ކޮންމެ ދިވެހި ރައްޔިތަކަށް ސީދާ މާލީ ފައިދާ ލިބޭގޮތަށް ސަރުކާރުން 10 ރިސޯޓު ތަރައްޤީކުރުމަށް ނިންމާފައިވާ ނިންމުމަކީ ދިވެހިރާއްޖޭގެ ފަތުރުވެރިކަމުގެ ތާރީޚުގައިވެސް އަންނާނެ އެންމެ ބޮޑު އެއް ބަދަލު ކަމަށް، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މާޓީ)ގެ ޗެއަރމަން އަދި މި ދާއިރާގެ އިސް ޚިދުމަތްތެރިއެއް ކަމަށްވާ ހުސައިން އަފީފު (ޗަމްޕާ އަފީފު) ވިދާޅުވެއްޖެއެވެ.
ޤައުމީ ފަތުރުވެރިކަމުގެ ދުވަސް ފާހަގަކުރުމަށް ބޭއްވި ޚާއްސަ ރަސްމިއްޔާތުގައި ވާހަކަފުޅު ދައްކަވަމުން އަފީފު ވަނީ ސަރުކާރުގެ މި މަޝްރޫއަށް ފުރިހަމައަށް ތާއީދުކުރައްވާކަން ހާމަކުރައްވާފައެވެ. އަދި އަމިއްލަފުޅަށްވެސް މި މަޝްރޫއުގައި ބައިވެރިވެވަޑައިގަތުމުގެ ޝައުޤުވެރިކަން ފާޅުކުރައްވަމުން އޭނާ ވިދާޅުވީ، "މިކަމުގައި ބައިވެރިވާންވެސް ބޭނުން. އަދި މި މަޝްރޫއު ކާމިޔާބުވާނެ ކަމަށް ވަރަށް ބޮޑަށް އުއްމީދު ކުރަން،" ކަމަށެވެ. ސަރުކާރުގެ ކުންފުންޏެއް މެދުވެރިކޮށް ކުރިއަށް އޮތް ތިން އަހަރުގެ ތެރޭގައި 10 ރަށެއް ރިސޯޓުގެ ގޮތުގައި ތަރައްޤީކޮށް، އެއިން ލިބޭ ފައިދާއިން ކޮންމެ ދިވެއްސަކަށް އަހަރަކު 400 ޑޮލަރު ދިނުމަށް ސަރުކާރުން އިއުލާންކުރީ މި އަހަރުގެ ކުރީކޮޅުއެވެ.
ރާއްޖޭގެ ފަތުރުވެރިކަން މިއަދު އޮތް ހިސާބަށް އައުމުގެ ކުރިން އުފުލަންޖެހުނު ބުރަތަކަށް އަލިއަޅުވާލައްވަމުން އަފީފު ވިދާޅުވީ، 1970ގެ އަހަރުތަކުގައި ޓޫރިޒަމް ފެށުމަށް ނުކުތް ޒުވާނުންނަށް ކުރިމަތިވި އެންމެ ބޮޑު ގޮންޖެހުމަކީ ދުނިޔޭގެ މެޕުގައި ރާއްޖެ އޮތް ތަންވެސް ބޭރުގެ ފަރާތްތަކަށް ނޭނގުން ކަމަށެވެ. އެގޮތުން ޔޫރަޕުގެ ޤައުމުތަކަށް ގޮސް ރާއްޖެއަކީ އޮތް ޤައުމެއްކަން ކިޔައިދޭން ޖެހުނު ކަމަށާއި، ޖަރުމަނުގެ އައިޓީބީ ފެއާ ފަދަ ބޮޑެތި މައުރަޒުތަކުގައި ވޯލްޑް މެޕުން އަމިއްލައަށް ރާއްޖެ ޕިންޕޮއިންޓްކޮށްދީގެން މެނުވީ ބޭރުގެ ޓުއާ އޮޕަރޭޓަރުންނަށް ރާއްޖެއަކީ ސީރިއަސް މަންޒިލެއްގެ ގޮތުގައި ޤަބޫލުކުރަން ދަތިވިކަން އޭނާ ފާހަގަކުރެއްވިއެވެ.
އޭރު ރާއްޖޭގައި ބޭންކިންގ ނިޒާމެއް ނެތުމުން، ރިސޯޓުތައް ތަރައްޤީކުރީ ބޭރުގެ ޓުއާ އޮޕަރޭޓަރުންގެ އެހީތެރިކަމާއެކުގައެވެ. ނަމަވެސް ހުއްޓާނުލައި ކުރި މަސައްކަތުން ދާއިރާއަށް ބޮޑެތި ކުރިއެރުންތަކެއް ލިބުނެވެ. ރާއްޖޭގެ ޓޫރިޒަމް ބަދަލުކޮށްލި މައިގަނޑު ކަންކަމުގެ ތެރޭގައި 80ގެ އަހަރުތަކުގައި އައު އެއާލައިންތަކުގެ ދަތުރުތައް ފެށުމާއި، ރިސޯޓުތަކުން އިސްނަގައިގެން ފަތުރުވެރިން އުފުލަން ޚާއްސަ ފެރީތައް ހަމަޖެއްސުމުގެ އިތުރުން 1996 ވަނަ އަހަރު ދުނިޔޭގެ މަޝްހޫރު ހޮޓެލް ޗެއިން "ހިލްޓަން" ރާއްޖެއަށް ތައާރަފުވުން ހިމެނެއެވެ.
އަފީފު ވިދާޅުވީ، މާޒީގައި ކުރި ބުރަ މަސައްކަތުން ރާއްޖެ ދުނިޔޭގެ އެންމެ ކުރިއަރާފައިވާ މަންޒިލަށް ވެގެންދިޔަ ފަދައިން، ސަރުކާރުން މިހާރު އިއުލާންކޮށްފައިވާ 10 ރިސޯޓުގެ މަޝްރޫއާއެކު ދިވެހި ރައްޔިތުންނަށް އޭގެ ސީދާ މަންފާ ލިބި، ފަތުރުވެރިކަމުގެ ދާއިރާއަށް އަނެއްކާވެސް އިންގިލާބީ ކުރިއެރުމެއް ލިބިގެންދާނެ ކަމަށެވެ.
