އިރުވައި މޫސުމާ ދިމާކޮށް ދުނިޔޭގެ އެކި ކަންކޮޅުތަކުން ދިވެހިރާއްޖެއަށް ހިޖުރަކުރާ ހިމާޔަތްކޮށްފައިވާ ދޫނިތައް ހިފުމާއި، އެތަކެތި ގޭގޭގައި ބަންދުކޮށްގެން ގެންގުޅުމުގެ އިތުރުން ވިޔަފާރިކުރުމަކީ މަނާކަމެއް ކަމަށާއި، އެފަދަ އަމަލުތައް ކުރާ ފަރާތްތަކާމެދު ގާނޫނީ ފިޔަވަޅު އަޅާނެކަމަށް އެންވަޔަރަންމަންޓަލް ރެގިއުލޭޓަރީ އޮތޯރިޓީ (އީއާރުއޭ) އިން ވިދާޅުވެއްޖެއެވެ.
އީއާރުއޭ އިން ނެރުއްވި ބަޔާނެއްގައި ވިދާޅުވީ، އިރުވައި މޫސުމުގައި ރާއްޖެއަށް ހިޖުރަކުރާ ދޫނިތަކަކީ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހެދިފައިވާ "ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭތަކެއްޗާބެހޭ ގަވާއިދު" ގެ ދަށުން ޚާއްޞަ ހިމާޔަތެއް ދެވިފައިވާ ދިރުންތަކެއް ކަމަށެވެ. އަދި މިއިން އެއްވެސް ބާވަތެއްގެ ދޫންޏެއް ހިފުމާއި، ފިޔަކޮށުމާއި، ކޮށީގައި ބަންދުކޮށްގެން ގެންގުޅުމަކީ އެ ގަވާއިދުގެ 17 ވަނަ މާއްދާގެ ދަށުން މަނާކަމެއްކަން އެ އޮތޯރިޓީން ފާހަގަކުރެއްވިއެވެ.
މިދުވަސްވަރާ ދިމާކޮށް ގިނަ އަދަދަކަށް ދޫނި ހިފާ، އޮޅުދޫނީގެ ގޮތުގައި ގެންގުޅުމުގެ އިތުރުން އެތަކެތީގެ ވިޔަފާރިކުރާކަން ފާހަގަކުރެވިފައިވާކަން ބަޔާންކުރައްވަމުން އީއާރުއޭ އިން ވިދާޅުވީ، މިއީ ރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާއެއް ކަމަށްވާ "ކޮންވެންޝަން އޮން މައިގްރޭޓަރީ ސްޕީޝީޒް" (ސީއެމްއެސް) އާވެސް މުޅިން ހިލާފު އަމަލެއް ކަމަށެވެ.
އެހެންކަމުން، ހިމާޔަތްކޮށްފައިވާ ދޫނިތަކަށް ނުރައްކާވާގޮތަށް އަމަލުކުރާ ފަރާތްތަކާމެދު ގާނޫނީ ގޮތުން އަޅަންޖެހޭ އެންމެހައި ފިޔަވަޅުތައް އަޅަމުންދާނެކަމަށް އެންވަޔަރަންމަންޓަލް ރެގިއުލޭޓަރީ އޮތޯރިޓީން ވަނީ އިންޒާރު ދެއްވާފައެވެ.
