އެދެމަފިރިން ދިރިއުޅެނީ ފިރިމީހާ ގަނެފައިވާ ފްލެޓެއްގައެވެ. ކައިވެންޏަށް 3 އަހަރު ފުރުނުތަނާ ފިރިމީހާ އޭނާގެ ބާރުތައް ދައްކަންފެށިއެވެ. އެއްވެސް ކުށެއް ނުކުރިޔަސް ނުބައި ބަސްތައް ބުނަންފެށިއެވެ. ކުށަކީ ކޮބައިތޯ ސުވާލުކޮށްފިނަމަ ބުނަނީ އޭނާގެ ފްލެޓުގައި އިނދެގެން އެއްވެސް ސުވާލެއް ނުކުރެވޭނެ ކަމަށެވެ. ސުވާލުކުރަން ބޭނުންވާނަމަ ފްލެޓުން ނުކުމެގެންދިއުމަށެވެ.
ފިރިމީހާ މިފަދަ ބަސްތައް ބުނަނީ އަނބިމީހާއަކީ ނިކަމެތި އަންހެނަކަށްވާތީއެވެ. ކައިވެނިކުރިއިރު އުޅެމުން އައީ ބޮޑުބޭބެގެ ގާތުގައި ވަރަށް ނިކަމެތިކޮށްކަމަށްވާތީ ނުކުމެގެންދާނެ ތަނެއް ނުހުންނާނެކަމަށް ޔަޤީންކޮށްފައެވެ.
ފިރިމީހާ އެގޮތަށް ކަންތައްކުރާއިރުވެސް އަނބިމީހާ އެއްވެސް ރައްދެއް ނުދެއެވެ. އަނގައިން ނުބުނެ އިންނަނީއެވެ. ފިރިމީހާ ޔަޤީންކުރަނީ އަނބިމީހާ ރައްދުނުދެނީ ދެވޭނެ ރައްދެއް ނެތުމުން ކަމަށެވެ.
އެއްދުވަހު މަސައްކަތް ނިމިގެން ފުރިމީހާ ގެއަށް އައިއިރު އަނބިމިހާ އިނީ ސިޓިންގރޫމްގައެވެ. ކައިރީގައި ދެފޮށި ހުއްޓެވެ. ދެފޮށި ހުރުމުން އެއީ ކޮން ދެފޮށްޓެއްތޯ ސުވާލުކުރުމުން ބުނީ އެއީ އޭނާގެ އެއްޗެތި ކަމަށެވެ. އަދި ރަނގަޅަށް ހަމަޖެހިލައިގެން ގެއިން ގޭގެ އެއްވެސް އެއްޗެއް މަދުތޯވެސް ބަލައިލުމަށެވެ. އަދި ފިރިމީހާ މިހާތަނަށް ގަނެދިން އެއްވެސް އެއްޗެއް މަދުތޯވެސް ބަލައިލުމަށެވެ. ފިރިމިހާ ބުނީ އެއްވެސް ކަމެއް ބަލަން ބޭނުންނޫން ކަމަށެވެ.
"އަހުރެން ވަރަށް ލޯބިން ކައިވެނިކުރި ފިރިމީހާއެވެ! ތިއަ ފިރިމީހާ މިހާރު އަހުރެންނާއިމެދު ކަންތައްކުރާގޮތް ފިރިމީހާއަށް އެނގޭނެއެވެ. މިއަދަކީ ކުރާ އެއްވެސް ކަމަކަށް ސުވާލުކުރަން ބޭނުންނަމަވެސް ގެއިން ނުކުންނަން ބުނި 200 ވަނަ ދުވަހެވެ. ވީމާ ކެތްތެރިކަން ކޮޅުން ލުމުން އަހުރެން މިނުކުންނަނީއެވެ."
