މިއީ މުޖައްރިބް ފަރުވާއެކެވެ! މިކަންކުރާ އެއްވެސް މީހަކު އެކަމަށް ދެކޮޅު ނުހަދާތީއެވެ. އެއީ ފަރުވާއެއް ކަމަށް ޤަބޫލުކުރާތީއެވެ.
ފުރަތަމަވެސް ބުނެލާނަމެވެ! މިކަމަކީ ކުރަންފަށާއިރު ކުރަން ކޮންމެވެސްވަރެއްގެ އުނދަގޫތަކެއް ހުރެދާނެ ކަމެކެވެ. އެއީ ނޭފަތުތެރެ ބެދިފައި ހުންނާތީއެވެ. ކުރަން ފެށުމުން ތަތްވެފައި ހުންނަ އެއްޗެތި ނައްޓައި ލިބެމުންގޮސް ފަސޭހައިން ކުރެވޭ ކަމަކަށް ބަދަލުވާނެއެވެ. އިން ޝާ ﷲ.
ބަޔާން މިކުރަނީ ސުންނަތުގައިވާ ގޮތަށް ނޭފަތަށް ފެންލުމުން ކުރާނެ ބޮޑު ފައިދާއެވެ.
މިއީ ހަނދުމަކޮށްދިނުމެކެވެ. އަރިދަފުސް ރޯގާ މިހައި ބޮޑަށް ފެތުރެމުންދާއިރު ޑޮކްޓަރަށް ދައްކައި ބޭސްތައް ބޭނުންކުރުމުގެ އިތުރުން އަމިއްލައަށް ކުރެވެންހުރި ކަންކަން ކުރުމަކީވެސް މުހިންމު ކަމަކަށްވާތީއެވެ. އެގޮތުން އަނެއްކާވެސް ހަނދުމަކޮށްލައި މިދެނީ ގިނަ ބައެއްގެ ތަޖުރިބާއިން ފަރުވާ ޔަޤީންކުރެވިފައިވާ ކަމެކެވެ. ސުންނަތުގައިވެސް އޮތް ކަމެކެވެ.
އަރިދަފިސް ރޯގާއާއި ސައިނަސްގެ މައްސަލަތަކަކީ ވަރަށް ގިނަ ބައަކަށް ކުރިމަތިވަމުން އަންނަ މައްސަލަތަކެކެވެ. އަޖުމަ ބަލައިލަން ނަމަވެސް ވުޟޫކުރާއިރު ސުންނަތުގައި އޮތްގޮތަށް ނޭފަތަށް ފެންލަން ނިކަން ފަށައިބަލާށެވެ! އަރިދަފުސް ރޯގާއަށާއި ސައިނަސް ބަލީގެ މީހުންނަށް ޝިފާ ލިބޭކަން އެނގިގެންދާނެއެވެ. އިން ޝާ ﷲ
ސުންނަތުގައި އޮތީ ނޭފަތުން ފެން އެތެރެއަށް ދަމައި ބޭރުކުރުމެވެ. ކަނައަތުން ފެންލައި ވައަތުން ނޭފަތްފޮޅުމަށެވެ. ދެއިނގިލިކުރިން ނޭފަތުކުރީގައި ފެންއުނގުޅައިލުމެއް ނޫނެވެ.
މިއީ ވަރަށް ގިނަ ބައަކު ތަޖުރިބާކޮށް ޔަޤީންކަން ލިބިފައިވާ ކަމެކެވެ.
ސުންނަތުގައި އޮތްގޮތަށް ނޭފަތަށް ފެންލާ މީހަކަށްވެސް އަރިދަފުސް ރޯގާ ޖެހިދާނެއެވެ. ނަމަވެސް ޝިފާ ލިބުން އަވަސްވާނެއެވެ. އަދި ނޭފަތް ބެދިގެން އުޅެންޖެހުންވެސް ކުޑަވާނެއެވެ. ނޭފަތުން އަރިދަފުސް ފޭބުންވެސް މަދުވާނެއެވެ.
