އެއީވެސް ވަރަށް ލޯބިން އެކުގައި އުޅެމުން އައި ދެމަފިރިންނެވެ. ޢުމަރާއި މަރީނާއެވެ. ދެމަފިރިންވެސް ވަޒީފާއަދާކުރެއެވެ. ދެމަފިރިންގެ 5 ދަރިން ތިބުމާއިއެކު ދެމަފިރިންނަށް ލިބޭ މުސާރަ އެއްކޮށްލުމުންވެސް އޮންނަނީ ދެކޮޅު ނުޖެއްސިފައެވެ.
ފިރިމީހާ މަސައްކަތްކުރަނީ ޢުމުރުން ދުވަސްވީ މީހެއްގެ ކުންފުންޏެއްގައެވެ. އޭނާގެ އަނބިމީހާއަކީ ވަރަށް ޒުވާން ކުއްޖެކެވެ. އެހެންކަމުން ދެމަފިރިންގެ މެދުގައި ބާއްވަންޖެހޭ އެންމެ މުހިންމު ގުޅުން އޮންނަނީ ނުބޭއްވިފައެވެ. އަނބިމީހާއަށް އުނިވާބައި ފޫބެއްދޭނެކަމަށްބަލައި ބޭނުންވަރަކަށް ޚަރަދުކުރާނެ ފައިސާދެއެވެ. އޭނާއަށް ނުވިސްނޭ ކަމަކީ އެކަމަކީ ދޭ ގިނަ ފައިސާތަކަކުން ފުއްދޭނެ ބޭނުމެއް ނޫންކަމެވެ.
އަނބިމީހާ އޭނާގެ އިޙްޞާޞްތައް ބަންޑުންކޮށްލައި ޢުމަރަށް ހުރިހާ ވާހަކަތަކެއް ކިޔައިދިނެވެ. އޭނާއަށް އެކަމުގައި އެހީތެރިވެދީފިނަމަ ފައިސާއިން ޢުމަރުގެ ހިތް ފުރާލަދޭނެކަމަށްވެސް ބުންޏެވެ. ނަމަވެސް ޢުމަރު ބުނީ އޭނާގެ 5 ދަރިންނާއި އަނބިމީހާ ދެކެ ވަރަށް ބޮޑަށް ލޯބިވާކަމަށެވެ. އަނބިމީހާއަށް ބާވަފާތެރިނުވާނެ ކަމަށެވެ. ވަޒިފާއިން ވަކިކުރިނަމަވެސް އޭނާގެ ނިންމުން ބަދަލުނުކުރާނެ ކަމަށެވެ.
މެޑަމްގެ މަކަރުވެރި ޜޭވުމަކުން ޢުމަރުގެ ބޮލުގައި ބޮޑު ވައްކަމެއްގެ ތުހުމަތު އަޅުވައި ފުލުހުންނަށް ރިޕޯޓްކުރުމުން ޢުމަރު ބަންދުކުރިއެވެ. މަރީނާ ބުނަމުން އައީ އޭނާގެ ފިރިމީހާ ވައްކަން ނުކުރާނެ ކަމަށެވެ. އެންމެ ދެރަކޮށް ދިމާވިކަމަކީ އަތުގައި ފައިސާ ނެތުމުން ރަނގަޅު ވަކީލަކު ނުލިބުނުކަމެވެ.
މައްސަލަ ޝަރީޢަތަށް ހުށަހެޅި ޢުމަރު ކުށުގައި ބެދި ޙޫމުމް އިއްވުމުގެ އެންމެ ފަހު ވަޤުތުގައި ކުންފުނީގެ މުވައްޒިފަކު އަޑުގަދަކުރަމުން ކޯޓުރޫމަށްވަދެ ބުނީ ޑިލީޓްކޮށްފައިވާ ކެމެރާ ފުޓޭޖް ރިކަވަރކުރެވިއްޖެކަމަށާއި ޙުކުންކުރުމުގެ ކުރިން ފުޓޭޖް ބަލައިލުން މުހިންމުވާނެ ކަމަށެވެ.
