ވަޒީފާއާ ބެހޭ ޓްރައިބިއުނަލްގެ އިންޑަސްޓްރިއަލް ރިލޭޝަންސް ޑިވިޝަންގެ މެންބަރު އަލްއުސްތާޛާ ފާޠިމަތު ސައުސަން ކުއްލި ގޮތަކަށް މިއަދު ފަތިހުގެ ވަގުތެއްގައި ނިޔާވެއްޖެއެވެ. އޭނާ ނިޔާވީ ބޭސްފަރުވާއަކަށް އިންޑިއާއަށް ކުރެއްވި ދަތުރުފުޅެއްގެ ތެރެއިންނެވެ.
ގާނޫނީ ދާއިރާގައި ގިނަ ދުވަސްތަކެއް ވަންދެން ޚިދުމަތް ކުރެއްވި ސައުސަން ވަނީ ގާނޫނީ ވަކީލެއްގެ ގޮތުންނާއި، އެކި މަގާމުތަކުގައި ގައުމަށް ގިނަގުނަ ޚިދުމަތްތަކެއް ކޮށްދެއްވާފައެވެ. ވަޒީފާއާ ބެހޭ ޓްރައިބިއުނަލްގެ މެންބަރުކަމުގެ މަގާމަށް އޭނާ އައްޔަންކުރެއްވީ 2 އޮކްޓޫބަރު 2024 ގައެވެ.
އަލްއުސްތާޛާ ފާޠިމަތު ސައުސަން ކުއްލި ގޮތަކަށް ވަކިވެދިއުމަކީ، ގާނޫނީ ދާއިރާއަށާއި ވަޒީފާއާ ބެހޭ ޓްރައިބިއުނަލަށް ލިބިގެންދިޔަ ބޮޑު ފުޅިއެކެވެ.
