ރައީސް ޑރ. މުޙައްމަދު މުޢިއްޒު ފަށްޓަވާފައިވާ ވަޠަނީ ޚިދުމަތް ޕްރޮގްރާމްގެ ވާހަކަ ދެކެވުނު ދުވަސްވަރު ގިނަ ބައަކަށް ވިސްނިފައި އޮތީ އެއީ ވަރަށް އާދައިގެ ކަމެއްގެ ގޮތުގައެވެ. ނުކުންނާނެ ނަތީޖާއާއިމެދު ގިނަ ބައަކު ތިބީ ޝައްކެއްގެ މަތީގައެވެ.
ޕްރޮގްރާމް ފެށި ދަރިވަރުން ފާސްވެ ވަޒީފާ ލިބެން ފެށުމުން ހުރިހާ ޢާއިލާތަކަކުންހެން މިހާރު ތިބީ ފުރުބަތަކަށް އެދިއެދިއެވެ. މައިން ބަފައިން އެންމެ އެދޭނެކަމަކަށްވާނީ ދަރިންނަށް ރަނގަޅު ގޮތް މެދުވެރިވުންކަމަށްވާތީއެވެ. މުޖުތަމަޢުން ބާކީވެ، ވަޒީފާ ނުލިބި، މުޖުތަމަޢުއަށް ދަރިން ވިއްސި ވިހާލިވެގެން ދިއުމުން އެންމެ ބޮޑަށް ހިތާމަކުރަން ޖެހެނީ މައިންބަފައިންނަށް ކަމަށްވާތީއެވެ.
ތަފާތު ސަބަބުތައް މެދުވެރިވެ ޑްރަގް ޑީލަރުންނާއި ދަރިން ގުޅުމުން މައިންބަފައިންނަށް ތިބެންޖެހެނީ ކަރުނައަލައަޅައެވެ. ނަމަވެސް ކުރެވޭނެ ކަމެއް ނެތުމުން ރޯންތިބުން ނޫނީ ކުރެވޭނެ ކަމެއް ނެތިފައެވެ. މަސައްކަތުގެ ދާއިރާއަށް ނުކުންނަން ބޭނުންނުވާ ޒުވާނުން ގިނަވުމުން މަސައްކަތްކުރުވަން ގެންނަންޖެހޭ ބިދޭސީންގެ ޢަދަދު ގިނަވެ މިއަދު މިވަނީ ބޮޑު ޤައުމީ ނުރައްކަލަކަށްވެފައެވެ. އަޚްލާޤީ މައްސަލަތައް ގިނަވެ މުޅި ޤައުމަށް މިވަނީ ބޮޑު ކާރިސާއެއް ކުރިމަތިވެފައެވެ.
މިޙާލަތުގެ ވާހަކަ ހުރިހާ ރައީސުންވެސް ދެއްކެވިއެވެ. ކަންބޮޑުވުން ފައުޅުކުރެއްވިއެވެ. ނަމަވެސް ޙައްލެއް ހޯދަން ކުރެވުނު މަސައްކަތެއް ފެންނާކަށް ނެތެވެ. އެކަމުގެ ސަބަބުން ލިބުނު ބޮޑު މާޔޫސްކަމުގައި ތިއްބައި ރައީސް ޑރ. މުޙައްމަދު މުޢިއްޒު ފެށްޓެވި ވަޠަނީ ޕްރޮގްރާމްގެ ނަތީޖާ މިވަނީ ކުރުމުއްދަތެއްގައި ފެންނަން ފަށައިފައެވެ.
ދިވެހި ވަތަނީ ޚިދުމަތް: ޤައުމީ ޖީލެއް ބިނާކުރުމުގެ ފަޚުރުވެރި އެއް އަހަރު!
ޤައުމެއްގެ އެންމެ އަގުބޮޑު ރައުސްމާލަކީ އެ ޤައުމެއްގެ ޒުވާނުންނެވެ. ޤައުމުގެ ކުރިމަގު އުޖާލާވެގެންދާނީ އިސްލާމީ ރިވެތި އަޚްލާޤުން ޒީނަތްތެރިވެފައިވާ، ޤައުމުދެކެ ލޯބިވާ، އަދި އަމިއްލަ ނަފްސުގެ މައްޗަށް އިތުބާރު އޮތް ޒިންމާދާރު ޒުވާން ޖީލެއް ބިނާކުރެވިގެންނެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިސްނެންގެވުމުގެ މަތިން ފެއްޓެވި "ދިވެހި ވަތަނީ ޚިދުމަތް" ޕްރޮގްރާމަކީ ރާއްޖޭގެ ތާރީޚުގައި ލިޔެވިގެންދިޔަ ރަން ބޮޅެކެވެ. 1 އޮކްޓޫބަރު 2025 ގައި ޅ. މާފިލާފުށީގައި ފެށިގެންދިޔަ މި ޤައުމީ މަޝްރޫއަށް މިދިޔަ ބުރާސްފަތި ދުވަހަށް ފަޚުރުވެރި އެއް އަހަރު ފުރިގެންދާއިރު، މިއީ މުޅި ޤައުމުގެ މުސްތަޤުބަލު އުޖާލާކުރުމަށް އެޅުނު ވަރަށް ވަރުގަދަ އަދި ހަރުދަނާ ބިންގަލެކެވެ.
