މަރްޔަމް ސާޖިދާ!
ކީރިތި ޤުރުއާނުގައި ބަޔާންވެގެންވާ އެންމެ ފުރިހަމަ އަދި އެންމެ ޢިބުރަތްތެރި ޤިޞާޞައަކީ ޔޫސުފުގެފާނުގެ ވާހަކައެވެ. އެހެން ބުނަންޖެހޭ ސަބަބަކީ އެކަލޭގެފާނުގެ އަޚުންގެ ކިބައިން ބަދަލު ހިއްޕެވެން އޮތްއިރުވެސް އަޚުންނަށް އެއްވެސް ކަމެއް ނުކުރައްވަވައި ދީލަތިކަމާއިއެކު މާފުކުރެއްވެވީތީއެވެ.
މިވާހަކަ ފެށިގެން އަންނަނީ އެކަލޭގެފާނަށް ކުޑަކުއްޖެއްގެ އުމުރުފުޅުގައި ފެނިވަޑައިގަތް ތަފާތު އަދި މަތިވެރި ހުވަފެންފުޅަކުންނެވެ. އެކަލޭގެފާނަށް ހުވަފެނުގައި ފެނިވަޑައިގަތީ އެގާރާ ތަރިއާއި، އިރާއި، ހަނދު އެކަލޭގެފާނަށް ސަޖިދަކުރަނިކޮށެވެ. މިއީ އާދައިގެ ހުވަފެނެއްނޫންކަން އެކަލޭގެފާނަށް ވިސްނިވަޑައިގަތެވެ.
އެހެންކަމުން، ޔޫސުފުގެފާނު މިހުވަފެންފުޅުގެ ވާހަކަ އެންމެ ފުރަތަމަވެސް ޙިއްސާކުރެއްވީ އެކަލޭގެފާނުގެ ލޯބިވާ ބައްޕާފުޅު ޔަޢުޤޫބުގެފާނާއެވެ. ޔައުޤޫބުގެފާނަކީ ނަބީބޭކަލަކަށް ވުމުން، އެހުވަފެނުގެ މާނައާއި އޭގެ ފުންމިން ވަގުތުން ދެނެގަނެވުނެވެ. އެކަލޭގެފާނަށް އެނގިވަޑައިގަތީ ޔޫސުފްގެފާނަކީ މާތްﷲގެ ޚާއްޞަ ނިޢުމަތްތަކެއް ލިބިގެންދާނެ، އަދި ދުނިޔެއާއި އާޚިރަތުގައިވެސް މަތިވެރި ދަރަޖައެއް ލިބިވަޑައިގަންނަވާނެ ބޭކަލެއް ކަމެވެ.
ނަމަވެސް، މިއުފާވެރި ޚަބަރާއިއެކު ޔަޢުޤޫބުގެފާނު ޔޫސުފްގެފާނަށް ދެއްވީ ވަރަށް މުހިންމު އަދި އެހާމެ ޙިކުމަތްތެރި އިރުޝާދެކެވެ. އެކަލޭގެފާނު ވިދާޅުވީ، އެހުވަފެނުގެ ވާހަކަ އެއްވެސް ހާލެއްގައި ބޭބެމެން ގާތުގައި ނުބުނުމަށެވެ. ސޫރަތު ޔޫސުފްގެ 5 ވަނަ އާޔަތުގައި މިކަން ބަޔާންކުރައްވާފައިވެއެވެ.
"އެކަލޭގެފާނު ވިދާޅުވިއެވެ. އޭ ދަރިފުޅާއެވެ! ތިބާޔަށް ފެނުނު ހުވަފެން ތިބާގެ ބޭބޭމެންނަށް ކިޔައިނުދޭށެވެ! ފަހެ، އެއުރެން ތިބާޔަށް ނުބައި ރޭވުމެއް ރާވައިފާނެތެވެ. ހަމަކަށަވަރުން، شيطان އާއަކީ، އިންސާނާއަށްހުރި، ފާޅުވެގެންވާ عداوة ތެރިއެކެވެ. (5)"
ޔަޢުޤޫބުގެފާނު މިފަދައިން ވިދާޅުވާން ޖެހުނު މައިގަނޑު ސަބަބަކީ، ޔޫސުފްގެފާނުގެ ބޭބެއިންގެ ހިތްތަކުގައި ޔޫސުފްގެފާނާއި މެދު އޮންނަ ޙަސަދަވެރިކަން އެކަލޭގެފާނަށް އިޙުސާސްކުރެއްވޭތީއެވެ. މިފަދަ މަތިވެރި ހުވަފެނެއްގެ ވާހަކަ އިވުމުން، ޝައިޠާނާ އެބައިމީހުންގެ ހިތްތަކަށްވަދެ ، ޔޫސުފްގެފާނަށް ގެއްލުމެއް ދިނުމަށް މަސައްކަތްކޮށްފާނެތީ، ޔަޢުޤޫބުގެފާނު ކަންބޮޑުވެވަޑައިގަތެވެ.
މިއީ އަޅުގަނޑުމެން ފުންކޮށް ވިސްނާލަންޖެހޭ ޙާދިސާއެކެވެ. މިއަދު އަޅުގަނޑުމެނަށް އުފާވެރިކަމެއް ލިބޭއިރަށް، ފުރަތަމަ ވެސް އެފްބީގައި ޖަހާލެވެނީ ޕޯސްޓެކެވެ. ވަގުތުން ލައިކްސްތަކާއި މަރުޙަބާގެ ކޮމެންޓްސް ތައް ލިބެންފަށައެވެ. ނަމަވެސް، ޙަޤީޤަތަކީ، އޭގެތެރެއިން ހެޔޮހިތުން މަރުޙަބާ ކިޔަނީ ކިތައް މީހުންތޯއެވެ ؟
އެހެންކަމުން މި ޙާދިސާއިން އަޅުގަނޑުމެން ޢިބުރަތް ލިބިގަންނަން ޖެހެއެވެ. ތިމާއަށް ލިބޭ ކޮންމެ ނިޢުމަތަކާއި އުފާވެރި ޚަބަރަކީ ހުރިހާ އެންމެންގެ ކުރިމަތީގައި ދައްކަންޖެހޭ ވާހަކައެއް ނޫންކަން ދަންނާށެވެ. ބައެއް ފަހަރު ގާތް މީހުންގެ ކިބައިން ވެސް ޙަސަދަވެރިކަން ކުރިމަތިވެދާނެއެވެ. ތިމާއަށް ލިބޭ ހެޔޮކަންތައްތައް ރައްކާތެރިކުރުމަށްޓަކައި، ސިއްރު ހިފެހެއްޓުމާއި، ޙިކުމަތްތެރިވުމަކީ މިއަދުވެސް ދިރިއުޅުމުގައި އިންތިހާއަށް ބޭނުންތެރި ސިފައެކެވެ. އެހެންކަމުން، އަޅުގަނޑުމެންނާއި، އަޅުގަނޑުމެންގެ ދަރިންނަށް ލިބޭ ކޮންމެ ހެވެއްގެ ވާހަކަ މީހުނާއި ހިއްސާކުރުމުގެ ކުރިން އަދިއެއްފަހަރު ވިސްނާލަމާ ހިނގާށެވެ!
- މިއަދުނޫސް
