ބަލިވެ އުޅެނިކޮށް ވަރަށް ފަހުން ނިޔާވި މީހެކެވެ.
އޭނާގެ ނިމުމާއިމެދު ވަކިގޮތަކަށް ބުނަނީއެއް ނޫނެވެ. ނަމަވެސް ވިސްނައިލުން މުހިންމު ކަމެއް ފާހަގަކޮށްލާނަމެވެ. އޭނާއަކީ ވަރަށް ތަޤްވާވެރިކޮށް އުޅެމުން އައި މީހެކެވެ. ނަމަވެސް ބަލިވެ އުޅެންޖެހުމުން އޭނާގެ ޢަމަލުތަކަށް ބަދަލުތައް އައެވެ. ދީނުގެ ކަންކަމަށް ފަރުވާކުޑަކުރަމުން ގޮސް ނަމާދުތަކަށްވެސް ފަރުވާކުޑަކުރިއެވެ.
އޭނާ ބައެއް އެކުވެރިންގެ ގާތުގައި ބުނެފައިވަނީ ބައްޔަށް ޝިފާ ނުލިބުމުން މާޔޫސްވީ ކަމަށެވެ. އޭނާއާއިމެދު ﷲ ތަޢާލާ ނިންމަވާނެ ގޮތއް ނުއެނގޭނެއެވެ. ނަމަވެސް އެނގޭ ކަމަކީ އޭނާގެ ނިމުން ރަނގަޅު ނޫންކަމެވެ. އެހެންކަމުން މިގެނެސްދެނީ މިފަދަ ޙާލަތެއް މެދުވެރިވެއްޖެނަމަ ވިސްނައިލުމުން ފައިދާކުރާނެ ލިޔުމެކެވެ. އިން ޝާ ﷲ
ކުޑަކުޑަ ހާދިސާއެއްގެ ވާހަކަ ކިޔައިދޭނަމެވެ!
އެއް ދުވަހަކު ހޮސްޕިޓަލަކަށް ދިއުމުން ބައްދަލުވި މީހަކު ބުންޏެވެ. "އަހަރެން މިއުޅެނީ ދީން ބަދަލުކުރަންވެގެންނެވެ. އަހަރެން މިހުރިހާ ދުވަހު އުޅުނީ އިސްލާމް ދީނުގައެވެ. ނަމަވެސް އަހަރެން ގަދަވޭތޯ ދުޢާކޮށްކޮށްވެސް ގަދައެއް ނުވިއެވެ.
ދެން ބަދަލުވަނީ ކޮން ދީނަކަށްތޯ ސުވާލުކުރުމުން 3، 4 ދީނަކަށް ބަދަލުވުމާއިމެދު ވިސްނާ ކަމަށް ބުނުމުން އަހަރެން ބުނީމެވެ. "ތިއިން އެއްވެސް ދީނެއްގައި ބަލި މީހަކު ހަމަ ނެތީ ހެއްޔެވެ؟ ތިއަ ބުނާ ދީންތަކުގައި ތިބި މާބަލި ބޮޑު މީހުން އަހަރެންނަށް އެނގެއެވެ."
ބައެއް މީހުން ވަރަށް ޞާލިޙްކަންމަތީގައި އުޅެނިކޮށް ކުރިމަތިވާ ދަތިތަކާއި ގުޅިގެން މިފަދަ ވިސްނުން ވިސްނައެވެ. މާލީ ދަތިވެ ނިކަމެތިކަމެއް ލިބުން، ބަލި ޙާލުގައި އުޅެން ޖެހުން ފަދަ ތަކްލީފްތަކާއި ގުޅިގެންވެސް މިފަދަ ގޮތްގޮތަށް ވިސްނައެވެ.
އެމީހުންނަށް ނުވިސްނޭ ކަމަކީ ﷲ ތަޢާލާ ތަކްލީފްތައް ޖައްސަވަނީ ކީއްވެގެން ކަމެވެ. އެއީ އިމްތިޙާން ކުރެއްވުން ކަމެވެ. އެކަން ޤަބޫލު ނުކުރެވޭނަމަ އެއިގެ މާނައަކީ އޭނާގެ ކިބައިގައި ޞާލިޙްކަމެއް ނެތްކަމެވެ. ހެޔޮލަފާ ޞާލިޙް އަޅުންނަކީ ކޮންމެ ދަތި ޙާލަތަކަށްވެސް ކެތްތެރިވާނެ މީހުންނެވެ. ކެތްތެރި ނުވެވޭނަމަ ތަޤްވާވެރިކަމުން އެވަނީ ވަރަށް ބޮޑު ބައެއް އުނިވެފައެވެ.
އެންމެ ހިތާމަހުރި ކަމަކީ ހެޔޮ އަމަލުތައް ކުރުމުގައި އުމުރުން ބޮޑުބައެއް ފާއިތުވާ ފަހުން ވެސް ބައެއް މީހުންނަށް ތަކްލީފްތައް ކުރިމަތިވާހިނދު ޝައިޠޯނާގެ ބަހަށް ހެއްލެވޭ ކަމެވެ. ކުރި ހުރިހާ ހެޔޮ ޢަމަލުތަކެއް އަތުން ބީވެގެންދާ ގޮތަށް މަރުވުމަށް މެދުވެރިވާ ކަމެވެ.
ވީމާ މިފަދަ ކަންކަމަށް ވިސްނާށެވެ! ހޭލުންތެރިވާށެވެ! ތަކްލީފް އިތުރުވާ ވަރަކަށް ތަޤްވާވެރިކަން އިތުރުކުރަން ގަދައަޅައި މަސައްކަތްކުރާށެވެ! ތަކްލީފް އުފުލަން ޖެހުމަކީ ﷲ ތައާލާ އާއި އިތުރަށް ކުއްތަންވެ ސުވަރުގެ ލިބިގަންނަން ކުރާ މަސައްކަތް އިތުރުކުރަން މިންވަރު ކުރެއްވެވި ރަނުގެ ފުރުޞަތަކަށް ހަދާށެވެ!
--މުފްތީ މެންކުގެ ދަރުސަކުން
