އެއީ ވިޔަފާރިކުރަމުން އައި ބައްޕައެކެވެ. ކުރިމަތިވި ބައެއް މައްސަލަތަކުން އަރައިނުގަނެވިގެން ދަރަނިވެރިވީއެވެ. ލޯނުތައް ނުދެއްކިގެން ގެ ބޭންކަށް ނަގާހިށާބަށްދިއަތަނާ ތަނަވސް ޒުވާނަކު ހުށަހެޅުމެއް ހުށަހެޅިއެވެ. އެއީ އޭނާގެ ދެވަނަ ދަރިފުޅުގެ ކައިވެންޏެވެ. އެކައިވެނިކުރެވިއްޖެނަމަ ދަރަނިތައް އަދާކޮށް ގެ ސަލާމަތްކޮށްދޭނެ ކަމަށެވެ.
ވަރަށް ދެރަވެގެން ތިބެ ދެމަފިރިން އެކަމުގެ ވާހަކަ ދަރިފުޅާއި ދެއްކުމުން ދަރިފުޅު ބުނީ ނުވެސް ދަންނަ މީހަކާ ކައިވެނިކުރުމަކީ ކުރަން ފަސޭހަ ކަމެއް ނޫންކަމަށެވެ. ނަމަވެސް އޭނާއަކީ ﷲ އަށް ބިރުވެތިވާ މީހަކުނަމަ ޢާއިލާއަށްޓަކައި މިހުރީ ކައިވެނިކުރަން ރުހިގެން ކަމަށެވެ.
ޒުވާނާ އެގެއަށް އައިސް އޭނާއާއި ބައްދަލުކުރިއެވެ. ހަފްތާއެއްގެ ތެރޭގައި ކައިވެނިކުރުމަށް ނިންމިއެވެ. ކައިވެނީގެ ރަސްމިއްޔާތަށް ދިއުމުގެ ކުރިން ބައްޕަގެ ދަރަނި އަދާކުރާނެކަމަށްވެސް ބުންޏެވެ.
އެޒުވާނާ ވަރަށް ވިސްނާފައި ނިންމުންތަކެއް ނިންމިއެވެ. ރަންކިޔުއްވަން ފޮނުވީ ދަރަނިތައް އަދާކޮށްދިނުމަށްފަހު އެކަމުގެ ލިޔުންތަކާއިވެސް އެކުގައެވެ. ބުނީ ދަރަނިތައް އަދާކޮށްދިނީ ﷲ އަށްޓަކައި ކަމަށާއި ބޭނުން ނޫންނަމަ ކައިވެނި ނުކުރިނަމަވެސް މައްސަލައެއް ނެތްކަމަށެވެ.
އަންހެން ކުއްޖާވެސް ބުނީ ހަމަ އެފަދަ ވާހަކައެކެވެ. އޭނާވެސް ކަންކަން ނިންމީ ﷲ އަށް ވަކީލްކޮށްގެން ރަހްމަތަށް އެދިގެން ކަމަށާއި ދަރަނި އަދާކޮށް ނުދިނަސް ކައިވެނިކުރާނެ ވާހަކަ އޭނާގެ މަންމަގެ ގާތުގައި މީގެ ކުޑައިރުކޮޅެއް ކުރިން ބުނެފައިވާނެ ކަމަށެވެ.
އެކައިވެނިކުރެވުނެވެ. ކައިވެންޏަށް މިހާރު 17 އަހަރެވެ. ބުނަންހެއްޔެވެ؟ އެކައިވެންޏަށްފަހު އެޒުވާނާގެ ވިޔަފާރި ކުރިއަރައިގެން ދިއައީ ވަކިވަރަކަށް ނޫނެވެ. މިހާރު އޭނާއަކީ ރާއްޖޭގެ އިތުރަށް ބޭރު ދެޤައުމެއްގައިވެސް ވިޔަފާރިކުރާ މީހެކެވެ.
މިވާހަކަ މިއަދުނޫހުގެ ކިޔުންތެރިންގެ ސަމާލުކަމަށް މިގެނައީ އެންމެ ބޭނުމަކުއެވެ. އެއީ އަމިއްލަ އެދުމުގެ ކުރިއަށް ﷲ ގެ ރުހިވޮޑިގަތުން ބޭނުންވުން ލައިފިނަމަ އެކަމުން ކުރާނެ ފައިދާއެވެ. އަމިއްލަ އެދުމެއް އޮތަސް އެކަމުގެ ކުރިއަށް ﷲ ގެ ރުހިވޮޑިގަތުން އިސްކޮށްފި މީހަކަށް ދުނިޔޭގައިވެސް ހެޔޮ ގޮތްތައް މިންވަރުކުރައްވަވާނެކަން ޔަޤީންކޮށްލައްވާށެވެ.
- މިއަދުނޫހުގެ ކިޔުންތެރިއެއް
