ދިވެހިރާއްޖޭގެ ބިނާކުރުމާއި ތަރައްޤީގައި އުމުރުން ދުވަސްވީ މީހުން ކޮށްދެއްވާފައިވާ އަގުނުކުރެވޭފަދަ ޚިދުމަތްތަކުގެ އަގު ދިވެހި ސަރުކާރާއި މުޅި މުޖުތަމަޢުން ބަލައިގަންނަކަމަށް ޞިއްޙަތާއި ޢާއިލާއާއި އިޖްތިމާޢީ އެހީއާއި ބެހޭ ވަޒީރު ޤީލާ ޢަލީ ވިދާޅުވެއްޖެއެވެ.
އުމުރުން ދުވަސްވީ މީހުންގެ ދުވަސް ފާހަގަކުރުމުގެ ގޮތުން ޞިއްޙަތާއި ޢާއިލާއާއި އިޖްތިމާޢީ އެހީއާއި ބެހޭ ވުޒާރާއިން އިންތިޒާމުކޮށްގެން ހުޅުމާލޭގައި ބޭއްވި ޚާއްޞަ ހަރަކާތުގައި ބައިވެރިވެވަޑައިގެން ވަޒީރު ވިދާޅުވީ، އަދުގެ ޖީލުތަކަށް އިސްރަށްވެހިން ފޯރުކޮށްދީފައިވާ އަގުހުރި މެސެޖްތަކާއި ހުނަރުތަކަކީ ޤައުމުގެ ބިންގާ ކަމަށެވެ.
ވަޒީރު ޤީލާ ޢަލީ ވިދާޅުވީ، "އަޅުގަނޑުމެން ފަޚުރުވެރިވަނީ އަޅުގަނޑުމެންނާއެކު ތިއްބެވި އަޅުގަނޑުމެންގެ މަންމައާއި ބައްޕައާއި މާމައާއި، ކާފައަށް. އެބޭފުޅުން އަޅުގަނޑުމެންނާއި ހިސާބަށް ގެނެސްދެއްވި އަގުހުރި މެސެޖްތަކާއި ގެނެސްދެއްވި މުހިންމު ކަންތައްތަކަށް. އަޅުގަނޑުމެންގެ ޤައުމު ބިނާކުރެވި މިއަދު މިހިސާބަށް އައުމުގަ އަޅުގަނޑުމެން ކޮންމެ ބޭފުޅަކީ މުހިންމު ޚިދުމަތްތެރިއެއް،" ކަމަށެވެ.
މި ހަރަކާތް ފެށިފައިވަނީ ހެނދުނު 6:15 ގައި އިސްރަށްވެހިންގެ ބައިވެރިވުމާއެކު ބޭއްވުނު ލުއި ހިނގާލުމަކުންނެވެ. މި ހިނގާލުމުގައި ގިނަ އަދަދެއްގެ އުމުރުން ދުވަސްވީ މީހުންގެ އިތުރުން ހުޅުމާލޭގައި ހަރަކާތްތެރިވާ ތަފާތު މުއައްސަސާތަކުންވެސް ބައިވެރިވެފައިވެއެވެ.
މި ހަރަކާތް ނިންމާލާފައިވަނީ ހިނގާލުމަށްފަހު ހުޅުމާލެ ސެންޓްރަލް ޕާކުގައި ބޭއްވުނު ޚާއްޞަ ބައްދަލުވުމަކުންނެވެ. މި ބައްދަލުވުމުގައި ވަޒީރު ވަނީ އިސްރަށްވެހިން ކޮށްދެއްވާފައިވާ މަސައްކަތްތަކުގެ އަގު ދިވެހި ސަރުކާރާއި މުޖުތަމަޢުން ފާހަގަކުރާކަން ތަކުރާރުކުރައްވައި، ހަރަކާތް ކާމިޔާބުކުރުމުގައި ބައިވެރިވި ހުރިހާ ފަރާތްތަކަށް ޝުކުރު އަދާކުރައްވާފައެވެ.
