މަގު ކޮނުމުގެ އެކި މަސައްކަތްތަކުގެ ތެރެއިން ކަރަންޓު ވިއުގައިގައި ހިމެނޭ ކޭބަލްތަކަށް ގެއްލުންވެ، ކަރަންޓުގެ ހިދުމަތް މެދުކެނޑޭ މައްސަލަ އިތުރުވަމުންދާތީ، އެފަދަ ކަންކަން ކުރާ ފަރާތްތައް ޒިންމާދާރުކުރުވައި، އެކަމަށް ހިނގާ ހަރަދު އެ ފަރާތްތަކުގެ އަތުން ނެގުމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ނިންމައިފިއެވެ.
ސްޓެލްކޯއިން ބުނެފައިވަނީ މަގު ކޮނުމުގެ މަސައްކަތްތައް ކުރިއަށްގެންދާއިރު އިހުމާލުވުމުގެ ސަބަބުން ކޭބަލްތަކަށް ގެއްލުންވެ، އާންމު ރައްޔިތުންނަށް އެތަކެއް ތަކުލީފުތަކަކާއި ދަތިތަކަކާ ދަނީ ކުރިމަތިވަމުންނެވެ. އަދި މިފަދަ ހާދިސާތައް ދުވަހެއް ދުވަހަކަށް އިތުރުވަމުންދާތީ، މި މައްސަލައަށް ދާއިމީ ހައްލެއް ހޯދުމަކީ ކޮންމެހެން ބޭނުންތެރި ކަމެއް ކަމަށް ވެސް އެ ކުންފުނިން ދެކެއެވެ.
އަލަށް ނިންމި ނިންމުމުގެ ދަށުން، މަގު ކޮނުމުގެ މަސައްކަތް ކުރާ ފަރާތެއްގެ އިހުމާލުން ކަރަންޓު ވިއުގައަށް ގެއްލުމެއް ލިބިއްޖެ ނަމަ، އެ މައްސަލައެއް ހައްލުކޮށް އަލުން ހިދުމަތް ދިނުމަށް ހިނގާ އެންމެހާ ހަރަދުތައް ނަގާނީ އެ މަސައްކަތެއް ކުރި ފަރާތަކުންނެވެ. މިއީ ކަރަންޓުގެ ހިދުމަތް މެދުކެނޑުމުގެ ސަބަބުން އާންމު ރައްޔިތުންނަށް ދިމާވާ ދަތި އުނދަގޫތަކުން ސަލާމަތްކޮށްދީ، ހިދުމަތުގެ ފެންވަރު ދެމެހެއްޓެނިވި ގޮތެއްގައި ފޯރުކޮށްދިނުމުގެ މަގުސަދުގައި ނިންމާފައިވާ ނިންމުމެއް ކަމަށް ކުންފުނިން ބުނެއެވެ.
އެހެންކަމުން، މަގު ކޮނުމުގެ އެންމެހާ މަސައްކަތްތައް ކުރިއަށްގެންދާ ހުރިހާ ފަރާތްތަކުންވެސް ކުންފުނީގެ ކަރަންޓު ވިއުގައަށް ގެއްލުން ނުވާނެހެން، އިތުރަށް ޒިންމާދާރުކަމާއެކު މަސައްކަތްތައް ރާވައިގެން ކުރިއަށްގެންދިއުމަށް ސްޓެލްކޯއިން ވަނީ އިލްތިމާސްކޮށްފައެވެ.