މިކަމުގެ ސަބަބެއް ކަމަށް ޑޮކްޓަރުންވެސް ޤަބޫލުކުރަނީ ސުންނަތާއި އެއްގޮތަށް ފެންލުމުން ނޭފަތު ހޮޅި ސާފުވުމެވެ. އަދި ސައިނަސްބަލީގެ މީހުންނަށްވެސް އެކަމުން ޝިފާ ލިބެނީ ހޮޅީގައި ހަރުލާފައި ހުންނަ ހިރަފުސްތަކާއި އެހެނިހެން ތަކެތި ފިލައި ސާފުވުމެވެ. ނޭފަތް ބެދުމުން ސަލާމަތްވުމެވެ.
މީހަކު އަލަށް އެގޮތަށް ފެންލާން ފަށާއިރު ކުޑަ އުނދަގުލެއްވެސް ހުރެދާނެއެވެ. ދިލަވެސް ނަގައިފާނެއެވެ. ނަމަވެސް ފެންލާން ފެށުމުން އެކަންކަންވެސް ކެނޑިގެންދާނެއެވެ.
މިއީ މިޒަމާނުގެ ޑޮކްޓަރުންވެސް ޤަބޫލުކުރާ ޙަޤީޤަތެކެވެ. މިފަދަ ކަންކަމުން އެނގިގެންދަނީ ސުންނަތަށް އަމަލުކުރުމުން ލިބޭ ފައިދާތައް ގިނަކަމެވެ. ދުވާލަކު 5 ނަމާދުކުރާ މީހާގެ ނޭފަތް މަދުވެގެން ދުވާލަކު 5 ފަހަރު ސާފުވަމުންދާނެއެވެ. އެކަމުގެ ރަނގަޅު ނަތީޖާ ފެންނާނެއެވެ.
މިހައި ސާބިތުކަމާއިއެކު ބުނަން ކެރެނީ މިކަން ތަޖުރިބާ ކުރާ މީހަކަށްވާތީއެވެ. ސުންނަތާއި އެއްގޮތަށް ފެންލަމުން ގެންދާތާ މިހާރު އަހަރުތަކެއް ވެދާނެއެވެ. ދުވަހަކުވެސް އަދި މިހައި ތަނަށް އަރިދަފުސް ރޯގާއެއް ޖެހިގެން ކިނބިހިއެޅޭތީ ނޭފަތުން ފައިބާތީ ޑޮކްޓަރަށް ދައްކަން ޖެހިފައެއް ނުވެއެވެ. ރޯގާ ޖެހެއެވެ. ކިނބިހިވެސް އެޅެއެވެ. ނޭފަތުންވެސް ކޮންމެވެސް ވަރަކަށް ފައިބައެވެ. ނަމަވެސް ޝިފާ ލިބެއެވެ. އިން ޝާ ﷲ.
މީގެ އިތުރުން މިކަމުގައި ވަރަށް ގިނަ މީހުންނާއި ވަނީ މަޝްވަރާ ވެސް ކުރެވިފައެވެ. ސުންނަތާއި އެއްގޮތަށް ނޭފަތަށް ފެންލާ އެންމެންވެސް މިކަމަށް އެއްބަސްވެއެވެ. އެއްބަސް ނުވާ ހަމަ އެންމެ މީހަކާއިވެސް އަދި މިހައިތަނަށް ބައްދަލުވެފައެއް ނެތެވެ.
ތަފާތު އަރިދަފުސް ރޯގާތައް ގިނަވަމުންދާ މިފަދަ ދުވަސްވަރަކު މިފަދަ ކަންކަމަށް ސަމާލުކަން ދެއްވާނަމަ އެކަމުގެ ފައިދާ ފެނިގެންދާނެއެވެ! އިން ޝާ ﷲ
--މިއަދުނޫސް
