ޒުވާނުންނަކީ އަޚްލާޤު ރަނގަޅު، ޒިންމާދާރު ބަޔަކަށް ހެދުމަށް ސަރުކާރުން އިސްކަންދީގެން ފެށި "ވަޠަނީ ޚިދުމަތް" ޕްރޮގްރާމުގެ މާޒީވީ އަހަރުގެ ނަތީޖާ ވަރަށް ފުރިހަމަކަމަށް ދިފާޢީ އަދި ވަޠަނީ ޚިދުމަތާބެހޭ ވަޒީރު ޙަސަން ރަޝީދު ވިދާޅުވެއްޖެއެވެ.
ވަޒީރު މިހެން ވިދާޅުވީ ނޭޝަނަލް ސަރވިސް ސްކިލް ޓްރޭނިންގގެ 2 ވަނަ ބެޗްގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.
މިދިޔަ އަހަރުގެ އޮކްޓޯބަރު 1 ގައި އަމަލީގޮތުން ފެށި މި ޕްރޮގްރާމަށް އަހަރެއް ފުރިގެން ދިޔައިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައެޅުއްވި އަމާޒަށްވުރެ ބޮޑު ކާމިޔާބީއެއް ހާސިލުކުރެވިފައިވާކަން ވަޒީރު ފާހަގަކުރެއްވިއެވެ. އެގޮތުން، އެއް އަހަރުގެ ތެރޭގައި 1,000 ދަރިވަރުން ތަމްރީނުކުރުމަށް އަމާޒު ހިފި ނަމަވެސް، 1,028 ބައިވެރިން ވަނީ ތަމްރީނުކޮށް ނިންމާފައެވެ.
"ޒުވާނުން ނޭދެވޭ އެކި މަގުތަކަށް އަނބުރާލަން ބާރުއަޅާ ފަރާތްތަކެއް އެބައުޅޭ. ނަމަވެސް، އެފަދަ ކަންކަމުން ޒުވާނުން ސަލާމަތްކޮށް، ހެޔޮމަގަށް އިއާދަކުރުމަށް ރައީސް ފެއްޓެވި މި ޕްރޮގްރާމަކީ މުޅި ދިވެހި މުޖުތަމަޢު އުފަލާއެކު ބަލައިގަތް ކަމެއް،" ވަޒީރު ވިދާޅުވިއެވެ.
ސަރުކާރުގެ މި އިސްނެގުމާއެކު، ގައުމުގެ އަސްލު ރޫޙު ދިރުވައި، ޒުވާނުންގެ މުސްތަޤުބަލު އުޖާލާކުރުމަށް ކުރެވޭ މަސައްކަތްތަކަށް ބޮޑު ތަރުޙީބެއް އަންނަނީ ލިބެމުންނެވެ.
