ދެއެކުވެރިއަކު ގެއަށް އައިސް ބެލްޖެހުމުން ދޮރުހުޅުވީ އަނބިމިހާއެވެ. މަރުޙަބާ ކިޔުމުން ގެއަށްވަންތަނާ ފެނުނީ ފިރިމީހާ ބަދިގެ ެތެރޭގައި ކައްކަންއުޅޭތަނެވެ. އެކުވެރިންނަށް ސަލާމް ގޮވާލާފައި ބުނީ ކުޑައިރުކޮޅަކު މަޑުކޮށްލުމަށެވެ.
ކައްކައި ނިމިގެން އެކުވެރިންގެ ގާތަށް އައުމުން ފުރަތަމަވެސް ކުރެވުނު ސުވާލަކީ އޮފީހުން އައިސް ބަދިގެއަށްވަދެ ތިއަ ކައްކަނީ އަނބިދަށުވެފައި ހުންނަވަރުންތޯއެވެ؟ އޭނާގެ ޖަވާބު ވަރަށް ސާފެވެ. "އަނބިދަށުވާ ވަޤުތާ މަތިވާ ވަޤުތުތައް އަބަދުވެސް ބައްދަލުކުރާނެއެވެ. އަހުރެން މިބަލަނީ އެކަމަކަށް ނޫނެވެ. އަހުރެން ޢަމަލު މިކުރަނީ ސުންނަތަކަށެވެ. އަނބިމީހާއަށް ލުއިކޮށްދީއެހީތެރިވުމަށެވެ. މަތިވުމާ ތިރިވުމަކަށް ނުވިސްނަމެވެ. މަސައްކަތް މިކުރަނީ އެންމެ ޘަވާބެއްވެސް އިތުރުވޭތޯއެވެ. އެއީ ސުވަރުގެ ވަނުމަށް އެދެވޭވަރު ބޮޑުކަމުންނެވެ."
ދެއެކުވެރިންނަށްވެސް ބުނަންޖެހުނީ އެމީހުންނަށް މިތިބެވެނީ މާފަހަތުގައި ކަމަށެވެ.
ފިރިން އެމީހުންނަށް ވަޤުތުވާވަރަކުން ކެއްކުމަކީ އެއްވެސް މައްސަލައެއް ކަމެއް ނޫނެވެ. ޚާއްޞަކޮށް އަނބިމީހާ ބަލިވެ އުޅޭނަމަ އެއީ ކުރަންޖެހޭނެވެސް ކަމެކެވެ. ހަމައެއާއިއެކު އެކަމުން ލިބޭ އިތުރު ފައިދާތައް އެބަހުއްޓެވެ.
ބަލަންވީ މީހުން ބުނާ ވާހަކަތަކަކަށް ނޫނެވެ. ފިރިން ކެއްކުމަކީ އަނބިދަށުވާ ކަމެއް ކަމަށް ބުނެފިނަމަ ބުނާށެވެ! އަހުރެން މަސައްކަތްމިކުރަނީ ﷲ ތަޢާލާގެ ޙަޟްރަތުގައި މަތިވާށެވެ! (މަތީދަރަޖައަކަށް ވާޞިލްވާށެވެ.)
ދެން ބުނެލަން އޮތީ ފިރިން ކެއްކުމަކީ މިޒަމާނުގައި އަނބިމީހާ ނުއެދުނުނަމަވެސް ފިރިން ކުރާހިތުންވެސް ކުރާ ކަމެއް ކަމަށެވެ. ކެއްކުމަކީވެސް ހުނަރެކެވެ. ހީވާގި މީހުންނަށް ކުރެވޭ ކަމެކެވެ. ވީމާ ކަންނެތްވެގެން ތިބެ ހީވާގި މީހުންނަށް ފުރައްސާރަނުކުރާށެވެ.
--ޝަމްސް / މިއަދުނޫހުގެ ކިޔުންތެރިއެއް