ފަނޑިޔާރުގެ އަމުރަށް ފުޓޭޖް ޓީވީގައި އަޅުވައިގެން ބެލުމުން ފެނުނީ އެންމެ ސިއްސުވައިލި މަންޒަރެކެވެ. ޢުމަރުގެ ޙަވާލުގައި ހުރި ތިޖޫރީ، ބޮސްގެ އަނބިމީހާ އަމިއްލައަށް ހުޅުވައި ފައިސާތަކެއް ނަގައިގެން ނުކުމެގެންދާތަނެވެ. ވައްކަން ކުރިކަމަށް ކޯޓަށް ހުށަހަޅާފައިވާ އޮތް ވަޤުތާއި ފުޓޭޖުން ފެންނަ ވަޤުތާއި ދިމާވެއެވެ. އަދި އެވަޤުތަކީ ޢުމަރު އޮފީހުގައި ނެތް ވަޤުތެއްކަންވެސް އެނގެންދިއައެވެ.
ފަނޑިޔާރު އަމުރުކުރީ ޢުމަރު މިނިވަންކުރުމަށާއި މައްސަލަ އަލުން ތަޙްޤީޤް ކުރުމަށެވެ. ތަޙްޤީޤަށްފަހު ކުރިއަށް ގެންދިއަ ޝަރީޢަތުގެ މަޖިލީހުގައި ވެރިމީހާގެ އަނބިމީހާގެ މައްޗަށް އެތައް ކުށެއް ޘާބިތުވިއެވެ. އެއިގެ ތެރޭގައި ވައްކަންކުރުމާއި ޤަޞްދުގައި މީހަކަށް ދެރައެއް ދިނުމާއި އެއަނިޔާގެ ސަބަބުން ޢާއިލާއެއް ޙާލުގައި ޖެހުންވެސް ހިމެނެއެވެ. ހުރިހާ ކުށަކަށް އަދަބެއްގެ ގޮތުން 17 އަހަރުގެ ޖަލު ޙުކުމެއް އިއްވިއެވެ. އަދި ޢުމަރަށާއި ޢާއިލާއަށް ލިބުނު ގެއްލުމުގެ ބަދަލެއްގެ ގޮތުން އޭނާގެ އެކައުންޓުން 4 މިލިއަން ޑޮލަރު ޢުމަރުގެ އެކައުންޓަށް ޓްރާންސްފަރުކުރަން ބޭންކަށް އަމުރުކުރިއެވެ.
ޙުކުމް އިއްވައި ނިމުމުން މަރީނާ ތެދުވެފައި ބުންޏެވެ. "ތަނަވަސްކަން ހުރީމާ ނިކަމެތިންގެ މުޅަމަސްކާން މަސައްކަތްކުރުމުގެ ނަތީޖާ މިހިރަފެންނަނީއެވެ. މިހާރުވެސް އެއްއިރު ކައިގެން ތިބޭތާ 2 މަސްދުވަސްވީއެވެ. އަހުރެމެންގެ އަތުގަ ތަނަވަސްކަން ނެތީމާ ނުލިބުނީ ޤާނޫނީ ވަކީލެކެވެ! އެކަމަކު އަހުރެމެންގެ އަތުގައި ހިތާއި ދޫ އޮތީމާ ﷲ އަށް ދުޢާކުރީއެވެ. ހާސްފަހުން ﷲ އަށް ޙަމްދުކޮށް ޝުކުރުކުރަމެވެ. ނިކަމެތިންނަށް އަނިޔާވެރިވާ މީހުންނަށް ޢިބްރަތަކަށް ފުދޭނެއެވެ."
މަރީނާ އެހެންބުނުމާއިއެކު ކޯޓުގުގުމައިލީ މަރީނާއަށް ތަޢްރީފްގެ ބަސްތަކުންނެވެ.
މިއީ އަޅުގަނޑަށް ފެނިފައިވާ ފިލްމެއްގެ ވަރަށް ކުރުކުރު ޚުލާޞާއެކެވެ. ވިސްނަވައިލައްވާށެވެ! ބޭނުންވަރަކަށް ފައިސާލިބެން އޮއްވައި ބޭނުން ނުކޮށް އަނބިމީހާއަށް ތެދުވެރިވުމުން ޙަލާލުގޮތުގައި އެލިބުނީ 4 މިލިއަން ޑޮލަރެވެ. އިތުރަށް ކިޔުންތެރިން ކޮމެންޓަކުރައްވާށެވެ!
- ޒަމީރާ / މިއަދުނޫހުގެ ކިޔުންތެރިއެއް
