އަހަރަމެން ކޮންމެ މުސްލިމެއްގެވެސް އެންމެ ބޮޑު އެދުމަކީ އަހަރަމެންނަކީ މަތިވެރިވެގެންވާ ސުވަރުގޭގެ އަޙުލުވެރިން ކަމުގައި ވުމެވެ. ސުވަރުގޭގައި އަހަރަމެނަށްޓަކައި ވަނީ ޚާއްޞަ އެތައް ނިޢުމަތްތަކެއް ލައްވަވާފައެވެ.
މިގޮތުން މިދުނިޔޭގައި އަޅުގަނޑުމެނަށް ނުލިބޭނެ، ނަމަވެސް ހަމައެކަނި ސުވަރުގެވަންތަވެރިންނަށް ސުވަރުގެ ވަދެވުމުން ޚާއްޞަވެގެންވާ ހަތަރު ނިޢުމަތެއް މާތް ނަބިއްޔާ ﷺ ވަނީ ބަޔާންކޮށްދެއްވާފައެވެ.
މަރުވުމެއްނެތި އަބަދަށް ދިރިހުރުން:
ސުވަރުގޭގައި މަރުވުމެއް ނުވެއެވެ. ދުނިޔެއާއި ޚިލާފަށް، ސުވަރުގެއަކީ އެތާނގައި މަރުވުމުގެ ބިރުވެރިކަމެއް ނުވާ އެތާނގެ އަހުލުވެރިން ދާއިމަށް ދިރި ތިބޭ ތަނަވަސް ވެގެންވާ ނިޢުމަތުގެ ގޯއްޗެކެވެ.
ޒުވާންކަންމަތީ ދެމިހުރުން:
ސުވަރުގެވަންތަވެރިންނަށް ލިބިގެންވާ އަނެއް ނިޢުމަތަކީ ޒުވާންކަންމަތީގައި ދެމިހުރުމެވެ. ތިބާ މަރުވީ އުމުރުން ކިތަންމެ ދުވަސްވެ މުސްކުޅިވެފައި ހުއްޓާ ކަމުގައި ވީނަމަވެސް، ސުވަރުގޭގައި ތިބާ ވާހުށީ އުމުރުން 33 އަހަރުގެ ޒުވާނެއް ކަމުގައެވެ.
ސިއްޙަތު ސަލާމަތުން ހުރުން:
ސުވަރުގޭގެ އަހުލުވެރިން ލައްވަވާ ހުށީ ސިއްޙަތު ސަލާމަތުން ތިބި ބައެއްގެ ގޮތުގައެވެ. އެތާނގައި ބަލިވުމެއް ނުވެއެވެ. ސުވަރުގޭގައި ތިބާ ލައްވަވާހުށީ ނަފްސާނީ ގޮތުންނާއި ޖިސްމާނީ ގޮތުން ދުޅަހެޔޮ ޒުވާނެއް ކަމުގައެވެ.
ހިތްއެދޭ ކޮންމެ އެއްޗެއް ލިބުން:
ހަމައެކަނި ސުވަރުގެވަންތަވެރިންނަށް ޚާއްޞަވެގެންވާ އަނެއް ނިޢުމަތަކީ ބޭނުންވާ، ހިތްއެދޭ ކޮންމެ އެއްޗެއް ލިބުމުގެ ނިޢުމަތެވެ. ތިބާ ބޭނުންވާ ކޮންމެ އެއްޗެއް ލިބި ނިމުމުން، ހިތަށް އަރާނެއެވެ. ދެން އަހަރެން ބޭނުން އެއްޗެއް ނެތެވެ. ނަމަވެސް، އަނެއްކާވެސް ﷲ ސުބުޙާނަހޫ ވަތައާލާ ތިބާގެ ހިތުގައި އެ އެދުން ލައްވަވައެވެ. އަދި ތިބާ އެ އެދޭ ކަންތައްތައް ފުރިހަމަވެގެންދެއެވެ.
މި ނިޢުމަތްތައް ލިބުންއޮތީ މިއަދު ތިބާގެ ދިރިއުޅުން ބައްޓަންކުރި ގޮތެއްގެ މައްޗަށެވެ. ދުނިޔެއަކީ މަރުވުމެއްނެތި ދާއިމަށް ދެމިހުރެވޭނެ ތަނެއް ނޫނެވެ. އެހެންކަމުން ސުވަރުގޭގައި އަބަދަށް ދިރިހުރުމަށް، މިދުނިޔޭގައި މަރަށް ތައްޔާރުވާށެވެ. ސުވަރުގޭގައި ޒުވާންކަންމަތީ ދެމިހުރުމަށް، މިދުނިޔޭގައި ޒުވާނެއްގެ ގޮތުގައި ތިބާ ވީހިނދު، ﷲ ތަޢާލާ ލޯބިވެވޮޑިގަންނަވާފަދަ ޒުވާނެއް ކަމުގައި ވާށެވެ. ސުވަރުގޭގައި ސިޢްޙަތު ސަލާމަތުން ވުމަށްޓަކައި، މިދުނިޔޭގައި ބަލިޙާލަތު ކުރިމަތިވާހިނދު، ކެތްތެރިވާށެވެ. ހަމައެހެންމެ، ސުވަރުގޭގައި ހިތްއެދޭ ކޮންމެ އެއްޗެއް ލިބުމުގެ ނިޢުމަތް ލިބިގަތުމަށްޓަކައި، މިއަދު މިދުނިޔޭގައި ތިބާގެ ހިތްއެދޭ ކޮންމެ އެއްޗަކާއި ކަމެއްގެ ފަހަތުން ޙަލާލެއް ޙަރާމެއް ބެލުމެއްނެތި ނުދާށެވެ. ހަވާނަފްސުގެ އެދުންތަކުން ދުރުވެ، ކެތްތެރިކަމާއިއެކު ދީނުގައި އަންގަވާފައިވާ މަގުން ކުރިއަށް ދާށެވެ. ފަލާޙާއި ކާމިޔާބު ލިބުންއޮތީ އޭރުންނެވެ.
- އިސްލާމީ ތިލަފަތުގެ ދަރުސަކުން
