގަންނަވާ ބޭފުޅުންނަށް މި ޕްލޭންގެ ތެރޭގައި ހިމެނޭނެ ފޭސް 2އިން ވެލަނާގެ ސަރަހައްދަށް އަދި ގްރީން ޒޯންތަކަށް ވަކި ގަޑިތަކެއްގައި ދަތުރުކުރާ ބަސްތަކެއް ތައާރަފްކުރުން. އަދި އަޅުގަނޑުމެން މި ގަސްތުކުރަނީ ސްކޫލްތަކަށް ދަތުރުކުރާ ސްކޫލް ފްރެންޑްލީ ބަސްތަކެއް ތަޢާރަފްކުރުމަށްވެސް" ސައީދު ވިދާޅުވިއެވެ.
މާލެއަކީ ޖާގަ އިތުރަށް ބޮޑުކުރެވެން ނެތް ތަނެއްކަން ފާހަގަކުރައްވަމުން ސައީދު ވިދާޅުވީ ސަރުކާރުގެ މައިގަނޑު އަމާޒަކީ މާލެއަކީ ވެހިކަލް ރަޖިސްޓްރޭޝަން ކޮންޓްރޯލްޑް ޒޯނަކަށް ހަދައި، ވެހިކަލް މަދުކުރުމާއެކު މާސް ޓްރާންސްޕޯޓަށް ބަރޯސާވާ މިންވަރު އިތުރުކުރުން ކަމަށާއި މި މަސައްކަތްތައް ހަރުދަނާކޮށް ކުރިއަށް ގެންދިއުމުގެ ގޮތުން، ޓްރެފިކް މައްސަލަތައް ހައްލުކުރުމަށް ޚާއްސަ މިނިވަން އޮފީހެއް ޤާއިމްކޮށް މިހާރު އަމަލީ މަސައްކަތް ފަށާފައިވާ ކަމަށެވެ.
