އެއީ ތަނަވަސް މަންމައެއްގެ ހުރި ހަމައެކަނި ދަރިފުޅެވެ. ޢުމުރުން 30 އަހަރުގައި ކައިވެނިކުރަން އުޅުމުން އެކަމަށް މަންމަ ހުރަސްއެޅިއެވެ. އަންހެން ކުއްޖާގެ ޢާއިލާއަށް ބިރުދެއްކިއެވެ. ހުރަސް އަޅަންލުރެވޭނެ ހުރިހާ ކަމެއް ކުރުމަށްފަހު ދަރިފުޅުގެ ގާތުގައި ބުނީ އެއީ ކަމުދާ ކުއްޖެއް ނޫންކަމަށާއި އެހެން މީހަކުދެކެ ލޯބިވެގެން އެމިހާއާއިއެކު ފުރައިގެންވެސް ހިނގައްޖެ ކަމަށެވެ.
ޙަޤީޤަތް މުޅިން ތަފާތެވެ. އެއަންހެން މީހާ ދެއްކި ބިރުތަކަށް ކެތްނުކުރެވިގެން މައިންބަފައިން އޭނާ ރަށަކަށް ފޮނުވައިލީއެވެ. ދެމީހުންނަށް ދެން ބައްދަލުނުވެވޭނެ ގޮތް ހެދުމަށެވެ. އަންހެން ކުއްޖާއަށް އެހެން ގޮތެއް ނެތުމުން މައިންބަފައިންގެ ބަސް ޤަބޫލުކުރަން މަޖުބޫރުވީއެވެ.
3 އަހަރު ފަހެވެ. ޒުވާނާއަށް އެރަށަށް ދެވުނީ އެކުވެރިންތަކަކާއިއެކު ޗުއްޓީއެއް ހޭދަކޮށްލާށެވެ. ގޮސް އުޅުމުގެ ތެރޭގައި ލޯބިވެރިޔާ ފެނުމުން ބާރަށް ކައިރިއަށްދިއައިރު ހުރީ 2 އަހަރުގެ ކުއްޖަކު ގޮވައިގެންނެވެ. ފުރަތަމަވެސް ސުވާލުކުރީ ކައިވެނިކުރީތޯއާއި މިއީ ދަރިއެއްތޯއެވެ؟ ޖަވާބުގައި ބުނީ ކައިވެނިނުކުރާ ކަމަށާއި މިއީ ދެމީހުންގެ ދަރިއެއް ކަމަށެވެ.
އެހެން ބުނެފައި ކަންކަން މެދުވެރިވި ގޮތް ކިޔައިދިނުމުން ޒުވާނާ ނިންމީ އެރަށުގައި ހުރެގެން ލޯބިވެރިޔާއާއި ކައިވެނިކުރާށެވެ. މާލެ އަންނަމުން އައީ އަނބިމިހާ ގޮވައިގެންނެވެ. އަނބިމީހާ މާލެ ގެނެސް ގެންދިއައީ އޭނާގެ ގެއަށެވެ. އަދި ގެއަށް ނުގޮސް އެގޭގައި ދިރިއުޅެން ފެށީއެވެ.
މަންމައަށް އެކަން އެނގުނީ 3 ދުވަސްފަހުންނެވެ. އެނގުމާއިއެކު އެގެއަށް ގޮސް ދެމަފިރިންނާއި ބައްދަލުކުރުމުން ދަރިފުޅު ބުނީ މަންމަގެ ތަނަވަސްކަން މަންމައަށް ކަމަށެވެ. އޭނާ ދިރިއުޅޭނީ އަނބިމިހާއާއިއެކުގައި ކަމަށެވެ. އިތުރަށް ދެއްކޭނެ އެއްވެސް ވާހަކައެއް ނެތްކަން އެނގުމުން ކައިވެންޏަށް ރުހި ގެއަށް ދެމަފިރިންނާއި ދަރިފުޅު ގެންދިއައީއެވެ.
ޅީދަރިފުޅު މައިދައިތަގެ ކިބައިން ބަދަލުހިފަން މަސައްކަތެއް ނުކުރެއެވެ. ފިރިމީހާއަށްޓަކައި މާފުކުރީއެވެ. ގޭގައި އުޅެމުން ގެންދިއައީ މަންމަ ކަމަށް ޤަބޫލުކޮށް ޤަދަރާއި އިޙްތިރާމްކުރަމުންނެވެ. ނަތީޖާއަކަށްވީ ޅީދަރިފުޅު ދެކެ ލޯބިވެވެން ފެށުމެވެ.
މިއީ އަޅުގަނޑުގެ އެކުވެރިއަކަށް ކަންކަން މެދުވެރިވި ގޮތެވެ. ބުނެލަން ބޭނުންވަނީ ދަރިން ގުޅެން ބޭނުންވާ މީހާއަކީ ހެޔޮލަފާ މީހެއްނަމަ އެކަމަށް ހުރަސްނުއަޅާށެވެ. އަދި ލޯބީގައި ދެމީހުން ތެދުވެރިނަމަ މަގެއް ފެނި ކައިވެނިވެސް ކުރެވޭނެއެވެ. ކައިވެނި ކުރެވުމުން އެއްވެސް މީހެއްގެ ކިބައިން ބަދަލުހިފަން ނުއުޅޭށެވެ. މާފުކުރުމުން ލިބޭނެ އުފާވެރިކަން މާބޮޑުވާނެއެވެ.
- ޒަޢީމާ / މިއަދުނޫހުގެ ކިޔުންތެރިއެއް
