އެއީ ތަނަވަސް ދެމަފިރިންނެވެ. ދެމަފިރިންވެސް ހިންގަނީ އަމިއްލަ ވިޔަފާރިއެވެ. ފިރިމީހާ މަސައްކަތް ނިންމާފައި އަވަހަށް ގެއަށް އައުދެއެވެ. ގެއަށް އައިސް އަނބިމިހާއަށް އިންތިޒާރުކުރެއެވެ.
އަނބިމީހާއަށްވާގޮތަކީ އެންމެ ބޮޑު ސަމާލުކަމެއް ދެވެނީ މަސައްކަތަށެވެ. އެހެންވެ ހުރިހާ މަސައްކަތެއް ނިންމާފައި ގެއަށްދާން ވިސްނާތީ ގެއަށް ދެވުން ލަސްވަނީއެވެ. އިސާހިތަކު ފިރިމީހާ ކަންބޮޑުވުން ފައުޅުކުރަން ފަށައިފިއެވެ. އެކުގައި ވަޤުތު ހޭދަނުކުރެވޭތީއެވެ. އެކުގައި ކައިބޮއި ނުހެދޭތީއެވެ. ނިދަން އޮށޯންނައިރު އަނބިމީހާ ވަރުބަލިވެފައި ހުންނަލެއް ބޮޑުކަމުން އޭނާއަށް ސަމާލުކަންނުދީ ނިދާތީއެވެ. ކުރިން ހަފްތާ ބަންދު އެކުގައި ހޭދަކުރެވިފައި މިހާރު އެވަރުވެސް ނުވާތީއެވެ.
ހައަކަ މަސްދުވަސް ފަހެވެ. އެއްރޭ އަނބިމީހާ ގެއަށް އައުމުން ނޯކަރަކު ދިއްކޮށްލީ ފިރިޟިހާގެ ނޯޓެކެވެ. "މިއީ ދެމީހުންގެ ގެއެވެ. މިއަގު ބޮޑު ގެވެސް ކަލާއަށެވެ. ގޭގައި ހުރި ހުރިހާ އެއްޗެއްވެސް ކަލާއަށެވެ. އަހުރެންނަށް ދެން ގުޅަންވާނީ އަހުރެންގެ ޙައްޤުތައް އަދާކުރެވޭނެ ނަމައެވެ. ރަނގަޅަށް ވިސްނާފައި ގޮތެއް ނިންމާށެވެ. ހުރިހާ ކަމެއްވެސް އެކުވެރިކަމާއެކު ޙައްލުކުރެވޭނެ ކަމަށް އުންމީދުކުރަމެވެ."
އަނބިމީހާއަށް ވަރަށް އަސަރުކުރިއެވެ. ފިރިމީހާ ކޮބައިތޯ ގޫގްލްކޮށްލިއިރު މަޝްހޫރު ހޮޓަލެއްގައެވެ. ހީކުރެވުނީ ލޯބިވެރިއަކު ހޯދައިގެން ހޮޓަލަކަށް ދިއައީ ކަމަށެވެ. އެހެންވެ އަވަސްއަވަހަށް އެހޮޓަލަށްގޮސް މައުލޫމާތު އޮޅުންފިލުވައިގެން ގޮސް ކޮޓަރީގެ ބެލްޖެހިތަނާ ދޮރުހުޅުވައިފިއެވެ. ހުރީ ނިދާ ހެދުމުގައެވެ.
އަނބިމީހާ ވަރަށް ދެރަވެފައި ކަންކަން އިޞްލާޙްކުރާނެކަމުގެ ޔަޤީންކަން ދިނުމުން ފިރިމީހާ އަނބިމީހާގެ އާދޭސް ޤަބޫލުކޮށް އެނބުރި ގެއަށްދާން ނުކުންނަމުން ބުންޏެވެ. "އެއް އެނދުގައި ދެފަރާތަށް އެނބުރި ތިބެ ނިދުމަށްވުރެ އެކަނި އޮވެ ނިދަން މާފަސޭހަކަން މިރޭ އެނގިއްޖެއެވެ."
މިއީ ބިޒީކަން ބޮޑުވި އަނތބެއްގެ ވާހަކައެވެ. ފިރިމީހާގެ ބިޒީކަން ބޮޑުވިނަމަވެސް މިކަންކަން މެދުވެރިވާނީ ހަމަ މިފަދަ ގޮތަކަށެވެ. ވީމާ ވެރިމީހާކަމަށްވިޔަސް މުވައްޒިފަކަށްވިޔަސް ދެމަފިރިންގެ ގުޅުމަށް ނުވިސްނައި މަސައްކަތުގަ ވަޤުތު ހޭދަކުރާނަމަ ބައިވެރިޔާގެ ކިބައިން ލިބެންޖެހޭ އުފާވެރިކަން ނުލިބޭތީ ޝަކުވާކުރުމެއް ނެތެވެ. އަދި ބައިވެރިޔާ ވަކިވެގެން ދިއަނަމަވެސް ކުރެވޭނެ ޝަކުވާއެއް ނެތެވެ. ކުރިމަތިވާނީ މިފދަ ގޮތެކެވެ. ކަންކަން އިޞްލާޙްކުރުން އޮތީ އެމީހެއްގެ އަތްމަތީގައެވެ.
މިޙާދިސާއިން ފާހަގަކުރެވުނު އެއްކަމަކީ އެޙާލަތަށް ކަންކަން ދިއުމުންވެސް ފިރިމީހާ ބޭވަފާތެރިނުވިކަމެވެ. ޤަބޫލުކުރަންޖެހޭނެ ކަމަކީ އެޙާލަތުގައި ކެތްތެރިވެވޭނީ މަދު މީހަކަށް ކަމެވެ.
- ފަހީމާ / މިއަދުނޫސް
