އަންނަ މަހު ބާއްވާ "ދިވެހީންގެ އުފެއްދުންތެރިކަމުގެ މައުރަޒު 2026" އަށް އާންމުން ހޭލުންތެރިކުރުވައި، އެކަމުގެ މައުލޫމާތާއި ފޯރި ގެނެސްދިނުމުގެ ގޮތުން ބާއްވާ ޚާއްސަ ހަރަކާތް 'ރެޑީ ސެޓް މަޢުރަޒު 26' މިއަދު ހުޅުމާލޭގައި ފަށައިފިއެވެ.
ބިޒްނަސް ސެންޓަރ ކޯޕަރޭޝަން (ބީސީސީ) އާއި މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް ގުޅިގެން ކުރިއަށްގެންދާ މި ހަރަކާތް އޮންނާނީ މިއަދު ހަވީރު 4:00 އިން ރޭގަނޑު 11:00 އަށް، ހުޅުމާލެ ފޭސް 1 ގެ ދިރާގު އޮފީސް ފަހަތުގައި އޮންނަ ބީޗް ސަރަހައްދުގައެވެ.
މުޅި އާއިލާއަށް ބައިވެރިވެވޭ ގޮތަށް ފަރުމާކޮށްފައިވާ މި ހަރަކާތުގައި ހަވީރުގެ ވަގުތުތަކުގައި ކުޑަކުދިންނަށް ޚާއްސަ ކުޅިވަރުތަކާއި ބައުންސީ ކާސަލް ފަދަ މަޖާ ކަންކަން ކުރިއަށްދާނެއެވެ. އަދި އިރުއޮއްސި ރޭގަނޑަށް އެޅުމުން، ފޯރިގަދަ ބޮޑުބެރުގެ ހުށަހެޅުންތަކާއެކު ތަފާތު މުނިފޫހިފިލުވުމުގެ ހަރަކާތްތައް ފެނިގެންދާނެ ކަމަށް ބީސީސީން މައުލޫމާތުދެއެވެ. މީގެ އިތުރުން މައުރަޒުގެ ސްޕޮންސަރުންނާއި ޕާޓްނަރުންވެސް މި ހަރަކާތުގައި ބައިވެރިވާނެއެވެ.
ދިވެހި އުފެއްދުންތަކާއި ވިޔަފާރިތަކަށް އާ ފުރުސަތުތައް ހުޅުވާލުމުގެ ގޮތުން ބާއްވާ "ދިވެހީންގެ އުފެއްދުންތެރިކަމުގެ މައުރަޒު 2026" އޮންނާނީ އަންނަ އޮކްޓޯބަރު 25 އިން ނޮވެމްބަރު 2 ގެ ނިޔަލަށް ހުޅުމާލޭ ސެންޓްރަލް ޕާކުގައެވެ.
މި މައުރަޒަށް އާންމުންނާއި ވިޔަފާރިތަކުގެ ބޮޑު ތަރުހީބެއް ލިބެމުންދާއިރު، މައުރަޒުގައި ބައިވެރިވުމަށް އެދި މިހާތަނަށް 800 އަށް ވުރެ ގިނަ ފޯމު ވަނީ ހުށަހަޅާފައެވެ. ޖުމްލަ 16 ދާއިރާއަކުން 73 ގިންތިއެއްގެ އުފެއްދުންތަކާއި ހިދުމަތްތައް ދައްކާލުމަށް ހަމަޖެހިފައިވާ މި މައުރަޒުގެ މުބާރާތުގެ ބައިގައި ވާދަކުރުމަށް އެކަނިވެސް 6،000 އަށް ވުރެ ގިނަ ދިވެހި އުފެއްދުން ވަނީ ރަޖިސްޓަރީ ކޮށްފައެވެ.
