އަމީނީމަގު މަރާމާތުކުރުމުގެ މަޝްރޫޢުގެ ދެވަނަ ސެގްމަންޓްގެ މަސައްކަތް ފެށުމަށްޓަކައި އެ ސަރަހައްދު އާންމު ދަތުރުފަތުރަށް ބަންދުކޮށް، ޓްރެފިކް ފްލޯއަށް ބަދަލުތަކެއް ގެނައުމަށް ފުލުހުން ނިންމައިފިއެވެ.
މި ބަދަލުތަކާ ގުޅޭގޮތުން ފުލުހުން މައުލޫމާތު ދެއްވި ގޮތުގައި، ދެވަނަ ސެގްމަންޓްގެ އަމަލީ މަސައްކަތް 4 އޮކްޓޫބަރު 2026 ގައި ފެށުމަށް ވަނީ ހަމަޖެހިފައެވެ. އެހެންކަމުން، 3 އޮކްޓޫބަރު 2026 ވަނަ ދުވަހުގެ ރޭ މެދު(00:00) އިން ފެށިގެން އެ ސަރަހައްދު އާންމު ދަތުރުފަތުރަށް ބަންދުކުރެވޭނެއެވެ. އަދި އެ ވަގުތުން ފެށިގެން ސަރަހައްދުގެ ޓްރެފިކް ހަމަޖެހިގެންދާނީ ކަނޑައެޅިފައިވާ ޗާޓާ އެއްގޮތަށް ކަމަށްވެސް ފުލުހުން ބުންޏެވެ.
މީގެއިތުރުން، މަސައްކަތް ފެށުމަށް ހަމަޖެހިފައިވާ ސަރަހައްދުގައި ޕާކުކޮށްފައިވާ އެންމެހައި އުޅަނދުތައް، މަގު ބަންދުކުރުމަށް ކަނޑައެޅިފައިވާ ވަގުތުގެ ކުރިން ނެންގެވުމަށް ފުލުހުން ވަނީ އިލްތިމާސްކޮށްފައެވެ.
މި ބަދަލުގެ ސަބަބުން އާންމު ރައްޔިތުންނަށް ދިމާވެދާނެ ދަތިތަކަށްޓަކައި ފުލުހުން ވަނީ މާފަށް އެދިފައެވެ. އަދި މިފަދަ ބޮޑެތި މަޝްރޫޢުތައް ކުރިއަށްދާއިރު އާންމުންގެ ފަރާތުން ލިބެމުންދާ އެއްބާރުލުން ފާހަގަކޮށް، އެކަމަށްޓަކައި ފުލުހުން ވަނީ ޝުކުރު އަދާކޮށްފައެވެ.
