ބައެއް މީހުން ދެއިރު ޛިކުރުކުރެއެވެ. ޛިކުރުކުރުމުގެ ތެރޭގައި އިސްތިޣްފާރުވެސް ކުރެއެވެ. އެހެންކަމާއިއެކުވެސް އޭނާ ފާފަތައް ކުރެއެވެ. ތައުބާއެއް ނުވެއެވެ. އެހެންކަމަށްވާނަމަ އޭނާއަށް އެންމެ ފައިދާ ބޮޑު ކަންތަކުން އޭނާ އެވަނީ މަޙްރޫމްވެފައެވެ.
އިސްތިޣްފާރުކުރުން މިކިޔަނީ ތިމާއަށް ކުރެވިފައިވާ ފާފަތައް ފުއްސަވައިދެއްވެވުން އެދި ﷲ ތަޢާލާގެ ޙަޟްރަތުގައި ދެންނެވުމަށެވެ. ތައުބާވުމުގެ މާނައަކީ ﷲ ތަޢާލާއަށް ލޯބިން ﷲ ތަޢާލާއަށް ބިރުވެތިވެ ފާފަކުރުން ހުއްޓާލައި ﷲ ތަޢާލާގެ މަގަށް އެނބުރި ރުޖޫޢަވުމެވެ.
ގިނަ ބައަކަށް އޮޅިފައި އޮތަސް މިއީ މުޅިން ތަފާތު 2 ކަމެކެވެ. މި 2 ކަންތަކުން ﷲ ތަޢާލާގެ ޙަޟްރަތުގައި މަތިވެރިކަން ބޮޑުވެގެންވަނީ ތައުބާވުމެވެ. އެހެންވެ އިޚްލާޞްތެރިކަމާއިއެކު ތައުބާވުމުން ލިބޭ ފައިދާ މާބޮޑެވެ.
ﷲ ތަޢާލާއަށް ލޯބިން، ﷲ ތަޢާލާއަށް ބިރުވެތިވެ އިޚްލާޞްތެރިކަމާއިއެކު ތައުބާވުމުން އަދި އެގޮތުގައި ދެމިހުރެއްޖެނަމަ އެމީހަކަށް ކުރިން ކުރިން ކުރެވިފައިވާ ހުރިހާ ފާފަތަކެއް ﷲ ތަޢާލާ ހެޔޮކަމަށް ބަދަލުކުރައްވަވައި ދެއްވަވަތެވެ. މިއަށްވުރެ އެމީހަކަށް ފައިދާހުންނާނީ ކޮންކަމަކުން ހެއްޔެވެ؟
އެހެނީ ޤިޔާމަތް ދުވަހު މީޒާނުގައި އޭނާގެ ޢަމަލުތައް ކިރައިލެވޭހިނދު އޭނާއަށް ކުރިން ކުރެވުނު ފާފަތައް ލައްވަވާނީ ކޮށްފައިވާ ހެޔޮ ޢަމަލުތަކުގެ ކޮޅަށެވެ. މީޒާން ބުރަވެގެންދާނީ ހެޔޮކަމުގެ ކޮޅަށެވެ.
ލޮބުވެތި އަޚުންނާއި އުޚުތުންނޭވެ! މިބޮޑު ނަޞީބު ލިބިގަތުމަށްޓަކައި ﷲ ތަޢާލާއަށް ލޯބިން، ﷲ ތަޢާލާއަށް ބިރުވެތިވެ އިޚްލާޞްތެރިކަމާއިއެކު ތައުބާވުމަށް އަވަސްވެގަންނާށެވެ! މީޒާން ތިބާގެ ކޮޅަށް ބުރަކޮށް ސުވަރުގެ ވަންނަން ލިބެން އޮތް ފުރުޞަތުގެ ބޭނުން އަވަހަށް ހިފާށެވެ!
- މުފްތީ މެންކުގެ ދަރުސަކުން