ފާއިތުވި އެއް އަހަރު ދުވަހުގެ ތެރޭގައި މި ޕްރޮގްރާމުން ވަނީ ފާހަގަކޮށްލެވޭ ފަދަ ބޮޑެތި ކާމިޔާބީތަކެއް ހާސިލުކޮށްފައެވެ. އެގޮތުން، މިހާތަނަށް ހިންގުނު ތިން ބެޗަކުން ޖުމްލަ 1,028 ޒުވާނުން ވަނީ ތަމްރީނުތައް ފުރިހަމަކޮށް ދަސްވެނިވެފައެވެ. މީގެ ތެރޭގައި 842 ފިރިހެން ޒުވާނުންނާއި 186 އަންހެން ޒުވާނުން ހިމެނެއެވެ. ތަފާސްހިސާބުތަކަށް ބަލާއިރު، ފުރަތަމަ ބެޗުން 344 ދަރިވަރުން، ދެވަނަ ބެޗުން 343 ދަރިވަރުން އަދި ތިންވަނަ ބެޗުން 341 ދަރިވަރުން ވަނީ އަސާސީ ތަމްރީނު ފުރިހަމަކޮށް މުޖުތަމަޢަށް ނުކުމެފައެވެ. މި އަދަދުތަކުން ދައްކުވައިދެނީ ދެ ޖިންސުގެ ޒުވާނުންގެ މެދުގައި މި ޤައުމީ ޚިދުމަތަށް އޮތް ޝައުޤުވެރިކަމާއި އިތުބާރެވެ.
މި ޕްރޮގްރާމްގެ ތެރެއިން ހަމައެކަނި އަސާސީ ތަމްރީނު ދިނުމުގެ އިތުރުން، ޒުވާނުންގެ އަމަލީ ޤާބިލުކަން އިތުރުކުރުމަށްޓަކައި ޚާއްސަ ހުނަރުތައް ދަސްކޮށްދޭ އެން.އެސް.އެސް.ޓީ (ނޭޝަނަލް ސަރވިސް ސްކިލްސް ޓްރެއިނިންގ) ގެ ތަމްރީނުތައްވެސް ވަނީ ފަށާފައެވެ. އެގޮތުން، މި ސްކިލްސް ޓްރެއިނިންގގެ ފުރަތަމަ ބެޗުން 63 ދަރިވަރުން ދަސްވެނިވެފައިވާއިރު، މިހާރު ތަމްރީނުވަމުން އަންނަ ދެވަނަ ބެޗުގެ 73 ދަރިވަރުން އަންނަ އޮކްޓޫބަރު މަހުގެ 3 ވަނަ ދުވަހު ދަސްވެނިވުމަށް ވަނީ ހަމަޖެހިފައެވެ. އަސާސީ ތަމްރީނުތަކުން ހޮވާލެވޭ ކުދިންނަށް ޚާއްސަކޮށްގެން ކުރިއަށްގެންދާ މި ހުނަރު ތަރައްޤީކުރުމުގެ ޕްރޮގްރާމުގައި މިހާރުވެސް 136 ދަރިވަރުން ތަފާތު ދާއިރާތަކުން ތަމްރީނުވަމުންދެއެވެ. އަދި މިއަހަރުގެ ފަހުކޮޅުގައި ފެށުމަށް ހަމަޖެހިފައިވާ އައު ބެޗުތަކާއެކު، އިތުރު 436 ޒުވާނަކު މި ޤައުމީ ވާޖިބު އަދާކުރުމަށް ސަފުތައް ރުކުރުވާލައި ތައްޔާރުވަމުންދާކަމީ މި ޕްރޮގްރާމުގެ ފުޅާކަން ހާމަކޮށްދޭ ކަމެކެވެ.
ދިވެހި ވަތަނީ ޚިދުމަތުގެ އެންމެ ފާހަގަކޮށްލެވޭ އެއް ސިފައަކީ، މިއީ ވަކި ސަރަހައްދަކަށް ހާއްސަނުވެ މުޅި ރާއްޖެ ޝާމިލުވާ ގޮތަށް ކުރިއަށްގެންދެވޭ ޕްރޮގްރާމަކަށް ވުމެވެ. އުތުރުން ދެކުނަށް ބަލާއިރު، ހއ. އަތޮޅުން 65 ދަރިވަރުން، ހދ. އަތޮޅުން 95 ދަރިވަރުން، ށ. އަތޮޅުން 62 ދަރިވަރުން އަދި ޅ. އަތޮޅުން 23 ދަރިވަރުން ވަނީ ބައިވެރިވެފައެވެ. އެންމެ ގިނަ އަދަދަކަށް ބައިވެރިން ތަމްރީނު ފުރިހަމަކޮށްފައިވަނީ ކ. އަތޮޅުން ކަމަށްވާއިރު، އެއީ 155 ދަރިވަރުންނެވެ. ހަމައެއާއެކު، ދެކުނުގެ ތ. އަތޮޅުން 73 އަދި ލ. އަތޮޅުން 99 ދަރިވަރުން ވަނީ މި ޝަރަފުވެރި ތަމްރީނު ފުރިހަމަކޮށްފައެވެ. މިއަދު ހއ. އިން ފެށިގެން އައްޑޫ ސިޓީއާ ހަމައަށް، ރާއްޖޭގެ ކޮންމެ އަތޮޅެއްގައިވެސް މި ތަމްރީނު ފުރިހަމަކޮށް، ޤައުމަށް ޚިދުމަތްކުރުމުގެ އަޒުމުގައި ތިބި ހީވާގި ޒުވާނުން އެބަތިއްބެވެ.
