ޢާއިލީގެ ތަނަވަސްވެފައި ގިނަ ބައަކަށް އެކުގައި އުޅެވެން އޮތަސް ގިނަ ބައަކު ތަންތަން ކުއްޔަށްހިފައި ވަކިން ދިރިއުޅެނީ އެކަމަށް ޚަރަދުކުރާނެ ފައިސާ ލިބޭތީއެއް ނޫނެވެ. ކުލިދައްކާފައި ވަރަށް ދަތިޙާލުގައި އުޅެންޖެހޭ މީހުންވެސް ވަރަށް ގިނައެވެ. މިއީ އެކުގައި އުޅެވޭނަމަ ޙައްލުކުރެވެން އޮތްކަމެކެވެ.
މާކުރީގެ ޒަމާނެއް ނޫނެވެ. އަހުރެމެން ކުޑައިރުވެސް ގޯއްޗެއް ލިބި ގެއެއް އެޅި ވަކިން އުޅެވޭނެ ގޮތް ފަހިވިޔަސް ގިނަ ބައަކު އިޚްތިޔާރުކުރަނީ ޢާއިލާއާއިއެކުގައި އުޅުމަށެވެ. އެއީ އެކަމުން ކުރާ ފައިދާ ބޮޑުވީމައެވެ. އެންމެން އެކުގައި އުޅުމުން ލިބޭ ހިތްހަމަޖެހުން ބޮޑުވީމައެވެ.
ނަމަވެސް މިއަދުގެ ޙާލަތު ކުރިން މިބުނީއެވެ. މިޙާލަތު މެދުވެރިވެގެން އުޅޭ ސަބަބަކީ ބޭރުން އެތެރެބެގެން އުޅޭ ކަމެއް ނޫނެވެ. އަހުރެމެމްނެގެ ތެރެއިން ފެށިގެން އުޅޭ ކަމެކެވެ. އެއީ ޙަސަދަވެރިކަން ބޮޑުވުމެވެ. ފިތުނަތައް ގިނަވުމެވެ. ކަމެއް ދިމާވިޔަސް ދޫދީ މައްސަލަ ޙައްލުކޮށްގެން އެކުގައި އުޅެން ބޭނުންވާ މީހުން މަދުވުމެވެ.
މިވާހަކަ ދައްކަން ބޭނުންވީ މިމައްސަލަ އަޅުގަނޑުގެ ޢާއިލާގައިވެސް އޮތުމުންނެވެ. ބައްޕަ ހުރީ ލޯނު ނަގައިގެން ގެއަޅައިފައެވެ. 5 ބުރީގެ ތެރެއިން 4 ބުރި ކުއްޔަށްދީފައިހުރީ ލޯނުދައްކަންޖެހޭތީއެވެ. ދިރިއުޅޭ ބުރީގައިވެސް އެންމެންނަށް އެކުގައި އުޅެވޭނެ ގޮތް އެބައޮތެވެ. 3 ދަރިން ތިބިއިރު 6 ކޮޓަރި އެބަހުއްޓެވެ. އެކަމަކު 2 ބެއިން ބަނީ ގެދޫކޮށް ތަންތަން ކުއްޔަށް ހިފައިގެން ގެއިން ނުކުމެފައެވެ. އުޅެނީވެސް އަތްމަތިދަތިކޮށެވެ. މިކަމުން ވަރަށް އަސަރުކުރެއެވެ.
--މިއަދުޏޫހުގެ ކިޔުންތެރިއެއް
ވިސްނައިލުން މުހިންމު ލިޔުމެއް!:
އިންސާނުން ބޭނުންވުމުން ފުރާނައިން ރިސްކް ނަގައިގެން މިނިކާވަގުތަކާއި ސިންގާތަކާއިއެކު އެބަ ދިރިއުޅެއެވެ. އެފަދަ ޖަނަވާރުތައް އޮޅުކޮށްގެން އެބަ ގެންގުޅެއެވެ. ނަމަވެސް މައިންބަފައިންނާއި އަދި ޢާއިލާގެ މީހުންނާއިއެކު ދިރިއުޅެވޭ ކަމަކަށް ނުވެއެވެ. މިއީ ގިނަ ބައަކު ކަންބޮޑުވާ ކަމެކެވެ.
