ދިވެހި ވަޠަނީ ޚިދުމަތުގެ ޕްރޮގްރާމްތަކުގެ ތެރެއިން ނޭޝަނަލް ސަރވިސް އިނީޝިއަލް ޓްރެއިނިންގ ފުރިހަމަކުރާ ދަރިވަރުންނަށް އަމާޒުކޮށްގެން ކުރިއަށްގެންދިޔަ ފަންނީ ތަމްރީނު ޕްރޮގްރާމުގެ ދެވަނަ ބެޗު ނިންމައި، 73 ދަރިވަރަކު މިއަދު ދަސްވެނިވެއްޖެއެވެ.
މިއަހަރުގެ ޖޫން މަހުގެ 3 ވަނަ ދުވަހުން ފެށިގެން މިއަދުގެ ނިޔަލަށް 16 ހަފުތާގެ މުއްދަތަށް ކުރިއަށްގެންދިޔަ މި ތަމްރީންތަކުގައި ރާއްޖޭގެ 17 އަތޮޅަކުން ޖުމްލަ 75 ދަރިވަރުން ބައިވެރިވިއެވެ. މީގެ ތެރެއިން ކޯސް ކާމިޔާބުކަމާއެކު ނިންމާލި ދަރިވަރުންގެ ތެރޭގައި ހިމެނެނީ 60 ފިރިހެން ދަރިވަރުންނާއި 13 އަންހެން ދަރިވަރުންނެވެ.
އެ ދާއިރާތަކުން ތަޖުރިބާކާރު ސިފައިންގެ އިންސްޓްރަކްޓަރުން ކިޔަވައިދެއްވި މި ތަމްރީނު ޕްރޮގްރާމްގެ ތެރެއިން އަމަލީ ގޮތުން ބޭނުންތެރި ގިނަ ދާއިރާތަކަކުން ދަރިވަރުން ވަނީ ހުނަރުވެރިކަން ހޯދާފައެވެ. އޭގެ ތެރޭގައި ހިމެނޭ މައިގަނޑު ދާއިރާތަކަކީ އިންޖިނިއަރިންގ: އޮޓޯ މޯބައިލް އިންޖިނިއަރިންގ އަދި މެރިން އިންޖިނިއަރިންގޓެކްނިކަލް މަސައްކަތްތައް: އިލެކްޓްރީޝަން، ރެފްރިޖެރޭޝަން އެންޑް އެއަރ ކަންޑީޝަނިންގއުފެއްދުންތެރިކަން: ވެލްޑިންގ އަދި މެޓަލް ފެބްރިކޭޝަންއިދާރީ ހުނަރު: އޮފީސް މެނޭޖުމަންޓް އެވެ.
މި ތަމްރީނު ކާމިޔާބުކަމާއެކު ނިންމާލި ދަރިވަރުންނަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ޤަބޫލުކުރާ ލެވެލް 3 ގެ ސެޓިފިކެޓެއް ލިބިގެންދާނެއެވެ. މިއީ ޤައުމީ ޚިދުމަތަށް ނުކުންނަ ޒުވާނުން ފަންނީ ގޮތުން ބާރުވެރިކުރުވައި، ވަޒީފާގެ މައިދާނަށް އަހުލުވެރިކުރުވުމަށް އެޅުނު މުހިންމު ފިޔަވަޅެކެވެ.
