ނިމިދިޔަ ސެޕްޓެންބަރު މަހު އެކަނިވެސް ޖުމްލަ 924 މައްސަލައެއް ދިވެހި ފުލުހުންގެ ޚިދުމަތަށް ހުށަހަޅާފައިވާ ކަމަށް އެ ޚިދުމަތުން އާންމުކޮށްފައިވާ ތަފާސްހިސާބުތަކުން ދައްކައިފިއެވެ.
ފުލުހުން އާންމުކޮށްފައިވާ ތަފާސްހިސާބުތަކަށް ބަލާއިރު، ސެޕްޓެންބަރު މަހު ރިޕޯޓުކުރެވުނު މައްސަލަތަކުގެ އެންމެ ބޮޑު އިންސައްތައެއް ހިއްސާކުރަނީ ވައްކަމުގެ މައްސަލަތަކެވެ. އެގޮތުން ވައްކަމުގެ 277 މައްސަލައެއް ފުލުހުންނަށް ހުށަހަޅާފައިވާއިރު، ދެވަނައަށް އެންމެ ގިނައިން ރިޕޯޓުކޮށްފައިވަނީ މަގުމަތީގެ އެކްސިޑެންޓުތަކެވެ. އެއީ ޖުމްލަ 222 މައްސަލައެވެ.
ފާއިތުވި މަހު ފުލުހުންނަށް ހުށަހެޅުނު އެހެނިހެން މައްސަލަތަކުގެ ތެރޭގައި މަސްތުވާތަކެތީގެ 165 މައްސަލައަކާއި، ގެއްލުނު މުދަލުގެ 69 މައްސަލައެއްގެ އިތުރުން ތަކެއްޗަށް ގެއްލުންދިނުމުގެ 57 މައްސަލަ ހިމެނެއެވެ. އަދި މާރާމާރީގެ 49 މައްސަލައާއި، ޚިޔާނާތުގެ 30 މައްސަލައިގެ އިތުރުން ގެވެށި އަނިޔާގެ 23 މައްސަލައެއް ވަނީ ރިޕޯޓުކޮށްފައެވެ. މީގެއިތުރުން ޖިންސީ ކުށްތަކުގެ 14 މައްސަލައާއި، މަކަރާއި ޙީލަތް ހެދުމުގެ 9 މައްސަލަ އަދި ފޭރުމުގެ 9 މައްސަލަ ވެސް ހިމެނެއެވެ.
މިއަހަރުގެ ފުރަތަމަ ހަތަރު މަސްދުވަހު މަހަކު އެވްރެޖުކޮށް 1,000 އަށްވުރެ ގިނަ މައްސަލަ ހުށަހެޅުނު ނަމަވެސް، އަހަރުގެ މެދުތެރެއިން ފެށިގެން އާންމު ކުށްތަކުގެ އަދަދު ވަނީ ވަކިވަރަކަށް ކޮންޓްރޯލް ކުރެވިފައެވެ.
މިއަހަރުގެ މިހާތަނަށް މުޅި ޖުމުލަ 9,454 މައްސަލައެއް ފުލުހުންނަށް ހުށަހަޅާފައިވާއިރު، މުޅި އަހަރަށް ބެލިނަމަވެސް އެންމެ ގިނައިން ރިޕޯޓްކޮށްފައިވަނީ ވައްކަމާއި މަގުމަތީގެ އެކްސިޑެންޓުތަކެވެ. އެއީ ވައްކަމުގެ 2,610 މައްސަލައާއި، 2,273 އެކްސިޑެންޓުގެ މައްސަލައެވެ.