ހަމަ ޤައިމުވެސް މައިންބަފައިން ބެލެހެއްޓުމަކީ ކޮންމެ މީހަކާއިވެސް ﷲ ތަޢާލާ ޙަވާލުކުރައްވަވާ ވަރަށް ބޮޑު އަމާނާތެކެވެ. ޢާއިލާގެ މީހުންނަށް ހެޔޮކޮށް ހިތުމަކީ ކޮންމެ މީހަކުވެސް ކުރަންޖެހޭ ކަމެކެވެ. ރަޙިމުގެ ގުޅުން ދެމެހެއްޓުމަކީ ކޮންމެ މީހެއްގެ މައްޗަށްވެސް އޮތް ވާޖިބެކެވެ.
ޢާއިލީ ގޭގައި ދިރިއުޅެވެން އޮންނައިރުވެސް ބައެއް މީހުން ވަކިން ދިރިއުޅެނީ ސަބަބުތަކެއް ކުރިމަތިވާތީއެވެ. އެއީ ޖެހޭ މައްސަލަތައް ގިނަވުމެވެ. ފިތުނަވެރިކަމާއި ޙަސަދަވެރިކަން ބޮޑުވުމެވެ. ވީމާ ފުރަތަމަ ކަމަކަށް މިކަންކަމަށް އެންމެންވެސް ސަމާލުކަންދޭން އެބަޖެހެއެވެ.
ހަމަ އެންމެ ސުވާލެކެވެ! އަހަރެމެންނަށް މިއަދު އަހަރެމެންގެ މައިންބަފައިންނާއި އަދި ޢާއިލާގެ މީހުންނާއިއެކު ދިރިނުއުޅެވިގެން މިއުޅެނީ ކީއްވެގެން ހެއްޔެވެ؟ މިސުވާލަށް އަހުރެންނަށް ވިސްނޭ ޖަވާބު ވަރަށް ކުރުކޮށް މިދިނީއެވެ. ސަބަބަކީ ފިތުނަވެރިކަމެވެ. ޙަސަދަވެރިކަމެވެ. އިތުރަށް ބުނާނަމަ އަހުރެމެން އުޅެން ﷲ ތަޢާލާ އަންގަވާފައިވާ ގޮތަށް އުޅެން ސަމާލުކަން ނުދެވެނީއެވެ.
ގެދޮރުގެ ދަތިކަން ބޮޑުވުމުން އެންމެންނަށް އެއްގެއެއްގައި ނުއުޅެވިގެން ވަކި ދިރިއުޅުމެއް އުޅެންޖެހިއްޖެނަމަ އެއީ މައްސަލައެއް ނޫނެވެ. ވިސްނަން އޮތް ކަމަކީ ވަކިން ދިރިއުޅުނަސް މައިންބަފައިން ބަލަންޖެހޭނެކަމެވެ. ޢާއިލާގެ އެންމެންނާއިވެސް ގުޅުން ބާއްވައި ހެޔޮކޮށް ހިތަންޖެހޭނެ ކަމެވެ.
މައްސަލައަކަށްވަނީ ޢާއިލާގެ ތެރޭގައި ޚިޔާލުތަފާތުވުންތައް ހުންނާތީ އެކުގައި އުޅެވެން ނުއޮންނަކަމެވެ. އެއީ ނައްތާލަންޖެހޭނެ ކަމެކެވެ. އެންމެންވެސް ޚިޔާލުތަފާތުވާނެއެވެ. މުހިންމީ އަނެކާގެ ޚިޔާލުތަކަށް އިޙްތިރާމްކޮށްގެން އުޅެން ދަސްކުރުމެވެ. އެއިރުން މިބުނި ފަދަ މައްސަލަތައް މަދުވެގެންދާނެއެވެ. އިން ޝާ ﷲ
--އިސްލާމީ ތިލަފަތުގެ ދަރުސަކުން
