އަޅުގަނޑުގެ އެކުވެރިންގެ ތެރެއިން ނަމާދުކުރަމުން އައި މީހަކު މިހާރު ނަމާދެއް ނުކުރެއެވެ. ބުނަނީ ކުރި ދުޢާ ޢިޖާބަ ނުކުރެއްވެވުމުން ފޫހިވީ ކަމަށެވެ. މިއީ ކޮންކަހަލަ ކަމެއްތޯ؟
ކިޔުންތެރިޔާއަށް ބުނެލަން އޮތީ ކުރާ ދުޢާ ޢިޖާބަކުރެއްވެވުން ލަސްވުމަކީ ޢިޖާބަ ނުކުރެއްވެވުމެއް ނޫނެވެ. ބައެއް ދުޢާ ވަޤުތުންވެސް ޢިޖާބަކުރައްވަވައެވެ. އަނެއްބައި ދުޢާ އެކަމުން އެންމެ ފައިދާކުރާނެ ވަޤުތުގައި ޢިޖާބަކުރައްވަވައެވެ. އަނެއްބައި ދުޢާ ޤިޔާމަތް ދުވަހު ޢިޖާބަ ކުރައްވަވަތެވެ. އެންމެ ފައިދާ ބޮޑު ގޮތަކީވެސް އެއީއެވެ. އެއްވެސް އަޅަކު އިޚްލާޞްތެރިކަމާއިއެކު ކުރާ ދުޢާ ޢިޖާބަ ނުކުރައްވަވައި ދޫކޮށް ނުލައްވަވާނެތެވެ.
ތިރީގައިވާ ލިޔުން ވިދާޅުވެލައްވައި އެކުވެރިޔާއަށް ޙިއްޞާކޮށްލައްވާށެވެ!
ބައެއް މީހުން އެބަ ބުނެއެވެ. "އަހުރެން މިވެނި އެވެނި އަޅުކަން ކުރަމެވެ. ﷲ ތަޢާލާއަށް ކިޔަމަންތެރިވެ މިވެނި އެވެނި ޙަރާމް ކަންކަން ނުކުރަމެވެ. ނުވަތަ ޙަރާމް ކުރެއްވެވި އެއްވެސް ކަމެއް ނުކުރަމެވެ. އެކަމަކު އަހުރެން ﷲ ތަޢާލާގެ ޙަޟްރަތުން އެދުނީ (ދުޢާކުރީ) އެންމެ ކަމަކަށް އެދިގެންނެވެ. އެކަންތައް ﷲ ތަޢާލާ ހިންމަވައެއް ނުދެއްވެވިއެވެ. އެހެންވެ ދެން އަހުރެން އަޅުކަމެއް ނުކުރާނަމެވެ."
މިވިސްނުން ހުރެއްޖެނަމަ އެމީހަކަށް އެ ޤަބޫލުކުރެވެނީ އަހުރެމެންގެ ދީން، އިސްލާމް ދީނަކީ ކުރާ ވިޔަފާއެއް ކަމަށެވެ. އަގު އަދާކުރީމާ މުދައު ލިބެންޖެހޭނެ ކަމަށެވެ. އެފަދަ މީހުންނަށް ބުނެލަން އޮތީ ތިއައީ އިސްލާމް ދީނުގައި އޮތް ގޮތެއް ނޫނެވެ. ފުރަތަމަ ކަމަކަށް އިސްލާމް ދީން ދަސްކުރާށެވެ.
ﷲ ތަޢާލާއަށް ކިޔަމަންތެރިވެ ޙަރާމްކަންކަން ނުކުރަންވީވެސް، އަދި ފާފަނުކުރަންވީވެސް ތިމާގެ އާޚިރަތް ކާމިޔާބުކުރުމަށެވެ. ﷲ ތަޢާލާއަށް ކިޔަމަންތެރިވެ އަޅުކަންކުރުންމަތީގައި ހުރެއްޖެ މީހަކު ސުވަރުގެވައްދަވާނެތެވެ. ވީމާ ﷲ ތަޢާލާއަށް ކިޔަމަންތެރިކަން އަދާކުރަންވީވެސް އަދި އަޅުކަންކުރަންވީވެސް އަދި ދީނުގައި ޘާބިތުވެ ހުންނަންވީވެސް ނަރަކައިން ސަލާމަތްވެ ސުވަރުގެ ހޯދުމުގެ ބޭނުމުގައެވެ. އެކަމުގައި އެއްވެސް މީހަކަށް ﷲ ތަޢާލާ ބޭއިންޞާފުން އެއްވެސް ކަމެއް ނުކުރައްވަވާނެތެވެ. މުސްލިމުން މިތިބީ އެކަން ޔަޤީންކޮށްގެންނެވެ.
ދެން ބުނެލަން އޮތީ ތިބާ އަޅުކަން ނުކުރިއްޔާ އަދި ކިތަންމެ ގިނަ ފާފަތަކެއް ކުރިއްޔާ ﷲ ތަޢާލާގެ ޙަޟްރަތަށް ޛައްރެއްގެ މިންވަރުވެސް އުނިނުވާނެތެވެ. އަދި ޛައްރެއްގެ މިންވަރު އިތުރުވެސް ނުވާނެތެވެ. ހުރިހާ ދެރައެއް ލިބޭނީ ހަމަ އެމީހަކަށެވެ. އަދި ދުޢާ ޢިޖާބަކުރެއްވެވުން ލަސްވެގެން ނާއުންމީދުވުމާ ޝަކުވާ ކުރުމަކީ ދުޢާ ޢިޖާބަ ނުކުރައްވަވައިފާނެ ސަބަބެކެވ.
އިސްލާމްދީނުގެ ހަޤީޤަތަކީ މިއީއެވެ. ވީމާ ތިމާ ކުރި ދުޢާއެއް ޢިޖާބަކުރެއްވެވުން ލަސްވެގެން ނާއުންމީދުނުވާށެވެ! އަޅުކަންކުރުމާއި ދުރުހެލިނުވާށެވެ! ފާފަކުރަން ނުފަށާށެވެ! އެއިން ކަމެއްކޮށްފިނަމަ ހުރިހާ ދެރައެއްވެސް ލިބޭނީ ހަމަ އެމީހަކަށެވެ.
- މަޢުލޫމާތު: ޑރ. ނޫމާން ޢަލީ ޚާންގެ ދަރުސަކުން