މި ތަމްރީނުތަކުގެ ސަބަބުން ޒުވާނުންގެ ވިސްނުމަށާއި އަޚްލާޤަށް އައިސްފައިވާ ހެޔޮ ބަދަލަކީ ބެލެނިވެރިން މިއަދު ނުހަނު އުފަލާއެކު ފާހަގަކުރާ ކަމެކެވެ. ދަރިވަރުންގެ އުޅުމާއި ގުޅުމަށް ރަނގަޅު ބަދަލުތަކެއް އައިސް، އިސްލާމީ އުސޫލުތަކާއި ދީނީ ކަންކަމަށް ދޭ އަހައްމިއްޔަތުކަން ވަނީ އިތުރުވެފައެވެ. އަދި އަމިއްލަ ދިރިއުޅުމުގެ ކަންކަން ތަރުތީބުކޮށް، ދިމާވާ ގޮންޖެހުންތަކާ ކެރިގެން ކުރިމަތިލުމުގެ ޤާބިލުކަން އެކުދިންގެ ކިބައިގައި ވަނީ އަށަގަނެފައެވެ. މިއީ މާޒީގައި އަޅުގަނޑުމެންގެ ކާބަފައިން ދީނާއި ޤައުމުގެ ހަައްޤުގައި ވެވަޑައިގެންނެވި ޤުރުބާނީތަކާއި ކުރެއްވި ބުރަ މަސައްކަތްތައް އަންނަން އޮތް ޖީލުތަކަށް ދަމަހައްޓައި، ޤައުމީ ލޯބި ހިތްތަކުގައި ދިރުވުމަށް އެޅުނު ވަރަށް މުހިންމު ފިޔަވަޅެކެވެ.
ޒުވާނުން ބާރުވެރިކުރުވުމަކީ ހަމައެކަނި ތަމްރީނު ދިނުމަކުން ނިމޭ ކަމެއް ނޫނެވެ. އެހެންކަމުން، ސަރުކާރުން ވަނީ މި ޕްރޮގްރާމް ނިންމާ ދަރިވަރުންގެ މުސްތަޤުބަލު އުޖާލާކުރުމަށް ގިނަ ފުރުސަތުތަކެއް ފަހިކޮށްދީފައެވެ. މިގޮތުން، ވޭތުވެދިޔަ އެއް އަހަރުގެ ތެރޭގައި ވަތަނީ ޚިދުމަތް ފުރިހަމަކުރި 400 އަށްވުރެ ގިނަ ޒުވާނުންނަށް ވަނީ ވަޒީފާގެ ފުރުސަތު ހަމަޖައްސައިދެވިފައެވެ. މީގެ އިތުރުން، ތަމްރީނު ނިންމާ ފަރާތްތަކަށް އަމަލީ މައިދާނުގައި އިތުރު ތަޖުރިބާ ހޯދައިދިނުމުގެ ގޮތުން ޚާއްސަ އިންޓަރންޝިޕް ޕްރޮގްރާމެއް ފެށުމަށްވެސް ސަރުކާރުން ވަނީ ނިންމަވާފައެވެ.
"ދިވެހި ވަތަނީ ޚިދުމަތް" ޕްރޮގްރާމަކީ ދިވެހިރާއްޖޭގެ އިޖުތިމާއީ އަދި އިޤްތިސާދީ މައިދާނަށް އިންޤިލާބީ ބަދަލެއް ގެނެސްދިން، ނުހަނު ބޭނުންތެރި ޤައުމީ މަޝްރޫއެކެވެ. ފާއިތުވި އެއް އަހަރު ދުވަހުގެ ކާމިޔާބީން ހާމަވެގެންދަނީ މި ޕްރޮގްރާމުގެ ސަބަބުން ދިވެހި ޒުވާނުންނަކީ ދީނަށް ލޯބިކުރާ، ޤައުމިއްޔަތު ދަމަހައްޓާ، އަދި ޤައުމު ބިނާކުރުމުގައި އިސްނަގާނެ ޒިންމާދާރު ބަޔަކަށް ވެގެންދާނެ ކަމުގެ ފުރިހަމަ ޔަޤީންކަމެވެ. މިއީ ޝައްކެއްވެސް ނެތް ގޮތުގައި މުޅި ދިވެހި އުންމަތަށް ލިބުނު އައު އުންމީދަކާއި ދިރުމެކެވެ.
