ޢާއިޝަތު ރަފާޙް ޢަލީ
ގިނަ ފިރިންނަށް ހީވެފައި އޮންނަނީ އެމީހުން މާލީ ގޮތުން ޚަރަދުކޮށްދޭތީ، ފިރިއެއްގެ ޒިންމާ ފުރިހަމައަށް އަދާކުރެވޭ ކަމަށެވެ. އަދި އަހަރެން ދެކޭގޮތުގައި މައްސަލައަކީ 'ޤިވަމަތް' (ފިރިއެއްގެ ޒިންމާ/ޤާއިމުވެހުރުން) މި ކޮންސެޕްޓް މާނަކުރެވޭ ގޮތެވެ. ސަގާފީ ގޮތުން މިކަން ވަނީ ހަމައެކަނި މާލީ ޚަރަދު ބެލެހެއްޓުމުގެ މާނައަށް ކުޑަކުރެވިފައެވެ. ޤިވަމަތަކީ ހަމައެކަނި ޚަރަދުދިނުން ކަމުގައި ދެކެވޭ ދެކުމެވެ.
ﷲ سُبْحَانَهُ وَتَعَالَى އަޙްޒާބު ސޫރަތުގެ 21 ވަނަ އާޔަތުގައި ވަޙީކުރައްވާފައިވެއެވެ.
لَّقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ
މާނައީ: ހަމަކަށަވަރުން، اللَّه ގެ رسول އާގެ ކިބައިގައި، ތިޔަބައިމީހުންނަށް ރިވެތިވެގެންވާ ނަމޫނާއެއްވެއެވެ."
ވީމާ، ފިރިއަކަށްވުމުގެ އެންމެ އަސާސީ ސިފައަކީ ކޮބައިކަން ދެނެގަންނަން ބޭނުންނަމަ، އެކަމުގެ ޙަޤީޤީ މާނަ ގުޅެނީ ފިރިއެއްގެ ގޮތުގައި ރަސޫލާ މުޙައްމަދު ޞައްލަ ﷲ ޢަލައިހި ވަސައްލަމް ކަންކަން ކުރެއްވި ގޮތާއެވެ. އަދި އެކަންކަމަށް ބަލައިލުމުން، ސުބްޙާނަﷲ، އެއީ ހަމައެކަނި މާލީ ގޮތުން ޚަރަދުކުރުމަށްވުރެ މާފުޅާ ކަމެއްކަން އެނގިގެންދެއެވެ.
ޢާއިޝާ رَضِيَ اللهُ عَنْهَا އަށް، އެކަލޭގެފާނު ގޭތެރޭގެ ދިރިއުޅުއްވުމުގައި އުޅުއްވި ގޮތާ ބެހޭގޮތުން ސުވާލުކުރެވުނެވެ. އެކަލޭގެފާނުގެ އަމިއްލަފުޅު ގަނޑުވަރުކޮޅުގައި، އެހެން މީހުންނަށް ނުފެންނަ ހިނދު އުޅުއްވީ ކިހިނެއް ހެއްޔެވެ؟ އިމާމު ބުޚާރީ ރިވާކުރައްވާފައިވާ ޙަދީޘެއްގައި ޢާއިޝަތުގެފާނު ސިފަކުރައްވާފައިވަނީ، އެކަލޭގެފާނު އާއިލާގެ ޚިދުމަތުގައި، އަނބިކަނބަލުންނާއި ދަރިކަނބަލުންގެ ކަންކަމުގައި އެހީތެރިވެދެއްވުމުގައި އުޅުއްވި ކަމަށެވެ.
މިކަންކަމުގެ އިތުރުން، އެކަލޭގެފާނަކީ މުސްލިމުންގެ ވެރިޔާ އަދި މުޅި އުންމަތުގެ ޚިދުމަތުގައި މަޝްޣޫލުވެވަޑައިގެން އުޅުއްވި ބޭކަލެކެވެ. ނަމަވެސް، "އުންމަތުގެ ކަންކަމުގައި ބުރަކޮށް އުޅެންޖެހުމުން އާއިލާގެ ކަންކަމަށް ވަގުތު ނުދެވުނު" ކަމަށް އެއްވެސް އިރަކު އެކަލޭގެފާނު ވިދާޅުވެފައެއް ނުވެއެވެ. އަދި އެފަދަ ކަމެއް ސީރަތުން ފެންނާކަށްވެސް ނެތެވެ.
އަޚުންނާއި އުޚުތުންނޭވެ! މިއީ ވަރަށް މުހިންމު ނުކުތާއެކެވެ.
- ޝައިޚް ޑރ ސާޖިދު ޢުމަރުގެ ދަރުސަކުން
- މިއަދުނޫސް
