ޚަރަދުބޮޑުވާތީ ރަނގަޅު ފެންވަރުގެ ކާބޯތަކެތި ގެއަށް ނުވައްދައި ހޮޓާ، ރެސްޓޯރަންޓްތަކުން ކައިހެދުމަކީ އަނބިދަރިންނަށް އަނިޔާވެރިވުން! ފާފަވެރިވާނެވެސް ކަމެއް!

ތަނަވަސްކަން ހުރިނަމަ އެމީހަކު ބޭނުންތަނަކުން ކައިބޮއި ހެދުމަކީ އެއްވެސް މައްސަލައެއް ނޫނެވެ. ނަމަވެސް ތަނަވަސްކަން ނެތްނަމަ ނުވަތަ ތަނަވަސްކަން ކުޑަނަމަ ވިސްނާލަންޖެހޭނެ ކަންކަން އެބަހުއްޓެވެ.  

މިޘާލަކަށް ފުދުންތެރިކަން ކުޑަކަމުން އަނބިދަރިންގެ ކެއިންބުއިމަށް ގެއަށް ވައްދަނީ އެންމެ އާދައިގެ ފެންވަރުގެ ތަކެއްޗެވެ. ކުޑަ ފައިސާކޮޅެއް އިތުރަށް ޚަރަދުކުރެވޭނަމަ ފެންވަރު ރަނގަޅު ތަކެތި ވެއްދިދާނެއެވެ. ދެންމިވާގޮތަކީ ގެއަށް އެޚަރަދުކުރަން ބުރަވާ މީހާ ހޮޓާތަކާ ރެސްޓޯރަންޓްތަކުން އަގުބޮޑު ތަކެތި ކެއިން ބުއިމަށް ޚަރަދުކުރަނީއެވެ. 

އަހުރެން ބުނާނީ މިއީ ހެދޭ ގޯހެއް ކަމަށެވެ. އެކަން އެގޮތަށް ނުކުރާށެވެ! ﷲވ ތަޢާލާ ދެއްވެވި މިންވަރުން އަނބިދަރިންނަށް ޚަރަދުކުރާށެވެ. ނޫންނަމަ އެއީ ފާފަވެރިވާނެ ކަމެކެވެ. 

އަނބިދަރިންނަށް ބޭނުންވާ ކާބޯތަކެތި އެމީހެއްގެ ފެންވަރުން ހޯދައި ގެއަށް ވެއްދުމަކީ ފިރިމީހާގެ މައްޗަށް އޮތް ވާޖިބެއްގެ އިތުރުން އެއީވެސް ޘަވާބުދެއްވަވާނެ އަޅުކަމެކެވެ. އެކަން އެނގެނީ އަނބިމީހާގެ އަނގައަށް ލަވައިދޭ ސުވަލަކީވެސް ޞަދަޤާތެއްކަމަށް ޙަދީޘްފުޅުގައި އޮތުމުންނެވެ. އެކަން ރަނގަޅު ގޮތުގައި މާނަކުރާނަމަ އެއީ ހަމައެކަނި އަނބިމިހާގެ އަނގައަށް ލަވައިދިނުމެއް ނޫނެވެ. ލިބޭވަރަކުން ރަނގަޅު ފެންވަރުގެ ތަކެތި ގެއަށް ވެއްދުންވެސް ހިމެނެއެވެ.  

Narrated Sa'd bin Abi Waqqas: 

Allah's Messenger (ﷺ) said,

"You will be rewarded for whatever you spend for Allah's sake even if it were a morsel which you put in your wife's mouth." 

Saheeh Bukhari: Book 2, Hadhees 49

މި ޙަދިޘްފުޅުގެ ސަރަހައިގައި ޢިލްމުވެރިން ބަޔާންކުރައްވާ ގޮތުގައި އަނގައަށް ލަވައިދިނުމުގެ މާނައަކީ ގެއަށް ބޭނުންވާ ކާބޯތަކެތި އެމީހެއްގެ ފެންވަރުން ހޯދައިދިނުމެވެ. ވީމާ ލިބޭ އާމްދަނީ ބޭނުންކުރަންވާނީ ހެޔޮގޮތުގައެވެ. ރައްޓެހިންނާއިއެކު ރެސްޓޯރަންޓްތަކުން ކައިބޮއި މަޖާކުރަން ޚަރަދުކުރަންވާނީ އަނބިދަރިންނަށް ފުރިހަމަކޮށްދޭންޖެހޭ ކަންކަން ފުރިހަމަކޮށްދިނުމަށްފަހުގައި އަތުގައި ފައިސާހުރިނަމައެވެ.

ޢާއިލާއަށް ބޭނުންވާ ކާބޯތަކެތި ހޯދައިދީފައި ފުއްދައިނުލާށެވެ! އަމިއްލައަށް ކައްކައި ޢާއިލާއަށް ކާންދިނުމަކީވެސް އަޅުކަމެކެވެ. އެކަން ހިމެނިގެންދާނީ އަނބިމީހާއަށް ލުއިކޮށްދީ އެހީތެރިވމުގެ ތެރޭގައެވެ. އަނބިމީހާއަށް އަޅުކަންކުރާނެ ވަގުތު ލިބޭނީ އޭނާއަށް މަސައްކަތް ލުއިކޮށްދިންވަރަކުންނެވެ. އެއީވެސް ފިރިމީހާގެ މައްޗަށް ވާޖިބުކަމެކެވެ.

ކައިވެންޏަށްފަހު ދެމަފިރިންގެ މައްޗަށް އޮތް އެންމެ ބޮޑު އެއް ވާޖިބަކީ އާޚިރަތް ޙާޞިލުކުރަން އެކުގައި ގަދައަޅައި މަސައްކަތްކުރުމެވެ. ވީމާ ވީހައި ގިނަ ޘަވާބު ހޯދަން ދެމަފިރިންވެސް ގަދައަޅައި މަސައްކަތްކުރަންވާނެއެވެ. ދުނިޔޭގެ ޙަޔާތުގައި ކޮންމެވެސް ދުވަހަކުން ދެމަފިރިން ވަކިވެގެންދާނެއެވެ. ދާއިމަށް އެކުގައި ތިބެވޭނީ ދެމަފިރިމންނަށް އެކުގައި ސުވަރުގެ ވަދެވިއްޖެނަމައެވެ.

- އިސްލާމީ ތިލަފަތުގެ ދަރުސަކުން