ފިރިމީހާ ޖަވާބެއް ނުދެއެވެ. ހީކުރީ އެދަނީ ބޮޑުބޭބެގެ ގެއަށް ކަމަށެވެ. އެހެންވެ ދާތަނެއް ބަލަން އަނބިމިހާއަށް ފާރަލިއެވެ. އަނބިމީހާ އެރި ޓެކްސީގެ ފަހަތުން ދުއްވިއެވެ. ޓެކްސީ މަޑުކޮށްލީ ހުޅުމާލޭގެ އެންމެ އަގުބޮޑު ހައުސިންގ ޔުނިޓްތަކުގެ ތެރެއިން ތަނަކަށެވެ. އަނބިމީހާ ޓެކްސީން ފައިބައިގެން ދިއުމުން ފަހަތުން ގޮސް ވަންނަން އުޅުމުން ސެކިޔުރިޓީން އޭނާ ހުއްޓުވިއެވެ. އަދި ޢިމާރާތަށް ވަދެވޭނީ ޢިމާރާތުގައި ދިރިއުޅޭ މީހެއްގެ ހުއްދަ ލިބިގެން ކަމަށް ބުންޏެވެ.
ދެންމެ ވަދެގެން އެދިއައީ އަނބިމީހާ ކަމަށް ބުނުމުން ބުނީ އެހެންވީމާ އަނބިމީހާއަށް ގުޅައި ހުއްދަ ހޯދުމަށެވެ. އަދި ބޭނުންނަމަ އޭނާގެ ފްލެޓަށް ރިންގކޮށް ތަޅުހުޅުވަން އެދެވިދާނެކަމަށްވެސް ބުންޏެވެ. ފްލެޓް ނުއެނގޭތީ އެކަން ނުކުރެވުނީމަ އަނބިމީހާގެ ފޯނަށް އެތައް ފަހަރަކު ގުޅުމުންވެސް ފޯނު ނުނެގީމަ ޖެހުނީ އެނބުރިދާށެވެ.
ފިރިމީހާ ހީކުރީ އަނބިމީހާ ބޭވަފާތެރިވެ ތަނަވަސް ލޯބިވެރިއަކު ހޯދައިގެން ބަދަލުވީކަމަށެވެ. އެހެންވެ އަނބިމީހާ އުޅޭ ފްލެތް ހޯދަން 3 ދުވަސްވަންދެން ކުރި މަސައްކަތުން ކުރި މަސައްކަތުން ފްލެޓް އެނގުނެވެ. އެއީ އަނބިމީހާ ގަނެފައިވާ ފްލެޓެކެވެ.
ދެން ކަންބޮޑުވީ ފައިށާ ހޯދި ގޮތަކާއިމެދުގައެވެ. އެކަން އޮޅުންފިލުވަން އެތައް މަސައްކަތެއް ކުރިފަހުން އެނގުނީ ފްލެޓް ގަތީ އަނބިމީހާއަށް މައިންބަފައިންގެ ކިބައިން މާލެއިން ލިބިފައި އޮތް ކުޑަ ބިންކޮޅެއް ވިއްކާލާފައި ކަމެވެ. އަދި އަނބިމީހާ އަމިއްލަ ވިޔަފާރިއެއް ކުރަމުން އަންނަތާވެސް އެތައް ދުވަހެއް ވެއްޖެކަމެވެ.
ލިބުނު ދެރައަށް ވިސްނަން ހުއްޓައި ކޯޓުން ލިބުނީ ޗިޓެކެވެ. އަނބިމީހާ ވަރިވާން އެދި މައްސަލަ ހުށަހެޅުމުންނެވެ. ޗިޓަށް ޙާޒިރުވުމުން ޖެހުނީ ވަރިކޮށްދޭށެވެ.
މިއީ އަޅުގަނޑުގެ އެކުވެރި ސަމީގެ ޙަޔާތުގެ ޙަޔާތުގެ ތަޖުރިބާއެވެ. ބުނެލަން ބޭނުންވަނީ އަނބިންގެ ނިކަމެތިކަމަށްބަލައި ނިކަމެތިކުރާ މީހުންނަށް ސަމީގެ ޙަޔާތުގައި އަގުހުރި ފިލާވަޅެއްވާ ކަމަށެވެ. ބިންކޮޅެއް އޮތަސް ނެތަސް ތަޤްވާވެރިއަކު ނިކަމެތިވާން ﷲ ތަޢާލާ ދޫކޮށް ނުލައްވަވާނެކަން ޔަޤިންކުރާށެވެ. އަނިޔާލިބޭނަމަ ސަލާމަތްވެވޭނެ މަގެއް ދައްކަވާނެއެވެ. އަދި މާއުފާވެރި ދިރިއުޅުމެއްވެސް ދެއްވަވާނެއެވެ. އިން ޝާ ﷲ
- ޢަރީފާ / މިއަދުނޫހުގެ ކިޔުންތެރިއެއް
