ހުޅުމާލޭގައި ޤަވާޢިދާ ޚިލާފަށް ޕާކުކޮށްފައިވާ އުޅަނދުތައް ޓޯވ ކުރުމުގެ ޚާއްސަ ހަރަކާތެއް ފުލުހުންނާއި އެޗްޑީސީ ގުޅިގެން ކުރިއަށްގެންގޮސްފިއެވެ.
މި ހަރަކާތަކީ ހުޅުމާލެ ޕޮލިސް އަދި ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) ގުޅިގެން ހުޅުމާލޭ ދެވަނަ ފިޔަވަހީގައި ކުރިއަށްގެންދިޔަ ޚާއްސަ އޮޕަރޭޝަނެކެވެ.
މި ހަރަކާތާ ގުޅޭގޮތުން އޭސީޕީ އާސިމް ޢަބްދުﷲ ވިދާޅުވީ، "އަޅުގަނޑުމެން މިއަދު މި ކުރިއަށްގެންދާ ހަރަކާތަކީ ހުޅުމާލޭގައި ދުވާރުތަކުގައި ޕާކުކޮށްފައިވާ އުޅަނދުތައް ޓޯވ ކުރުމުގެ ޚާއްސަ ހަރަކާތެއް. މިފަދަ ގޮތަކަށް ދުވާރުތަކުގައި އަދި މަގުމަތީގައި ދުއްވާ އުޅަނދުތަކަށް ދަތިވާގޮތަށް އަސްލު އުޅަނދުތައް ޕާކުކުރުމަކީ ހަގީގަތުގައި ވަރަށް ނުރައްކާތެރި ކަމެއް،" ކަމަށެވެ.
އޭނާ އިތުރަށް ފާހަގަކުރެއްވި ގޮތުގައި، މިފަދަ ހަރަކާތްތަކަކީ ހުޅުމާލެއަކީ އެންމެހައި ރައްޔިތުންނަށް އަމާން އަދި ހިތްފަސޭހަ ތަނަކަށް ހެދުމަށްޓަކައި ކޮންމެހެން ކުރިއަށްގެންދަންޖެހޭ މުހިންމު މަސައްކަތްތަކެކެވެ.
